او قانلو زلفوی یل دوندروب او یوز بو یوزه #راه_شام_عابد_تبریزی

راه شام
زبانحال حضرت لیلا سلام الله علیها
.
.
.
مرحوم عابد تبریزی
.
.
او قانلو زلفوی یل دوندروب او یوز بو یوزه
نولور که بیرده دگه، ای اوغول، او یوز بو یوزه
.
گهی اوزون گجه لرده چکردی نالۀ زار
دئردی بخت سیاهیمدی بو و یا شب تار؟
.
باتوب قرایه منیم تک بو غم فزا گجه لر
نه مهر و ماهه دوتوب بیلمورم عزا گجه لر
.
ستاره دن آخیدور صبحه دین سرشگ مگر
بیر آفتاب رخندن اولوب جدا گجه لر
.
جداده حسن علی اکبره، عجب بنزر
گلور گوزه، مه تابان چوخ آشنا گجه لر
.
بو زار گوگلومه مرغ سحر، هم افغان دور
چکر او ناله سحرلر، گوگل نوا گجه لر
.
نه خواب غفلت آلور چشم ساربانی که هیچ
آیولموری نه قدر ایلرم صدا گجه لر
.
نه منزله یتشور کاروان نه صبح آچلور
نه قاره گونلره سالدی منی قرا گجه لر
.
ایاق یالین باشی بلالی، اولدوم ای فلک، اولدوم
نه دردمند گونوزلر نه مبتلا گجه لر
.
هجوم ایدر دله هر لحظه مین بلا گجه لر
نه سختیدور گذر عمر ای خدا گجه لر
.
ستاره دن گویه صف النعال غم دوزولوب
دوتوب منیم گونومه گوئیا عزا گجه لر
.
منی کدورته غرق ایلوری ظلامندن
کدردن اولمیا یارب گوروم جدا گجه لر
.
نقدر آختارورام صبحدن اثر یوخدور
اولوبدی یوخسا شب حشره آشنا گجه لر
.
دوشوب صداده اثردن نقدر سسلنورم
جواب یوخدی ویرن چون یاتار صدا گجه لر
.
عمیق ظلمتیله یاردی باغریمی یارب
منیم گونومدن آلوبدور نشان قرا گجه لر
.
چراغ اولا گوره گوز، موج زلف شبرنگون
شرر سپهره سپر، آه شعله زا گجه لر
.
گونوزلر آیت واللیل دور سر زلفون
نجه که حسنون ایدر شرح والضحی گجه لر
.
یاتوبدی قافله نجوایه یاخشی فرصتدور
گوزلدی درد دل ایتسون آنا بالا گجه لر
.
گلیر خیاله گئچن گونلریم که همدمیدی
صباح اولونجا سنیله بو بینوا گجه لر
.
نقدر صبحه کیمی یاتمادیم یاتا راحت
او چشم مست فریبای دلربا گجه لر
.
سکوت، دشت و دری ایلیوب احاطه، فقط
باجون سکینه دی لیلایه همنوا گجه لر
.
من آغلارام او یانار، وای اوغولدی وای قارداش
سپهره اوج ایلین شیون و بکا گجه لر
.
ایکی بیانیله اوخشار سنی ایکی بیکس
آنان دیر وای اوغولوای، او وا اخا گجه لر
.
باجون ایله دولانار باشوا سنون گویا
طواف ایلوری مه دورینه سها گجه لر
.
نولور عنایتیله قلبین ایلسن روشن
که ماهه مهر وئرر پرتو و ضیا گجه لر
.
نولوردی عمرلرین گونلری یتیدی باشا
یتیشمز ایندیکی باشه بو غم فزا گجه لر
.
گونوزلرین غمی هر چند بی نهایتدور
فزون اولور غم و اندوه ، گوئیا گجه لر
.
ایله یانیر گجه گوندوز غمونده دل، بولمم
گونوز فشار مصیبت فزوندی یا گجه لر؟
.
دلیم دولانموری بیر اوزگه گفتگویه، گهی
علی علی دییرم گه خدا خدا گجه لر
.
نقدر سختدی شام فراق من بولورم
بو درده اولمیا بیر کیمسه مبتلا گجه لر
.
سپیده آختارورام گورماقا یوزون، آناوی
هلاک قویمور ایده غصه بو رجا گجه لر
.
گجه قرانلوقینی دل سوور، که هر طرفه
گورر باخاندا قرا زلفوی قرا گجه لر
.
سپردی باشوه بیر گون گل و شکوفه ولی
غباری زینت ایدر زلفوه صبا گجه لر
.
بو شعره مایه «شکوهیدن» اولدی کیم یازمیش
بو یرده بیر نچه شعری ردیف اونا گجه لر
.
ایکی رفیق ویروب دم بو شعرلر یازیلوب
اولوب ردیفیده بر وجه اقتضا گجه لر
.
بیری «علی» بیری «فیروز» اولار که لطفیله
ویروله محفلینه «عابدین» صفا گجه لر
.
حسین صحبتی دللرده واردی حشره کیمی
گونوزلرین گله جاقدور دالینجا تا گجه لر
.

#راه_شام
#او_قانلو_زلفوی_یل_دوندروب_او_یوز_بو_یوزه
#باتوب_قرایه_منیم_تک_بو_غم_فزا_گجه_لر
#عابد_تبریزی
#ترکی
#زبدةالاشعار