حمله آپاردی کوفیان خیمیه قتلگاهدن #غارت_خیام_یحیوی_اردبیلی

غارت خیام
.
.
مرحوم یحیوی اردبیلی
.
.
حمله آپاردی کوفیان خیمیه قتلگاهدن
مسند و فرش و پرده نی چکدیله بارگاهدن
.
.
خیمیه کیم قویور قدم ترمه و شالیله چیخار
شی لری غارت ایلیوب خیمه لرون بوشین ییخار
تلّده پرچمین ووروب شمر او کشاکشه باخار
لشکره صادر ایلیور حکمین او ایستگاهدن
.
.
گوردیله خوردا بیر اوشاق چیخدی کناره خیمه دن
حیدری گوشواره سی وار قولاقیندا لعل دن
نیمه نفس دوروب باخور تتریور هولدن بدن
سینه سینه گلوب بیر اوخ دگدی صف سپاهدن
.
.
حضرت مسلمون قیزی باشدا الین داراخلادی
تاپمادی بیر پناهگاه آت دوشونی قوجاخلادی
تنگه دوشوب او حالده آتلار اونی ایاقلادی
ئولدی نتیجه آلمادی حیف او پناهگاهدن
.
.
دقت ائله بو کلمیه آنلا سوزین اشاره سین
بیر گوزی گوی عنود عرب دوتدی یولین کناری سین
زوریله سیندیروب آلوب فاطمه گوشواره سین
قسمت آپاردی اول لعین زیور حجله گاهدن
.
.
خیمه آلولانوب یانور دوره قشون چکوب چپر
زینب اودون قباقینه سینه سین ایلیوب سپر
قوشلار انوب فراتیدن سو گتوروب اودا سپر
عصرون امامی یانماسون شعلۀ خیمه گاهدن
.
.
هارداسان ای حسینمون مونس و یاری جبرئیل
گل کمک ایله زینبه ظلم اودینا دوشوب خلیل
غرق خطردو کشتی نوح الهی الدخیل
قدرت الونله چک اونی ورطۀ پرتگاهدن
.
.
بنت رشیدۀ علی وئردی نشان رشادتین
ووردی بئلینه شیر کیمی دامن استقامتین
قیلدی هدف مصیبتون آتش پر حرارتین
یوسفینی خلاص ائدوب چکدی آلولی چاهدن
.
.
دوندی نجف ساری خانم سسلدی هارداسان بابا
بیلمورم ایندی قاچدیلار دلسیز اوشاقلاریم هارا
گوردوم اوزوم بو خیمه دن چخدی قیزیم یانا یانا
دشمن ایچینده قالمشام اوزمیشم ال پناهدن
.
.
جدّ بزرگواریم ای اشرف الانبیا بابا
امّ کباریم ای خانم فاطمه بینوا آنا
گور نئجه یاندی مسکنیم ظلمدن ایش یتوب هارا
چوللره یوز قویوب حرم خیمه قوروب گیاهدن
.
.
خیمه لریم یانوب اوزوم دود و بخاره سالمشام
ناخوش امامی درک ائدوب سینه مون اوسته آلمشام
معجریمی آلوبدولار موی بزهنه قالمشام
باشیمه معجراورتمیشم دودۀ پر سیاهدن
.
.
«یحیوی ام » قوجالمیشام ریش و سری آغارتمشام
یا حق و رب العالمین عمر گونین آزالتمشام
گردنیمه حسینوون عشق کمندین آتمشام
اوز کرمونله قیل گذشت ائیله دیگیم گناهدن
.
.
#غارت_خیام_یحیوی_اردبیلی #ترکی #زبدةالاشعار