سس گلور گویا علی شاه ولا صحراده دور #فاطمیه_بیدقداری

زبانحال حضرت علی (ع) در شهادت حضرت زهرا (س)
..
..
مرحوم حاج داود بیدقداری
..
..
سس گلور، گویا علی شاه ولا صحراده دور
سویلیور یا فاطمه دردون دل شیداده دور
..
ای یامان گونده علینین یاوری باخ بیر منه
گور امیر بت شکن الآن نه استدعاده دور
..
قویمیشام قبره سنی سندن قاباق من ئولموشم
روحیمی دفن ایلدیم جسمیمدی بو دنیاده دور
..
ای علینین سویگولی دور باخ بوکولموش قامته
گور همان قامتدی بو، یا شاخۀ افتاده دور؟
..
چوخ صبوریدیم ولی یوردی بو دنیا حیدری
یوردی بیر نحویله الان هر نفس ایذاده دور
..
رخنه یئتمز شأنیوه گرچه یانوبدور درگهون
چون سنون شأن و مقامون عالم بالاده دور
..
ایستی مسمارین یئری یاندیردی قلبی فاطمه
بیلمدی اود یاندیران شانون ذَوِی القُرباده دور
..
آشنادور لاله لر بو چولده سرتاسر منه
چون که حیدر هر گئجه بیر قسمت صحراده دور
..
فاطمه سن سیز منه زنداندی دنیا یکسره
روحیمی زندان یوروب راحت لیگیم عقباده دور
..
قبرون اوسته راحت اولام منده ئولسم فاطمه
سن گئدندن مرتضی هر لحظه بو سوداده دور
..
چاه صحرایه دئدیم آخر سوزومدور بو سنه
دولسا دنیا گر فرشتیله گوزوم زهراده دور
..
هر گئجه زینب آچار سندن قالان سجاده نی
اشک حسرت گورّم اول گل تک سولان سیماده دور
..
اوخشیار زینب سنی آغلار حسینیلن حسن
آغلیان گوزلر او ائوده زینب کبراده دور
..
«داورا» یازما بو غمدن اود دوتار دفتر یانار
بیر اشاره بسدی چون عاقل گوزی ایماده دور
..
..
#فاطمیه #بیدقداری #فاطمیه_شهادت #ترکی #زبدةالاشعار