زبانحال حضرت زینب (س) به حضرت امام حسین (ع) در شهادت حضرت علی اصغر (ع)
.
✍️ زبدة الاشعار ✍️
?: @nohe_torki
.
مرحوم سید رضا حسینی سعدی زمان
.
چوخ باخوب اصغره یانما منی یاندرما حسین
اوخلی قربانوی میدانی دولاندرما حسین
.
ایتمه غم اولمادی سو سولدی الونده گل یاس
گتور اکبر کیمی دوتسون آناسی اصغره یاس
باخوری اهل جفا اصغرون آز باغریوا باس
خیمه ده منتظری واردی یوباندورما حسین
.
شعله آهویله قلبیمی آز یاندور یاخ
غش ایدوبدور آناسی خیمه ده بیر شیونه باخ
بالاوون قانینی گل بو آغاران زلفیمه یاخ
آتما قانین گویه افلاکی بویاندرما حسین
.
سن او قانیله بویاندون منیده قوی بویانوم
گلمه سن گلّم اوزوم اولما رضا چوخ دولانوم
قویموری قید محبت باجون اولسون دایانوم
چکمه خجلت چکیلوب دوره ده یان دورما حسین
.
نه چکور اصغر آناسی اونی بیر لیلی بُلَر
شیر خواره بالاسین گورمسه صاق قالماز اُلر
پوزقون احوالیوه باخدوقجا بو شام اهلی گولر
دردیوی گل منه دی دشمنه آندورما حسین
.
سوورم بیرده او غنچه گولی آغوشه آلام
باغلیام حلقینی گهواره سینه بیرده سالام
ساخلاما عرصه گه رزمیده یورقوندی بالام
اوز اوزون یورما مصیبتدن اوساندورما حسین
.
آفت باد خزان یوز ویروب اول غنچه گوله
قورخورام آغلیاسان شاد اولا شام اهلی گوله
گورورم ایستموسن بو غمی اطفال بُله
من ربابه دیرم سن اونا قاندورما حسین
.
یاتمیوب اوچ گیجه گوندوزدی زبس ایچمیوب آب
سو ویروب زهرلی پیکان ایلیوب ایمدیکه خواب
سو ایچوب اصغری فکر ایلوری بیچاره رباب
یوخلیوب، ساخلاما میداندا اویاندرما حسین
.
بُلموری اهل حرم وضعینی قارداش ایشیگون
سو امیدیله چکور الده سو جامی کشیگون
خردا قیزلار دولانولّار باشینا بوش بشیگون
آغلاماقدان بالالار اُلدی دایاندرما حسین
.
گه فرات اوسته باخورسان ایدوسن شور و نوا
چاقورورسان بالاوی آلسون ابوالفضلون اخا
الی یوخ قارداشون عبّاسین اونی سندن آلا
عذری واردور آتاسی حیدری یاندورما حسین
.
یانار احوالوه بیگانه اگر گورسه سنی
آغلاسان آغلادوسان قارداش آنام فاطمه نی
غصه دن باتدی سسیم آغلاما آغلاتما منی
خانه صبریمی بو چولده تالاندورما حسین
.
یاحسین رفع ایت «حسینی» دن اوزون بو مرضی
بیر نگاهون اولی مین دکتر عالی عوضی
گوز یاشیدی بو سوزیمدن نچه نوکر غرضی
چوخ باخوب اکبره یانما منی یاندورما حسین
.
#سبک_یارالی_جان_یارالی ( 4 سبک)
.
#اصغریه_شهادت
#سعدی_زمان
#چوخ_باخوب_اصغره_یانما_منی_یاندرما_حسین
#کنزالحسینی2 ص 37
#ترکی
.
✍️ #زبدةالاشعار ✍️
?: @nohe_torki
نظر دهید