شهادت حضرت فاطمه زهرا (س)
.
.
حاج ناصر تبسمی اردبیلی
.
.
افول ایدوب ستارۀ بلند بخت فاطمه
سالوب یتیم اوشاقلارین اورکلرین تلاطمه
.
.
آلوب آرایه فاطمه جنازه سین اوشاقلاری
مثال رنگ کهربا اولوب صولان دوداقلاری
ملائکان عرشدی یاسا گَلَن قوناقلاری
ایکی یتیمه قیزلاری گیوب سیاه جامه سین
وفالی مجتبی اَلَه آلوب یاشیل عمامه سین
.
.
بو رسم واردی دهرده آنا اولنده هر زمان
قوراللا یاس قیزلاری اولار مثال نوحه خوان
شیرین دیلیله اوخشیوب ایدلّه ناله و فغان
گلور نوایه قیزلاری توکر عُذاره گوز یاشین
اوجا سسیله آغلیور گوزنده نازلی قارداشین
.
.
آنا ئولوبدی دورد اوشاق باخاردی جسم نازینه
ویراردی بوسه زینبی آناسینون بوغازینه
بیری آتاردی گه الین نهانی جا نمازینه
بریی دیردی دهرده مرامه چاتمیان نه نه
یات ایندی استراحت ایت دویونجا یاتمیان نه نه
.
.
بیری دوروب قاچاردی تئز آناسینون اطاقینه
گلردی گوئیا سسی دوباره دن قولاقینه
گیدردی سُرعتیله تئز او با وفا سُراقینه
چکردی صف غم اوخلاری دگردی دیده مشکینه
یولوب توکردی زلفینی بَلَردی سیل اشکینه
.
.
ببری او قدری آغلادی گیدوب توان و تابدن
آخوبدی بوینی چگنینه یاتوبدی التهابدن
نگوردی بلمورم بالا آیلدی فوری خوابدن
اوزین آتوبدی زینبون شتابیله قوجاقینه
دیدی هایاندادور آنام دورون گیدک سراقینه
.
.
چکوبدی ضجّه سسلدی آنام هایاندا بس باجی
نیه سسیمه ویرمیور آنا دینده سس باجی
سسی گلنده روحیمه ویرردی چوخ هوس باجی
خیال ایدردوم عمریده منی چوخ ایستیور آنام
رضا دگلدی غملره اورگدن اودلانوب یانام
.
.
گلوبدی شور و آهیله نوایه زینب آغلیور
دیور یانقلی اوخشاما دل جهانی داغلیور
حسینه دوشجگین گوزی دوروب اونی قوجاقلیور
یوزین قویور جمالینه دیور عزیزیم آغلاما
گوزون فداسی دردوی بیور عزیزیم آغلاما
.
.
وصیّت ایلیوب آنام گرامی ساخلیام سنی
دیوبدی بر یانقلی سوز او سوز چوخ آغلادور منی
گوروم خزانه دونمسون جهاندا عمر گلشنی
باجی دینده جان دیوم آنام بالاسی قارداشیم
اولا حصول نیّتی آنام رضاسی قارداشیم
.
.
دیردی بعضی قصّه لر آنام منه اولاندا تک
منی سالار ایاقدن قیزیم قضیّۀ فدک
حسین یتیم اولان زمان مرامینه چاتار فلک
سپاه درد و غم گلور قزیم سنون سراقوه
نفاقی آز زمانده سالالار اتفاقوه
.
.
سنون باشوندا زینبیم مصیبت اشدّ وار
قدم قدم حسینمون یولندا جزر و مدّ وار
یانیندا بیر قابورقاسی سینان خمیده قدّ وار
ویرالا کربلاده اود یانار خیام طاهرات
جفا اودیلا شعله ور اولار ستون کاینات
.
.
ستاره گان برج غم چیخوب هامی مداردن
فلک او گون سوا ایدور وفالی یاری یاردن
وزیری شرمسار ایدر سو اوسته شهریاردن
گورنده بی کمک سنی او وحشیان اولار جری
الولانار بیر عدّه نون باشندا قاره معجری
.
.
سپر قرار ویر قیزیم همان زماندا سینه وی
مساعد ایتموشم سنون بلالره زمینه وی
شکایته دیل آچما گر آپارسالار خزینه وی
یاناندا خیمه لر فقط فراره یول آچون بالا
دوتون یتیمه قیزلارون الین چوله قاچون بالا
.
.
غم ایتمه غملو سینمون جهاندا غم جوانه سی
نه اولدی ثانینون مگر الینده کی بهانه سی
یوزیمه سیلینی ویروب هنوز وار نشانه سی
منیمده گتّدی غارته جهاندا مال و مکنتیم
او گیر داریده گینه اولار سنیله شرکتیم
.
.
اولار او قیزلار ایچره بیر سه ساله نازنین بالا
گلنده سیل ابتلا چتین قویا قدم دالا
باخاندا گوزلری گرک منی خیالوه سالا
قولاقدن چیخارت ولی اولده گوشواره سین
چیخارتسا دشمن آرتیرار اورکده غملی یاره سین
.
.
اوزوم او گیر دارده سنیله باهم آغلارام
او سرو قدّوی سنون ایدر جفا خم آغلارام
قبار اولان ایاقلارا قویاندا مرهم آغلارام
بیلرسن اوندا فاطمه اورکده چوخ وفاسی وار
محبّت عالمین گزن بیلر نیجه صفاسی وار
.
.
بتول قبرینون بیزه ویرن کی یوخ نشانه سین
هایاندا دفن اولوب دیر بیر عدّه آستانه سین
بیر عدّه ده بقیعده توکر سرشک دانه سین
مزارینون یرین بولن گوزل بالاسی وار اونون
او قبرون اوسته آغلاسون «صفا» صفاسی وار اونون
.
.
#فاطمیه #تبسمی #فاطمیه_شهادت #ترکی #زبدةالاشعار
نظر دهید