حالات حضرت رسول اکرم (ص)
گریز به مصیبت عبداله ابن عباس (ع)
.
✍️ زبدة الاشعار ✍️
.
🆔: @nohe_torki
.
حاج محمد باقر تمدن(مجلس کامل)
.
مرحوم انور اردبیلی
.
آخرین حجّین تمام ایتدی رسول کبریا
آیریلوب بیت الهیدن شریف انبیاء
حضرته حجّ وداعیدی او حجّ با صفا
حسرتیله کعبیه باخدی مبارک گوزلری
ترک ایدوب مروه صفا و زمزمیله مشعری
.
.
گیتدیم ای کعبه بیوردی بیرده گورمزسن منی
گوز یاشی گوزلرده تودیع ایلیور احمد سنی
ای حریم ذوالمنن وی مسلمینون مأمنی
خوان رحتمدور جَوارون پاکدل انصاریوه
دامن حقدن دوتوب هر ال چاتا استاریوه
.
.
یثربه رجعت ایدوبدور موکب خیرالانام
ساکن اولدی منزلنده سید والا مقام
مولد انصارینه بذل ایلیوبدور احترام
کچدی ذالحجّ و محرّم باشلانوب ماه صفر
آخرین ماه حیاتین درک ایدوب فخرالبشر
.
.
یاندیران بیر تب گرفتاری اولوبدور مصطفا
شدت ایتدی سوزشی جسمنده هر صبح و مسا
رحلته آینه اولدی صورت قرآن نما
زندۀ جاوید درک ایتدی ئولوم آثارینی
گوز قباقینده گوروب بزم وصال یارینی
.
.
گاهی زهرایه باخوردی گه علی رخسارینه
گاهی سبطینی آلوردی سینۀ تبدارینه
مشتری گاهی اولوردی زینبون دیدارینه
جان حسین و جان حسن جان زینبدی چوخ سوزی
هاموسیندان چوخ قیزی زهرایه آغلوردی گوزی
.
.
دفتر عشق شهیدانه ایدوب بیرگون مرور
زایر اولدی کشتگان عشقنه مغزنده شور
دامن کوه احدده مصطفا تاپدی حضور
تربت پاک شهیدانی زیارت ایلدی
گون باتنجا اگلشوب قرآن تلاوت ایلدی
.
.
ایتدی فرمایش سلامیم وار سر مذبوحوزه
مقصد مَجد و شرفده پیکر مجروحوزه
خسته روحیم آز قالور گلسون قوشولسون روحوزه
عازم کوی صفاانگیز جانانم بیلون
آز زمان یثربده من زهرایه مهمانم بیلون
.
.
ترک ایدوبی کوی شهیدانی نبیّ ذوالکتاب
دامن کوه احددن اَندی اُول عالی جناب
جمعیدی دروازۀ یثربده مردم بی‌حساب
حضرتون گلمشدیلر شهر اهلی استقبالینه
بوسه ورسونلار تراب مقدم اجلالینه
.
.
وارد دروازه اولدی سیّد رفرف سوار
آلدیلار اطرافین استقبال ایدنلر کعبه‌وار
فوج انصار و مهاجر ایلدی دیدار یار
بیر یتیم اوغلاندا گلمشدی او عالی محضره
ایستیوردی دردینی اظهار ایده پیغمبره
.
.
ازدحامیدی ز بس اولمادی ممکن صبحته
بوینی چگننده سلام ایتدی رئیس امّته
یتمدی اما سسی گوش نبیّ رحمته
قیلدی بختندن گلایه گیتدی قبرستانه دوز
اشگی گوزلرده آتا قبرین تاپوبدور قویدی یوز
.
.
درد دل ایتدی یانقلی سوز دیدی بیر سلسله
اولمادی بیرکس اونون گوزدن آخان اشگین سیله
نه آتاسی قبریدن سس ویردی اول شیرین دله
اهل معنا قلبینی کپریک اوخیلا اوخلادی
خسته‌دور گوردی یوزون قبراوسته قویدی یوخلادی
.
.
اذن ربیله انوبدور جبرئیل خوش پیام
عرض ایدوبدور حضرت پیغمبره بعد از سلام
شکویه سندن گلوبدور ذات پاک لاینام
ویرمییوبسن بیر یتیمه سن ندن دروازه‌ده
یا حبیبی بی‌توجه اولما بو اندازه‌ده
.
.
بیز سنه ویردوک نبوّت بی‌کسه یار اولماقا
هر یتیم و بی پرستاره پرستار اولماقا
اولماروق رای آتاسیز طفل‌لر خوار اولماقا
بی توجه اولدوقون اوغلان ایله سوزلر دیوب
آه چکدوقجه اورکدن طاق عرشیم تتریوب
.
.
عاطفون چوخدور محبّت خانه‌سین آباد ایله
یاده سال یاددان چخان بیر دردمندی یاد ایله
ایستیورسن شاد اولاق بیز اول یتیمی شاد ایله
صحن قبرستاندا غملر ایلیوب بی‌صبر و تاب
یوز قویوب‌دور تپراقون اوسته یاتوب بی‌رختخواب
.
.
گلدی قبرستانه منزلدن پیمبر دلغمین
طفل مظلومی تاپوبدور خواجۀ روح‌الامین
اگلشوب تپراقون اوسته باشنه چکدی الین
گوردی رخساره دوشوبدور تل‌لری چین‌چین یاتوب
روزگاری تلخدور اما ئوزی شیرین یاتوب
.
.
سسلسه ممکندی گوردی دیسگنوب بیدار اولا
سعی ایدوبدور ساغر لطف و کرم کامل دولا
صورتندن چوخ یواش زلفین آیوردی صاق صولا
نظمه سالدی طرّه‌سین بارماقلاریلا شانه تک
گوزلرین آچدی او طفلک نرگس مستانه تک
.
.
اولدی پیغمبر او زار و مبتلایه دل نواز
دردمند ایتامه وار منده دیدی آغوش باز
گل دیزیم اوستونده اگلش احمده ناز ایت بیرآز
کیریگون اشگ ملاله تاب ایدم حاشا باتا
دار دنیادن آتون گتمش سنه اولام آتا
.
.
گرچه سوزانم اوزوم الان تب سوزاندن
تا نفس وار طاعتیم وار حق ویرن فرماندن
دور گیدک با هم ایوه السّاعه قبرستاندن
باغبانم من سنی تریاسَمن تک ساخلارام
منزله گتسون حسینمله حسن تک ساخلارام
.
.
ای قلم پرشور اولوب طبعیم کیمی چات دادیمه
مرغ روحمده قولاق ویر ناله و فریادیمه
یازدوقون سوزلر سالوب عبّاسین اوغلون یادیمه
گورمیوبدور دیدۀ دنیا ایله زیبا یتیم
صورتی عبّاسه بنذر قامتی رعنا یتیم
.
.
عبد صالحدن قالان بیر اوغلان عبدالله نام
واژه‌لر وصفنده عاجز فکرلر مدحنده خام
خوی و خلقتده ابوالفضلون اوزیید بالتّمام
سنّ و سالی کوچک اما نکته سنج و نکته بین
گوهر ارزندۀ ته کیسۀ امّ‌البنین
.
.
مادر عباس اونیلان اگلشوردی گوز گوزه
دل دیوب مشغول ایدردی دلبری شیرین سوزه
جان کیمی بیردن قوجاقلاردی قویوردی یوز یوزه
هیچ کیمی غملر دیوردی تنگ من تک سالمیوب
شکر اولا سن وارسان عباسون یری بوش قالمیوب
.
.
تار زلفون ترپننده رشتۀ جان تتریور
کپرگون قالخور انور بو قلب شان شان تتریور
سانکی عبّاسون گوزی اوستنده مژگان تتریور
من قوجا بیر باغبانم بو ایوه سن مثل گُل
بوینی چگننده قباقمده اوتورما خوش دگل
.
.
سن خزان گورمیش باغمدا سرو باغمسن بالا
سن بو داغلی قلبیمه تسکین داغمسن بالا
سن بو پوزقون منزله روشن چراغمسن بالا
دشمنون واردور وطنده اهل شردن قورخورام
کوچیه چوخ گتمه اوغلوم بدنظردن قورخورام
.
.
ایتمه غم دوشدون بالا اولدوز کیمی آیدان اوزاق
کام آلوب فیض شهادتدن آتون قالمادی ساق
چوخ یتیمی حق تعالی ایلیوبدور مین بوداق
باد غم سولموش گلستانه دوباره اَسمه‌سون
سایوی الله بلالی باشیم اوستن کسمه‌سون
.
.
دورد اوغول دوغدوم دیدیم اولدوم جهاندا بختور
عزّتیم آرتا ئولن وقتمده روحیم حظّ ایدر
دورد اوغول چگننده قبرستانه تابوتیم گیدر
سروتک ایکاش اوجالسون قدون ای آهو باخش
قبره تابوتیم گیدنده بیر قولوندان سن یاپوش
.
.
بعضی گون غملر او طفلون طاقتین ایلوردی طاق
گوزلریمده مثل محبسدور دیوردی بو اطاق
آی ننه ویرسون اجازه عمّه‌مه گتسم قوناق
سرّی سوزلر وار بی‌بیمدن بیر به بیر آلّام خبر
اکبره ویرسم قسم هر مطلبی روشن دییر
.
.
منزل زینبده عبدالله اولوبدور مهیمان
شمس عفّت محضرینده اگلشوب زانو زنان
باخدی عمّه قارداشی اوغلون گوروبدور باغریقان
خوش گلوبسن ایتدی فرمایش نه دردون وار بالا
گویندی گورجک سنی قلبیم‌ده کی داغلار بالا
.
.
دردمندم گلمیشم عرض ایتدی درمان سنده‌دی
کربلادن گلموسن محنتلی عنوان سنده دی
اوردا بیر طوفان اولوب اخبار طوفان سنده‌دی
قدّیووی بش قارداشین بار غمی ایتمش کمان
وار اولونده قانلی بیر کوینک کیمین دور عمّه‌جان
.
.
عمّه جان پیر اولموسان غملر آغاردوب باشووی
اولمیوبدور بیر کسون گوزدن سیله گوزیاشووی
کربلاده ئولدوروبلر بش گوزل قارداشووی
هانسی بیر قارداشووه دعواده یاره چوخ دگوب
هانسی بیر قارداشووین آیا گوزیندن اوخ دگوب
.
.
بعضی صحبت‌لر آنام امّ‌البنین عنوان ایدور
اگلشه بیلمور ایوینده عزم قبرستان ایدور
بیلمورم کیف و کمی مندن نیه پنهان ایدور
بیر به بیر حال شهیدانی گوروبسن سن دانش
پرده دن عریان ایله هر مطلبی روشن دانش
.
.
ویرموسن بیکس آنام امّ‌البنینه بیر علم
بیر علمده گورسنور درد و مصیبت مین رقم
پرچمه خاطر کیمون بازولری اولمیش قلم
من بیله فکر ایلورم ای عمّۀ خونین جگر
پرچون دردی ننم امّ البنینی ئولدورر
.
.
بیرده بیر پاره سو مشکی سن ویروبسن ارمغان
کیم گوتورمیشدی اونی رنگین ایدوبدور لخته قان
هر کیم اولسا صاحبی حتماً ویروب شرمنده جان
گوزلریم قربان سنه ناراحت اولما بوسوزه
کاش او پاره مشکی ای عمّه گتورمیدون بیزه
.
.
من آتا فکرین بی بی امکانی یوخ باشدان آتام
گوندوزی آواریم غملر گیجه قویمور یاتام
پنجۀ نامردلرده خوار اولوبدور مرد آتام
محنتی عبداللهون تاراج ایدوبدور صبرینی
کربلا زوّاری اولسیدیم ئوپردیم قبرینی
.
#پیامبراسلام_شهادت
#عبداله_العباس
#یتیم
#آخرین_حجین_تمام_ایتدی_رسول_کبریا
#انور_اردبیلی
#صدای_عاشورا_انور
#ترکی
.
✍️ #زبدةالاشعار ✍️
.
🆔: @nohe_torki
نظر دهید