انقلاب کربلا قرآن و دین احیاسیدور #حسینیه_تائب_تبریزی

#پیام_نهضت_کربلا
..
..
مرحوم تائب تبریزی
..
..
انقلاب کربلا قرآن و دین احیاسیدور
عزّت قرآن حسینین سرّ عاشوراسیدور
..
..
فاطمه اوغلی گوروب سفیانیان بد سیر
یر یوزونده ظلمیله ایجاد ایدوبلر شور و شر
ایستدی بو قیدیدن آزاد اولا نوع بشر
بیر قیام ایتدی که عاشورا اونون معناسیدور
..
..
گوستروب ظلمین قباقینده گوزل ایستادگی
عدل و انسانیّته ویردی نشان دلدادگی
قوزادی بیر پرچم آزادی و آزادگی
لفظ آزادی اونون مفهوم لایحفاسیدور
..
..
باشدا یتمیش بیر مجاهد مرد با تدبیرلر
بیشۀ هیجاده هر فردی هنرور شیرلر
شیر دل لر با شهامت صاحب شمشیرلر
ایتدی اعلان عدل و انسانیّتین هواسیدور
..
..
جان نثاران حقیقت پاسداران شرف
اولدولار یوز مین جماعتله او صحراده طرف
دوردولار کفره مقابل چکدیلر مردانه صف
یعنی ایمان اهلینین بو شیوۀ شیواسیدور
..
..
رغبتیله جانلارین قربانیِ دین ایتدیلر
شربت مرگ ایچدیلر احیای آئین ایتدیلر
دینین استقلالینی قانیله تضمین ایتدیلر
اصل دین بو قانلارین تضمین روح افزاسیدور
..
..
شوریله یتمیش ایکی سرمست صهبای الست
جنگ خونین ایتدیلراشراریله چون شیر مست
ویردیلر ایمانیله نیروی کفّاره شکست
زینت تاریخ یتمیش بیر نفر هیجاسیدور
..
..
ویردیلر دنیایه درس مردمِ راد اولماقی
دین یولوندا ئولماقی مسرور دلشاد اولماقی
قید ظلمی قیرماقی دنیاده آزاد اولماقی
بو حسین حرّیّتین مهر جهان آراسیدور
..
..
گوردیلر تضعیف اولوب دین بزم شورا قوردیلار
رأی آلوب تزریق خونه بو سوز اوسته دوردیلار
قان آلوب اوز جانلاریندان جان دینه ویردیلار
دین و قرآنین او قانلار باعث احیاسیدور
..
..
دوشدولار تپراقلارین اوستونده یورقون زخمدار
قانلاریله ایتدیلر کرب و بلانی لاله زار
قیلدیلار دینین خزان دیده گلستانین بهار
گلشن عشق حسینی کربلا صحراسیدور
..
..
دین حسینه آرزودور هم حسین آمال دین
روح قرآن نور ایمان افسر عمّال دین
مقصد و مقصودی حفظ دین و استقلال دین
دینه استقلال اونون احکامینین اجراسیدور
..
..
هانسی ملّت پشت پا ویرسا اوز استقلالینه
کور کورانه دوشر بیگانه لر چنگالینه
هر کس استقلاله خائن اولسا وای احوالینه
ختم چیغمبر بو لفظین آفرین گویاسیدور
..
..
هر نه وار فخر و مباهات و شرافت دینده دور
عزّت دنیا و عقبا بو گوزل آئین ده دور
تا جهان واردور حسینون انقلابی زنده دور
ضامن نهضت او قانیله یازان فتواسیدور
..
..
ماجرای کربلادن «تائب» الهام آلگیلن
حق دانیش، دور حق سوز اوستونده، گوزل نام آلگیلن
صورت و سیماوه رنگ و بوی اسلام آلگیلن
درس حرّیت حسینین شور عاشوراسیدور
..
..
#حسینیه #تائب_تبریزی #حسینیه_مدح #ترکی #زبدةالاشعار