یارالی باشیم جداده سنه رهنمادی زینب #کوفه_نخستین

کوفه
.
.
.
#سبک_سو_یوخومدی …
مشابه
.
.
مرحوم حاج مختار نخستین اردبیلی
.
.
یارالی باشیم جِداده سنه رهنمادی زینب
باخوب آغلاما، دیللر غمه مبتلادی زینب
.
.
گیدورم خرابه شامی دولانام جلالتیم وار
بو دولانماقیمدا دین حقه چوخ حمایتیم وار
نقدر بلاسی اولسا باشیمون رضایتیم وار
بیله لر که بو کسوک باش نجه حق نمادی زینب
.
.
او گونیکه ایلدوم من باجی ئولمگه اراده
کسیله باشیم قفادن دولانا گرک جداده
گزه کوفه نی سراسر گیده مجلس زیاده
بیله کوفه اهلی اوندا بو نه ماجرادی زینب
.
.
باشیما جدا باشیندا باخوب افتخار ایدللر
باجی رسمیدور گلنده شهه گل نثار ایدللر
عمل ایلیوب او رسمه منی سنگسار ایدللر
یارا اوسته یاره دگسه یاراما دوادی زینب
.
.
باجی قاتلیم بیلور من شه بی بدیل عشقم
حقه نیزه اوسته طاعت ایلین دلیل عشقم
اوخورام جداده قرآن بیله لر خلیل عشقم
او یریکه ذبح ایدوبلر باشیمی منادی زینب
.
.
کسه بیر باشی قفادن قویا قاتلی تنوره
او تنور دوره سینده گله نور حق ظهوره
دییه فاطمه حسین وای اوزونی ویرا او نوره
گوره باشیمی کول اوسته دییه غم فزادی زینب
.
.
باجی بی سبب دگل که پوزولوب منیم جلالیم
دولانور بو شهر شامی قولی باغلى اهل عیالیم
سنه اوز ایوینده طعنه ویراجاق یزید ظالیم
دییه جکله طعنه ویرما داخی بینوادی زینب
.
.
یانورام جدا باشیندا ستمیله یانماقوندان
چکورم باجی خجالت باش آچوق دولانماقوندان
یوزه زلفوی توکوبسن بیلورم اوتانماقوندان
نه بیلولّه کان عصمت شرف و حیادی زینب
.
.
منی قتلگهده گوردون یوزی اوسته قان آپاردی
بدنیمده یوخدی طاقت او قدر یاراسی واردی
باشیمی کسنده قاتل قره زفلرون آغاردی
قانیمی خضاب ایدوبسن باشووا حنادی زینب
.
.
بو یارالی باش کول اوسته حقی انتشار ایدوبدی
گھی دیره گه تنوره گیدوب افتخار ایدوبدی
اودیکه بهشتی الله منه واگذار ایدوبدی
اونی سن تصوّر ایتمه منه خونبهادی زینب
.
.
دگل ایندی بسکه جدّیم گتورن صفاده قرآن
گرک اهل شامه تبلیغ اولونا جداده قرآن
اوخورام جدا باشیندا ویره استفاده قرآن
بیرینی هدایت ایتسم منه اکتفادی زینب
.
.
ایله که جداده قرآن اوخیاندا شاه بطحا
اسرایه روح تازه ویریلوبدی اوندا گویا
یوزونی حسینه دوتدی دیله گلدی دخت زهرا
اوخی نیزه اوسته قرآن دیلوه فدادی زینب
.
.
باجی قیزلارا دی رأس شهدایه باخماسونلار
سارالان ستاره دوتقون گرک آیه باخماسونلار
نه سو آدی دوتماسونلار نه جدایه باخماسونلار
او تانور جداده عباس ایله باوفادی زینب
.
.
گوروسن که آچمور عباس گوزونی خجالتیندن
بیرینه نشان ویرنمور ئوزونی خجالتیندن
دانشوب دینمور اصلا سوزونی خجالتیندن
چون او حافظ حریم شه کربلادی زینب
.
.
باجی مندن اوتری قویما ایلسون فغان رقیّم
ویره جک خرابه یرده قولی باغلی جان رقیّم
ایده جک خرابه یرده ئوزونه مکان رقیّم
سارالوب جمالی گویا ساری کهربادی زینب
.
.
قولونی طناب پاره ایلیوب دواسی یوخدور
نه باشیندا تازه معجر نه تزه لباسی یوخدور
گجه صبحه جن قالار آج یمگه غذاسی یوخدور
اوز اوره ک قانی او طفلون اوزونه غذادی زینب
.
.
#کوفه #نخستین
#یارالی_باشیم_جداده_سنه_رهنمادی_زینب
#ترکی
.
.