سیر وسلوک قافنین عنقاسییم علی #راه_شام_شبگیر_تبریزی

راه شام
.
.
شبگیر تبریزی
.
.
سیر وسلوک قافنین عنقاسییم علی
دریای عصمتین دُرِ لالاسییم علی
.
پنهاندی گرچه صورت و معنی کردگار
پیدای صُور صورت معناسییم علی
.
اشراقدن عروج ائلییوب نفس ناطقه
معراج روحمین اودی اقصاسییم علی
.
اطوار سبعۀ دلی تسخیر ائدوب باجون
امّا که محو سرّ سویداسییم علی
.
الفقر فخری پیشم اولوب افتقاریله
مستغنییم ؟ نه ، غرقۀ دریاسییم علی
.
گرچه بابامدی خازن اسماء عالیه
منده مرید و حامل احصاسییم علی
.
زینب بی بیمدی مظهر اعیان ثابته
من واقف رموز الفباسییم علی
.
سودای کربلاده سهام آلمیشام ازل
مرضیّه ام رضای بلایاسییم علی
.
عیسای کربلا دمی عیسا ائدوب منی
مین عازر محبّتین عیساسییم علی
.
سن آسمان عشقیده تابنده ماهسن
مهری بابامدی منده ثریّاسییم علی
.
تفسیر نور ایلوری رأس منوّرون
نور جمالون آینه سیماسییم علی
.
جام جهان نمادی باشون نوک نیزه ده
جمشید وار محو تماشاسییم علی
.
یا نخله دور جدا دایانوب طور عشقده
محملده باشیوین اودی موساسییم علی
.
محشردی یا کی گون دایانوب بیر جدا بوئی
یا من سپهر چارم عیساسییم علی
.
طیّ طریق لا ائدوب اِلّایه یتموسن
لا منزلینده قربت اِلّاسییم علی
.
چشم بصیرتیله باجون عالمی گؤرور
خاک قدومووین اودی بیناسییم علی
.
علت اودور که جلوه لنور گؤزده لم یزل
الطافیویله محو تجلّاسییم علی
.
بالا قدون بلایه الف زائد ایلییوب
لام بلا منم بئله رسواسییم علی
.
حُسنون زکاتی نیم نظردور نگاردن
صحرای عشق بادیه پیماسییم علی
.
ابن سبیل و دُرّ یتیمم شرایط
اخذ زکاتیوین ائله داراسییم علی
.
ای باشووی جدادن اؤره ک باشینه باسیم
آخر مریض زلف مُطرّاسییم علی
.
زوّار ایچلله دَنّ شراب طهوردن
کیم زائر اولسا قبریوه سقّاسییم علی
.
شبگیرده نالیه باخ ای شکر فروش
شکّر فروش مست شکرخاسییم علی
.
.
.
#راه_شام #شبگیر_تبریزی
#سیر_و_سلوک_قافنین_عنقاسییم_علی
#ترکی
#زبدةالاشعار