شهادت حضرت امیرالمؤمنین(ع)
.
.
.
مرحوم عابد تبریزی
.
اساس استوار دین او موقعده خراب اولدی
که طاعتگاه یزدان قتلگاه بوتراب اولدی
.
.
هوس حسنیله با هم مجلس شور ائیلییب برپا
حقیقت حکم قتلین ائیلدی تصویب بو شورا
هوای نفس حِسّ انتقامه اولدی هم آوا
غرایز طرز استدلالینه منطق مُجاب اولدی
.
.
جمال آئینه سیندن وئردی باش بیر برق عالم سوز
که قهراً تیغ زهرآگین ظلمی ائتدی برق افروز
ایکی برق اصطکاکندن عیان اولدی ائله بیر سوز
که داغ التهابیندن دل عالم کباب اولدی
.
.
غلط تشخیص اولوب گوردی جدال حقّه آماده
بنام دین اساس دینی وئرسین ایستیری باده
نوید وصل دامن ویردی سوز نار الحاده
جهان شرع و دین بو شعله دن پر التهاب اولدی
.
.
کرشمه نازه ال وئردی ایاقدان سالدی ادراکی
جری تر ائتدی قان توکما قلیقا بیر فرد سفاکُی
گوزونده جلوه لندیردی بو تصمیم خطرناکی
اولوب تردید زایل دلده، آرامش شتاب اولدی
.
.
ترحّم عشقله ترکیب اولوب سالسین شرر جانه
دوزولدی گوهر شفّاف اشک دیده مژگانه
اولوب تسکین اوچون دست هوس گیسویه تا شانه
جهان تار سر گیسو کیمی پر اضطراب اولدی
.
.
فروغ شمع پرابهام ائدیب خلوتگه رازی
ائدردی جلوه گر مقبول تر دلدار طنّازی
عوامل دلده کی گیزلین عواطفله ائدیب بازی
گوروب سوز و گداز شمعی قلبی یاندی آب اولدی
.
.
مفصّل بحث اولوب انجام امرین افتخاریندن
زغن اوج همایه تاپدی یول شاهین شکاریندن
حکایتلر اولوندی وصل، شیرین روزگاریندن
کونول بی طاقت و آرامیدی بی صبر و تاب اولدی
.
.
گئجه سیر ائیلدی آرام سرحدّ سحرگاهه
یاخونلاشدی سپیلسین گرد نقره انجم و ماهه
لوای نور ساچدی صبح صادق سبز خرگاهه
حقیقت بین گؤزه هنگام ترک فیض خواب اولدی
.
.
علی معنای ایمان مظهر دین آیت رحمت
ائدیب قرآن فجره فجرده اخلاصله نیّت
جماعت کثرتینده دلده قوردی مجلس وحدت
حریم قرب اوجینده پرافشان چون عقاب اولدی
.
.
صفوف اولدی منظّم قصد انجام نمازیله
فضای مسجد کوفه دولوب راز و نیازیله
دییوب هر مقتدی وَجَّهتٌ وَجهی سوز و سازیله
ادای دینیله جویای اجر اولدی ثواب اولدی
.
.
دییوب تکبیر، ائدن آوازۀ تکبیری عالمگیر
دل ذرّات کونه سالدی شور و جذبه بو تکبیر
ائله نفس عوالمده ائدیب بانگ علی تأثیر
که هم آواز اونیله عرش و فرش و نه قباب اولدی
.
.
قیامیله رکوعی وئردی اخلاصیله پایانه
قویوبدور سجده گهده باش حریم قرب جانانه
یاخونلاشدی خلل یئتسین نظام کون و امکانه
فلق انواری چشم فجرده سرب مذاب اولدی
.
.
علی درک ائیلیوب فیض لقای قرب جانانی
آتوب گوزدن به کلّی جلوۀ دنیای امکانی
همان حالتده که حسّ ائیلمزدی نزع پیکانی
لقای یار شوقندن گوزی رشگ سحاب اولدی
.
.
باشی اوستونده قاتل الده عریان تیغ خون پالا
مجسّم گوزده بزم وصل جانان باشدا مین سودا
نظرده عهد کعبه قول قتل حجّت یکتا
مهیّای قتال پادشاه مستطاب اولدی
.
.
علی باش قوزایاندا سجده دن چشم پر آبیله
یاریب موج فضانی تیغ کینه چوخ شتابیله
تصادم ائیلدی فرق شه مالک رقابیله
شفقدن رنگ آلیب شمس هدا حسنی خضاب اولدی
.
.
هوس تجهیز ائدیب بیلمم نئجه اول نفس گمراهی
ایاقدان سالدی بیر ضربتله نفس قدرت الهی
شفق رنگ ائیلدی آئینۀ چهر سحرگاهی
فلکده اشگ غمدن دیدۀ انجم پرآب اولدی
.
.
کف محرابه نقش هیکل توحید نقش اولدی
جمالی قانیله رنگ آلدی گول تک زهریله سولدی
فروغ حقّی بی پرده گؤرن گؤز قانیله دولدی
هدایت شمسی مدلول توارت بالحجاب اولدی
.
.
آچیب دور بیر بهشتی گول حجازین گلستانینده
ولیکن اولمادی ادراک لازم باغبانینده
سموم برگ ریزان اسدی دنیایه خزانینیده
بو گل ظلمیله سولدی گلستان دین خراب اولدی
.
.
جهالتله عرب ظاهرده بیر انسانی اؤلدوردی
ولی باطنده روح عالم امکانی اؤلدوردی
حقیقتده علینی اؤلدورن دونیانی اؤلدوردی
جهان آدمیّت بو مصیبتده مُصاب اولدی
.
.
طلوع فجرده تار اولدی دین حقّ دنیاسی
جهانی چولقادی ظلماته کفرین لیل یلداسی
اوجالدی ناگهان فُزتُ بِرَبِّ الکَعبَه آواسی
جهان بولدی علی بو ضربتیله کامیاب اولدی
.
.
حوادث سنگبارانینده مرآت صفا سیندی
بلا هنگامه سینده رونق نجم السّما سیندی
مرادی ضرب شمشیریندن ارکان هدا سیندی
نهیب کفردن حصن حصین دین خراب اولدی
.
.
تراب تیره اوسته خسرو خیبر گشا دوشدی
اوزی قانیله گلگون فرقده کاری یارا دوشدی
خیاله بو تجسّمدن شهید کربلا دوشدی
روان رخساره گؤزدن سیل غم تک اشگناب اولدی
.
.
علی بیر یاره دن رنجوریدی محراب طاعتده
حسینین جسمی امّا غرقیدی سانسیز جراحتده
تفاوت بی نهایتدور بو حالتله او حالتده
اگرچه هر ایکی موقفده ظلم بی حساب اولدی
.
.
قیاس اولماز بلای کربلایه هر بلا اولسا
ائدر نفس بلاده ناله، بحث کربلا اولسا
بلی واضح گؤرر هر گؤزده نور اولسا ضیا اولسا
جهاندا هر بلا کرب و بلادن اکتساب اولدی
.
.
اَیا صاحب زمان ای افتخار دودۀ طاها
قرارون سلب ائدر بیللم اورکدن لفظ عاشورا
اوزون آگاهسن اولدی او گونده محشر کبری
حسین اؤلدی ستمله نقض احکام کتاب اولدی
.
.
چیخیب شیرازه دن مجموعۀ رحمت او غوغاده
اولوب اوراق گول تک منتشر دامان صحراده
وفا و عدل صیتی نشر اولا اقطار دنیاده
حقیقت لفظینه مفهوم اولان نقش تراب اولدی
.
.
اولوب پاگیر درد پا سنه هر چند غربتده
شفا واردور بیلیرسن صحبت شاه ولایتده
بیان خطّۀ تبریز لازمدور بو صحبتده
دئمه «عابد» سنه عقداللّسان وضع «سراب» اولدی
.
.
#حیدریه
#حیدریه_شهادت
#اساس_استوار_دین_او_موقعده_خراب_اولدی
#عابد_تبریزی
#ترکی
#زبدةالاشعار
نظر دهید