تنور خولی
…
مرحوم حاج غلامعلی شعاع
…
آچ گوزون ای نخل دینه سو ویرن قانی اوغول
کوللر اوستونده یاتوب یاندیرما زهرانی اوغول
کربلانی سیر ایدوب نیتک نوایه گلمیشم
دوشمیشم باشون دالینجا مثل سایه گلمیشم
باشیوه باش چکماقا مطبخ سرایه گلمیشم
باشیوین زهرا اولا ایکاش قربانی اوغول
بو باشا حسرت چکر بالین اولا گیسوی حور
کیم گوروب مشکوة نوره یر اولا کنج تنور
رشک آپارسا بو یره واردور یری وادی طور
طور سینانی بو نور ایتمیشدی نورانی اوغول
کیم سنون تک باش ره جاناندا شاباش ایلدی
موسی عمران ید بیضا سنی فاش ایلدی
طور سینادن باشون بو مطبخی باش ایلدی
بو باشین نوری قویوب حیرتده موسانی اوغول
قویما یانسون آتش حسرتده دل نار غمه
ناز ایدوب گوزیاشیمی نازونله دوندرمه یَمه
یاتما بیله کوللر اوسته گل یارالی سینمه
شاد قیل لطفونله بو محزون نالانی اوغول
نه روا یاتسون کول اوسته مطلع انوار حق
منزل ایتسون مطبخی گنجینۀ اسرار حق
بولموری خولی مگر سنسن ایدن اظهار حق
یا ایشتموب قصّه جانسوز یحیانی اوغول
چوخ محقّردور یرون ای کوکب صبح ازل
آیۀ الله نور سنسن عالمده مثل
آتش ظلمی ایدوب حقّونده خولی مشتعل
یاندیروب بو نار غمله قلب طاهانی اوغول
چوللره سالدون غمونده بو محن آوارهسین
غملرون یاندوردی زهرانون دل صدپارهسین
قارداشون جدّون آنان اوپدی بوغازون یارهسین
لرزیه نالم گتوردی عرش اعلانی اوغول
نعشون اوسته باش آچوب ای وای اوغولوای چوخ دیدیم
اوپماقا بیر عضو سالم پیکرونده یوخ دیدیم
قلبوین پیکان یرین اوپدوقجه یاندیم اوخ دیدیم
چرخ چارمده گتوردیم درده عیسانی اوغول
وار یری آهیم شرر بوکون امکانه سالا
چون قولوم قاخماز منیم دشمن ووران گوندن بالا
یوخسا قویمازدیم یوزی قویلی سنون نعشون قالا
دوندرردیم آرخان اوسته من اوغول جانی اوغول
گلستان عشقده سولمیشدی گوردوم گُللرون
نطقدن دوشمیشدی جور خاردن بلبللرون
اودلانوب قلبیم گورنده یوخ بیلکده اللرون
کسدی هانسی اهرمن دست سلیمانی اوغول
بوردا آلدی صبریمی دلدن بو رأس انورون
اوردا یاندیردی یانان قلبیمی باشسیز پیکرون
بارماقون بجدل کسوب غارت ایدوب انگشترون
حشرهدین آغلار قویوب بو دیده گریانی اوغول
قتلگاه کربلا بنزر پوزولموش گلشنه
ئولدی یار و یاورون ال تاپدی اهریمن سنه
دورتمین اوخلی کوینگونده غارت اولدی دشمنه
قویدی عور اعدا او جسم قانه غلطانی اوغول
آل سفیانین اوغول ظلمی کچوب اندازهدن
لالهتک بو داغلی قلبیم داغلانوبدور تازهدن
پیکرون قرآن کیمی گوردوم چیخوب شیرازهدن
گوییا اوراق ایدوبلر یرده قرآنی اوغول
بو «شعاع» بحر گُنهده غرقدور حیران قالوب
چارهدن آخر اولوب بیچاره غم صبرین آلوب
چون سیهرو کلب اوزونی بو نمکزاره سالوب
ایسته حق بوینوندان آچسون قید عصیانی اوغول
#سبک_زینبم_جان_اوستیم ( 4 سبک )
#تنورخولی_شام_غریبان
#آچ_گوزون_ای_نخل_دینه_سو_ویرن_قانی_اوغول
#شعاع_تبریزی
#ترکی
نظر دهید