کوچ از کربلا
..
..
کربلایی نوید آسال اردبیلی
..
..
بویانوب باشدان ایاقه بدنون قانه حسین
جسموون بنذری وار لالۀ خندانه حسین
..
..
اوخ بولوبدور سینووی کعبۀ عرفان گورونور
کیم بصیر اولسا دییر مخزن ایمان گورونور
بو سوکولمیش سینه ده خالق رحمان گورونور
مسکن اولموش ئورگون حضرت جانانه حسین
..
..
یخا بیلمزدی سنی نیزه و خنجر یاراسی
یا قفادن ویریلان شش پر و نشتر یاراسی
آند اولا حیدره یخدی سنی اکبر یاراسی
او همان غم ایلیوب لیلینی دیوانه حسین
..
..
آلتی قارداشیم ئولوب باشیمه کول توکدی فلک
عزت آیینه می سیندیردی منیم سنگ محک
سنده آتدون منی دنیاده حسینجان نینک
ذات حق یاور اولار من کیمی ویلانه حسین
..
..
قولومی باغلا سا گر قوم عدو حق دییرم
دیمگه حق سوزومی سعی تمام ایلییرم
قیزلارا سیلی اگر ویرسالا من نیلییرم
یوخ اوشاقلاردا توان سیلی عدوانه حسین
..
..
سن منه درس ویروب دهریده چون شیر ایلدون
دیلیمی حق دیمگه تیغۀ شمشیر ایلدون
ایندی بو زینبی عالمده نیه پیر ایلدون
تا منه طعنه ویرا لشکر بیگانه حسین
..
..
هر غمه صبر ایلیوب سسلمدیم اوخ قارداش
سینووی پارچالادی زهریلی بیر اوخ قارداش
اصغری دفن ایله دون دفن ایدنون یوخ قارداش
اف اولا بیر بیله چرخه بیله دورانه حسین
..
..
اسیلوب باد محن گلشنووی پرپر ایدوب
لشکر پست و دنی عالمی بی سرور ایدوب
بو چوخور مقتلی گول پیکرووه بستر ایدوب
یوخدی حرمت ایلین شاه شهیدانه حسین
..
..
من گلن وقته بو صحرایه سپاهیم واریدی
خادم و کلفت و هم عزت و جاهیم واریدی
یوخودی درد و غمیم زلف سیاهیم واریدی
اوخشیور ایندی ساچیم برف زمستانه حسین
..
..
داغیلوب جاه و جلالیم سارالوب گلزاریم
قورخودان برگ خزان مثلی اسور انصاریم
ایت دعا شامه کیمین تاب ایلسون قیزلاریم
قیزلارین هجری سالار روحیمی زندانه حسین
..
..
ابر غمدن باشیما بارش محنت توکولوب
سینم عالمده سینون مثلی محندن سوکولوب
سنی مقتلده گورندن اوجا قدیم بوکولوب
اوخشامور دای بو قدیم سرو خرامانه حسین
..
..
آچدی تقدیر قضا ظلم وستم پنجره سین
ایلدی محو منیم گلشنیمون منظره سین
کسدی ابلیسون الی قارداشیمون حنجره سین
بوکدی گول پیکرووی جامۀ الوانه حسین
..
..
دونن آخشام بیزه سو پایلادی اشرار زمان
دیدۀ پر نمیلن میل ایله دی هامی سودان
ولی اول سو ایله دی غملی ربابی نگران
آغلادی اهل حرم ام پریشانه حسین
..
..
تا سویی ایچدی رباب سو دولانوب اولدی لبن
دیدی اصغر بالا گل ام سودووی یوخدی امن
دردیمون یوخدی دواسی گزورم غرق محن
بیله بیر دردین اولار چاره سی آیا نه حسین
..
..
یوخدی بیر حرمت ایدن عترتوون گوز یاشینا
شیشۀ معرفتی چالدیلا جهلون داشینا
نوعروسون النوب گول یرینه کول باشینا
بو قدر ظلم اولونار هانسی بیر انسانه حسین
..
..
ولی اوز عهدیمون اوستونده حسینجان قالارام
حیدری هیبتیلن عالمه لرزه سالارام
بو قر ا معجریلن قانووی قارداش آلارام
ویرمیشم قول شرف سن کیمی سلطانه حسین
..
..
کوفه و شامه اخا پرچم نصرت ویرارام
طلقا زاده لرین عزتینی سیندیرارام
کاخ خضرانی اورک آهیمیلن یاندیرارام
هامی حیران باخا تا آتش نیرانه حسین
..
..
اللی بش ایل سنه عالمده هوادار اولدوم
یوز ویرنده سنه غم عشقیله غمخوار اولدوم
ایندیده لشکر اسلامه علمدار اولدوم
انبیا ماتیدی بو خدمت شایانه حسین
..
..
مسکن ایتدی بورانی چون شهدا قافله سی
کیدور اما قولی باغلی اسرا قافله سی
یوخ اسیران دیمورم درد و بلا قافله سی
هارا مسکن اولاجاق لشکر نسوانه حسین
..
..
آتاسیز قیزلاریما گوندوزی تار ایتدی عدو
هر قیزا قمچی دگوب سسلدی گل داده عمو
قوناقا قمچی دگر؟ هاردا بیله رسمیدی بو
قدسیان حرمت ایدر سن کیمی مهمانه حسین
..
..
محنتون پیر ایلیوب خواهر غم پروروی
هانسی بی عاطفه غارتده کسوب اللروی
آتلارون دیرناقی پامال ایلیوب پیکرووی
اوخشیور گول بدنون لختلنن قانه حسین
..
ای «نوید» قویما دوشه دامن اخلاصه لکه
آز قالور ذات خدا عرش حقه قاره چکه
آز قالور امر ایلیه حق هامی حور و ملکه
گله لر تا هاموسی ناله و افغانه حسین
..
..
نظر دهید