شهادت حضرت علی اکبر علیه اسلام
.
.
محمد رضا صادقی
.
.
او دم کی دوشدی آت اوستن یره شبیه نبی
حزین سسیله دییوب درک ایله بالاوی ابی
.
او قان اولان گوزیلن خیمه گاهه بیر باخدی
بیر آه چکدی اورکدن او گوزلری آخدی
.
دوزولدی زلفنه قان ختم ویردی سوزلرینه
یواش یواش سوزولوب پرده چکدی گوزلرینه
.
اودم گلوب آتاسی قلبیدن چکوب بیر آه
باخوبدی عرشه طرف عرض ایدوبدی یاالله
.
حضور اقدسیوه تحفه دور علی جانی
قبول ایله دئدی یا رب بو تشنه قربانی
.
اوزون گواه اول الهی شبیه طاهانی
ستمله سالدیلار آتدان آخور قیزل قانی
.
توکوبدی گوز یاشنی بیر دویونجا آغلاشدی
باسوبدی باغرینا اول نعشی بیر قوجا قلاشدی
.
دیدی ندن باشوی سالموسان اشاقه اوغول
آتان گلوبدی سلام ایله دور ایاقه اوغول
.
آیردی هانسی دنی سن کیمی جوانی بالا
منیم کیمی گیده الدن اونون جوانی بالا
.
هاچان چخادمشدون یادیدن اوغول ادبی
دانشموسان منیلن بس ندور علی سببی
.
نقدر سسلدی آچموب گوروب اوغول گوزینی
اورکدن آغلادی گویا بئله دییوب سوزینی
.
دئمه آتاندور آلوب آخرین سلامی گلوب
گوز آچ بو کرب و بلانون غریب امامی گلوب
.
دوباره آغلادی آغلاتدی قوم اشراری
چاغوردی محضرینه قارداشی علمداری
.
بالام ئولوبدی ابوالفضل دوشوبدی طاقتدن
امان او منقذ الیندن امان شمادتدن
.
گلنده من باشینون اوسته سعدین اوغلی گلوب
آچوبدی نحس دیلین اوخ کیمی بو قلبی دلوب
.
دیوبدی یادیوه سال نوجوان زمانلارینی
اشارئیله منه گورسدوب جوانلارینی
.
دییوبدی یَابْنَ اَبی گوز یاشین توکوبدی ، اسف
کمک لیق ایله ائداخ حمل خیمه گاهه طرف
.
اورکلنوب گینه توکدی عذارینه اشکین
آچوب عبانی یره یغدی اکبرین نعشین
.
قویوبلا مرکبین اوسته اودوغرانان بدنی
امامه آرخادوروب قارداشی اودم علنی
.
نیه دوتوبدی بیوک سرّی وار بولردی اوگون
یاپیشماسیدی الیندن امام ئولردی اوگون
.
یاناردی هر ایکیسی اکبرون فراقینده
قویوبلار اول بدنی خیمه لر قباقینده
.
ویروب خبر اوزمان اهل بیت طاهایه
یتوب ئولوم خبری خیمه سینده لیلایه
.
بالام ئولوبدی باجی گیت گتور علی آناسین
ئولونجه بیرده گورنمز او بینوا بالاسین
.
نه نوعیلن گتوروبلر یوخوندی حتمی خبر
ئولنده «صادقی» سندن قالار بو سوزلر اثر
.
گر اولسا مجلس ماتمده چشم گریانین
دوتاندا قبریده منکر سنون گریبانین
.
بسوندی گر دئسه شهزاده شاعریمدی منیم
گیدوبدی کرب و بلایه بو زائریمدی منیم
.
#اکبریه_شهادت
#او_دم_کی_دوشدی_آت_اوستن_یره_شبیه_نبی
#محمدرضاصادقی
#ترکی
#زبدةالاشعار
نظر دهید