شهادت حضرت زهرا (س)
.
✍️ زبدة الاشعار ✍️
.
🆔: @nohe_torki
.
مرحوم #خوندل_تبریزی
.
آنا ندن غم و دردیله الفت ایلموسن؟
آنا ندن منی غرق مصیبت ایلموسن؟
.
آنا ندن سارالوب گل یوزون ، سولوب رنگون؟
نه وار که نالیه بو ایوده عادت ایلموسن
.
آنا ندن آغاروب ساچلارون ، بیلون بوکولوب؟
بو قدر ظلمه ندن استقامت ایلموسن؟
.
آنا ندن منه حسرت گوزیله چوخ باخوسان؟
بو بارده منی سن غرق حیرت ایلموسن
.
آتام باخاندا بو خم قامته چکر مین آه
دگر او آهی منه ، مین قیامت ایلموسن
.
قاپون یاناندا یخلدون ، نه صدمه یتدی سنه؟
مگر او گونده قبول هلاکت ایلموسن؟
.
ندن سنه بو قدر درد و غصه لر یتشوب؟
نه بیر گونوز نه گجه استراحت ایلموسن
.
آنا ندن منی بو گونلر آز دانیشدیروسان؟
و حال آنکه همیشه محبت ایلموسن
.
دئ دردیوی منه ، قربان اولوم نفسلریوه
همیشه سن منی مرهون منت ایلموسن
.
اوشاقدا اولسام اگر ، زینبم سنون قیزیوام
اوزون منی بیله دارای قدرت ایلموسن
.
محال سنله گچن گونلریم چخار یاددان
بو آز زماندا منه چوخ عنایت ایلموسن
.
نه قدر عاطفه وار سنده ای حمیده سیر
بو خانوادیه دائم عطوفت ایلموسن
.
آتام گلنده ایوه ، سیلموسن سرشگیوی سن
آخوب گوزون یاشی هر دم که خلوت ایلموسن
.
نه بیر بو مدتی تکلیف ایتموسن باباما
نه بیر علینی اوزوندن خجالت ایلموسن
.
نه قدر ضیق معاش آرتروب فشار سنه
نه بیر گلایه آنا نه شکایت ایلموسن
.
نه وار حسینه باخاندا آخور گوزون یاشی؟
او باخمادان منه مین غم حکایت ایلموسن
.
نولوبدی جدیمزون گتموسن زیارتینه؟
همیشه بو غم ایوینده اقامت ایلموسن
.
اگر چه اوستیوه داغلارجا غصه لر توکلوب
گینه وقاروی حفظ و حراست ایلموسن
.
صغیر سنیله چوخ گورموشم بو ایوده آنا
خیال راحتیله سن عبادت ایلموسن
.
و لیک ایتمه موسن بیر ئولوم تقاضاسی
نه اولسا امر الهی اطاعت ایلموسن
.
ولی بو گونلری عجل وفاتی سویلماقون
نه سردور؟ منی بی صبر و طاقت ایلموسن
.
جوانلوقوندا ئولوم آرزوسی ایلورسن
یقین که دعوت حقدن اجابت ایلموسن
.
معاینه گورورم مسجد پیمبرده
اوزون یارالی ، علیدن حمایت ایلموسن
.
ابی قحافه نون اوغلون گورنده منبرده
لسان حقیله آغاز صحبت ایلموسن
.
دلیل حقیوون اثباتنه او مجلسده
تمام آیه ارثی قرائت ایلموسن
.
فدک قضیه سین عنوان ایدوب ، شهامتیله
او پیر جاهله اتمام حجت ایلموسن
.
ندور وراثتی داودیله سلیمانون
همان قضیه ارثه اشارت ایلموسن
.
و یا ندور ذکریا اونون موالیسی
کلام لم یزلیله شهادت ایلموسن
.
او اودلی خطبه که مسجده ایتموسن ایراد
کلام اهلینی محو فصاحت ایلموسن
.
خیال ایدوب اشیدنلر که مصطفی دانشور
او گرم لهجه دن اخذ وراثت ایلموسن
.
هوای نفسیله بو سوزلری دانشماموسان
حقایقی دیماقا قصد قربت ایلموسن
.
مع الاسف که اثر قویمیوب نه قدر آنا
او قوم باطله پند و نصیحت ایلموسن
.
اولار که اوردا دانشدون باخاندا اهل کمال
گورر که یاخشی ادای رسالت ایلموسن
.
مخاطب ایتدون او پیغمبرین یرین دوتانی
دئدون خلیفه بویوک بیر خیانت ایلموسن
.
خیال ایلمه آلدون عم اوغلومون حقین
ولی حقه نه بیر تک جسارت ایلموسن
.
او حق دالینجه بو حق بین گوزیله ، من گوردوم
نقدر حقلری پامال غفلت ایلموسن
.
فدک قضیه سی یا اخذ بیعت عنوانی
اولوب مقدر ، غصب خلافت ایلموسن
.
نه باخموسان ندی ثقلینه امر پیمبر
نه اهل بیت ، نه قرآن رعایت ایلموسن
.
پبمبرین دلیجه جعل لا نوَّرثیله
خلیفه ، دین الهیده بدعت ایلموسن
.
علینی حق مسلمدن ایتموسن محروم
عجب بو باره ده روشن قضاوت ایلموسن
.
عم اوغلومون قلجیله بو دین اولوب قائم
دئ هانسی غزوده سن بیر رشادت ایلموسن؟
.
علی برائتی کفاره مکه ده اوخیوب
سبب ندور که سن اوندان برائت ایلموسن
.
او کعبه دن آتوب اصنام شرک و آلهه نی
همان او بت لره سن عرض حاجت ایلموسن
.
منیم آتامدی سیزی قورتاران جهالتدن
او نور حقیله سن ترک ظلمت ایلموسن
.
بیزه مودتی اجر ایلیوب رسالتینه
اودور که سن بیزه عالی مودت ایلموسن
.
ستمله خانه نشین ایتموسن یداللهی
بو ظلم محضدی گور یا عدالت ایلموسن؟
.
خلیفه هر ایکی دنیا ایوین اولا آباد
حریم عصمته سن یاخشی حرمت ایلموسن؟
.
سنه نه فایده مین یول دئسن اقیلونی
خلاف مشی مسیر حقیقت ایلموسن
.
نه بیر فدک هامی دنیاده یوخ منیم نظریم
غرض بودور بوله سن ، سن خیانت ایلموسن
.
اماندی ایتمه عزیز عمروی هدر (خوندل)
بس اولمیوب بو قدر فوت فرصت ایلموسن؟
.
علی آدیندا حسینون عزیز نوکرینون
اولوبدی امری ، بو درگاهه خدمت ایلموسن
.
دانیشما سن ندی ، خدمت ندور بو درگاهه
مگر بو ساحته تنزیل رفعت ایلموسن
.
خانمدی فاطمه ، پیغمبرین عزیزه قیزی
همان خانملوقی باعثدی جرئت ایلموسن
.
#فاطمیه_شهادت
#آنا_ندن_غم_و_دردیله_الفت_ایلموسن
#ترکی
.
✍️ #زبدةالاشعار ✍️
.
🆔: @nohe_torki
نظر دهید