زبانحال جناب لیلا به علی اکبر (ع)
..
..
مرحوم یحیوی اردبیلی
..
..
اوز الونله على گل قبره بو لیلانی آپار
صورا دوغرانماقا اول قامت رعنانی آپار
..
..
ای خانم فاطمه نون سبطی حسینون پسری
ام لیلا گوزلی آل ثقیفون قمری
گل اؤپوم لبلریوی هر ایکی یاقوت لری
حضرت فاطمیه سن او هدایانی آپار
..
..
دایان ای فدیه ی زیبای سبیل قدّوس
نعل نعلینوون آلتیندان ائدیم تپراقی بوس
من سنون باطنی قربانیوم امّا افسوس
دئمک اولماز عوضونده منی قربانی آپار
..
..
قدمون آلتدا یاتوم قوی من افسرده روان
سینم اوستن یئرى اولسون سنه جانیم قربان
آپاروم من ایاقون ردّینی صغرایه نشان
سنده گئت قلبده بو نسگل سوزانی آپار
..
..
اله بیر آینه آل حسنوون آثارینی گور
ورق عشقی اوخی قلبیمون اسرارینی گور
اورگیم بندینه زلفون دولاشان تارینی گور
آناوین دردینی بول تا دل نالانی آپار
..
..
کیپریگون قالخوب انور صورتیوه سایه سالور
شمس رخساریوین عشّاقینی غوغایه سالور
حسنوین طلعتی شعله شب یلدایه سالور
زلفیوی یوزدن آییر ظلمت یلدانی آپار
..
..
سن ایاقون گوتورن وقته دوشور بنده نفس
یئره که قویدون آیاقون تاپیلور منده نفس
سن یئرورسن چکورم منده پراکنده نفس
بالا تئز تئز قدم آت نیمه نفس جانی آپار
..
..
ثمر جانیم عزیزیم سن حیاتیم گلی سن
سیّد هاشمینون منظره ی کاملی سن
هیجده ساله منیم زحمتیمون حاصلی سن
گئت جداله بابا وین وئردیگی فرمانی آپار
..
..
داریوم کاکلیوی رونق اولا گلشنیمه
شانه ریزان توکی گل مثلی یقوم دامنیمه
هوروم اول طرّه لری باغلیوم اوز گردنیمه
شام ویرانه سنه روحیمی زندانی آپار
..
..
اله دسمالیوی آل پاک ائله اشگ تریمی
گورمیوم گئتمگیوی باغلا منیم گوزلریمی
بند أئله خنجریوین قبضه سینه معجریمی
یاره وی باغلاماقا معجر الوانی آپار
..
..
باخ منیم گوزلریمون حوضده فوّاره سینه
دولدورور گور نئجه سو حلقه ی پرگاره سینه
آنانون گوزیاشی درماندور اوغول یاره سینه
شیشیه جمع ائلیوم یاروه درمانی آپار
..
..
أو قدر صبر ائله یاندیم قیدیم خیمیه من
قاپوسین اورتوم اوزی قویلی دوشوم گئت بالا سن
یا یوموم گوزلریمی گورمیوم اگنونده کفن
على اوندان صورا مرگه قد رعنانی آپار
..
..
یریینده بالا سس سیز پری آهسته یری
قولاقیم ایلمه سون درک او صدای گذری
نئجه آیا ائشیدوم یا گوروم ای جان ثمری
قانیوه باتماقا سن زلف سمن سانی آپار
..
..
«یحیوی» شعر ده لازمدی متین اولسون سؤز
آتشین زنده روان مغز نشین اولسون سؤز
بیرده بهت آور و سنگین نمکین اولسون سؤز
یاز بو تعریفده سؤز منصب عرفانی آپار
..
..
#اکبریه #یحیوی_اردبیلی #اکبریه_شهادت #ترکی #زبدةالاشعار
نظر دهید