کوچ از کربلا
زبانحال حضرت زینب (س)
..
..
رضا غلامپور (دلپاک)
..
..
اولموسان پرپر حسینیم بیر گل خندان کیمی
چیخمیسان شیرازه دن شیرازه سیز قرآن کیمی
..
..
وقفدور هر فعل و قولوم امریوین اجراسینا
اولموشام تسلیم ئولونجه عشقیوین فتواسینا
غرق اولاندان زورق جسمون بو قان دریاسینا
گوز یاشیم دائم گوزومده موج ائدیر عمان کیمی
..
..
آگه اولموش قلبیمون اسرارینه تیر فراق
نه موفّق امتحان اولموش سنه بو اتفاق
چون بولوردن گلموسن بو دشت آلامه قوناق
یاتموسان یئرده اودور کی خسته بیر مهمان کیمی
..
..
ترک قیلمازدیم کنارون اولماسیدی جبراً اگر
جبریدن مجبوره دائم محنت اولموش جلوه گر
بو منا هانسی منادور ای شهید حق مگر
کیم بو نوعی دوغرانوبسان دوغرانان قربان کیمی
..
..
چون بولوردم یاتمیسان بو قتلگهده تشنه سن
بیر بولود تک شوره گلدیم فصل آلام و محن
فرصتیمجه متّصل تشنه بوغازون اوسته من
آغلادیم یاغدیردیم اشکی قطره باران کیمی
..
..
نیلموشدون سن مگر بو بی مروّت دشمنه
بولدولر جایز نه دن بو حال غمباری سنه
بیله بولموردوم ولی فاش اولدی بو حالون منه
اول زمان که باغریما باسدیم سنی من جان کیمی
..
..
گرچه اولماز تا جهان وار بو ملاله تای ملال
لیک بیر غم وار منی چوخدان ائدیب غرق خیال
وار یادوندا پشت درده وئردی اوز نه قیل و قال
آغلادیم گورجاق آنامی اوندادا الان کیمی
..
..
تا منه اولدی مهیّا نچّه دم گورماق سنی
گورمدیم بو گورماماق گتدی دله ناگه منی
سسلدوقجا هارداسان یاندیردی ناله م دشمنی
ساغ سولی گزدیم حسین وای دلده سرگردان کیمی
..
..
طور عشقینده مقام ائتدیم او دمکی اشکبار
پرتو انوار حق دیدَمده اولدی آشکار
لن ترانی لفظین ائتدی عکس صاحب اختیار
تا دئدیم ارنی اورکدن موسی عمران کیمی
..
..
هئچ دئمم یول اوستیَم دور ناقیه میندیر منی
یا سریر ابتلادن لطف قیل اندیر منی
باجیوام گر ممکن اولسا گل دیله دیندیر منی
آل شکسته گویلومی بیرده گئچن دوران کیمی
..
..
طالب سرّالیقین رهنمادور مطلبون
ضامن ابقای دیندور بو مقدّس مکتبون
دور نجه گور غرق اولوب بحر بلایه زینبون
بیر درین دریایه قارداش غرق اولان انسان کیمی
..
..
بو وجودون شرح بیر غوغادی پاره پاره سی
چاره سیز قالموش باجین ای چاره سیزلر چاره سی
اللرون بس هانی قارداش گورجاقین بو یاره سی
ائتدی شان شان قلبینی بو پیکر شان شان کیمی
..
..
کیمدور آگه بو ملاله حیّ ذوالمندن سورا
بیر بئله اندوهی دلده کیم چکیب مندن سورا
آندولا اللهَه قارداش زینبه سندن سورا
بو گنیش دونیا اولوبدور تنگ بیر زندان کیمی
..
..
تا گوزوم دوشدی یاریلمیش قلبیوه افغانیله
آشنا ائتدیم سرشکی بسترونده قانیله
سویلدیم دشمن منیمده قلبیمی پیکانیله
کاش آچیردی قلبیوی گل تک آچان پیکان کیمی
..
..
دل گهی غمدن دولانماز محنتین اقرارینه
بیر تالانماخ دردی وار عاجزدی دل اظهارینه
وار بو قدر آیات قرآنین قسم گفتارینه
گورمیوب بیر صحنه عالم صحنه ی تالان کیمی
..
..
آغلا «دلپاک» آغلا شاه بی معینه صبح و شام
اوز دولاندیر کربلایه وئر او سلطانه سلام
بیرده ایسته واقف اسراریدن طبعون مدام
جوشه گلسون قتلگاه ایچره او جوشقون قان کیمی
..
..
#کوچ_کربلا #دلپاک #زبدةالاشعار #ترکی
نظر دهید