مدفن اولدی سنه بو گوشه ویرانه رقیه #کوچ_شام_ذوقی_تبریزی

کوچ از شام
زبانحال خواهر حضرت رقیه (س) بر سر قبرش
.
.
مرحوم ذوقی تبریزی
.
.
مدفن اولدی سنه بو گوشه ویرانه رقیه
آیریلور فاطمه سندن ، گلوب افغانه رقیه
.
.
ای قولی باغلی وئرن جان بو قوری یرده اویان دور
بو غریب ئولکه ده یاتما بله یالقیز ، دور آماندور
عمه لر گیتدی باجی آز منی سن ساخلا یوباندور
باغریمی بیر بله دوندرمه منیم قانه رقیه
.
.
شامدن رخصت رجعت وئریلوب دور أسرایه
دور باجی قافلۀ غم گیدوری کرب و بلایه
اکبرین مرقدی منظوردی بو آل عبایه
گیدیسن دور گیداخ اول محضر جانانه رقیه
.
.
بلبل آیریلماز اگر قویسالا گل فصلی چمندن
منه گلشندی باجی گوشۀ ویرانه وطندن
دونمرم منده بو ویرانه ده گر قویسالا سندن
باغبان اولام ئوزوم من بو گلستانه رقیه
.
.
جان وئرن حالوی مد نظر ایلوب یانارام من
شعلۀ شمع فراقوندا یانوب اودلانارام من
سنه قان آغلارام ، ئوز دردیمی آسان سانارام من
نجه پروا ایلمز یانماقا پروانه رقیّه
.
.
گلمیشوخ شامه قولی باغلی غم و محنتیلن بیز
قوری یرلرده نشیمن ایلدوخ ذلتیلن بیز
گیدیروخ ایمدی ولی یثربه چوخ حسرتیلن بیز
دور سن اول همره و همناله بو نالانه رقیه
.
.
سنیدون شامه گلنده باجی هم محملیم آخر
هم انیس غم و هم مونس درد دلیم آخر
گجه گوندوز یری وار نالیه نی تک گلیم آخر
یتیرم شیونیلن عمریمی پایانه رقیه
.
.
وئردی هر دورده ، دوران بیزه هر درد و محن وار
ایمدی بو غصه لی دللرده باجی عزم وطن وار
دور گیداخ قوللاریمیزدا نه دوشاخه نه رسن وار
نه اسیروخ داخی بو فرقۀ عدوانه رقیه
.
.
واردی نه شمر و سنان ایلمه وحشت باجی جان دور
ساربان یوخ ایده یوللاردا اذیت باجی جان دور
گچدی بیرده او اولان رنج و مشقت باجی جان دور
وورا بولمز داخی بوندان صورا بیگانه رقیه
.
.
آچیلوب قید اسارت دوزولوب محمل ساتر
گیدورم یثربه دور اول منیله ، سنده مسافر
نگران دور باجی صغرا گوزی یوللاردادی آخر
دگول آگه ستم گردش دورانه رقیه
.
.
«ذوقی» ئوز منزلون ائت سنده عزاخانه وطنده
دوت عزا ایله نوا گلگیلن افغانه وطنده
ذکر ایله دیلده مدام آغلا بو عنوانه وطنده
مدفن اولدی سنه بو گوشۀ ویرانه رقیه
.
.
#کوچ_شام #ذوقی_تبریزی #ترکی #زبدةالاشعار