زبانحال حضرت لیلا (س) در وداع حضرت علی اکبر(ع)
.
.
.
حاج احمد احمدی (جوان)
.
.
اکبریم ای گلعذاریم صبر ایله میدانه گیتمه
گیتدى الدن اختیاریم دوندی باغریم قانه گیتمه
.
.
آغلاما ای سرو نازیم توکمه گوزیاشون عذاره
پاک ایدم گل گوزلروندن گوز یاشون ای ماهپاره
گیتمه میشدن کارزاره باشیمه گل باغلا قاره
سندن اولسون یادگاریم موسم هجرانه گیتمه
.
.
بو بلالی چولده اوغلوم باشیوون واردور بلاسی
باشیوه قوی بیر دولانیم ای طریق حق فداسی
لیلینین سنسیز سمایه اوج ایدر آه و نواسی
ای منیم شأن و وقاریم یوسفیم کنعانه گیتمه
.
.
گلشن عمریمده اکبر سن کیمی گل بسلدیم من
سسلین وقته همیشه جان دیوب جان سسلدیم من
بو بلالی چولده افسوس بو زمان بی کسلدیم من
رحم ایله ای غمگساریم بو دل سوزانه گیتمه
.
.
سن منیم بو چولده اوغلوم عزّتیم سن شوکتیم سن
افتخار و هم وقاریم مکنتیم سن دولتیم سن
نا امید ایتمه امیدیم روح عشق و عزّتیم سن
ای منیم دار و نداریم اود وروب بو جانه گیتمه
.
.
پر ورار پروانه دائم باشینه شمعین دولانی
گیتمه بیر لحظه دایان دور صبر ایله ای مهر کانی
رسمدور باشه دولانماق قیترر درد و بلانی
قوی دولانسون آی نگاریم باشیوه پروانه گیتمه
.
.
گیتمه ای شمع امیدیم باشیوه لیلا دولانسون
اولما راضی بو بلالی آتش هجرانه یانسون
آغلیوم گوز یاشمیلن سن گیدن یولّار سولانسون
نار غملن قلب زاریم آز قالور اودلانه گیتمه
.
.
گلشن عمریمده اکبر باطراوت نوبریم سن
بیر کسیم یوخدور جهاندا سن منیم تک یاوریم سن
آسمان عزّتیمدنه بیر ایشقلی اختریم سن
ای مه گردون مداریم پردۀ پنهانه گیتمه
.
.
شیشۀ عمریم بو چولده حیف اولا داشه چالندی
آیریلیق طرحی چکیلدی دلدن آرامیم آلیندی
بستر عزّت یغلدی بستر محنت سالیندی
وای علی اولدی شعاریم اف بیله دورانه گیتمه
.
.
هر قدر دنیاده عمریم اولسا سینه داغلارام من
صفحۀ رخساره اشک درد و محنت باغلارام من
بوینی چگنینده اوتورّام اوخشارام من آغلارام من
ای دلیمده اصطباریم دل دونوب آلقانه گیتمه
.
.
ای اولان حسن جمالی مثل یوسف بی قرینه
انتظار مقدمونده خیمه ده ماه مدینه
ایستدی بو سون نفسدہ قول بویون اولسون سکینه
وار منیمله انتظاریم یانماسون هجرانه گیتمه
.
.
ای جوان ماه طلعت ای فدای دین و قرآن
بو «جوان» و «خوندل» اولسون سن کیمی قربانه قربان
سویلروح لیلا دلیجه بو سوزی با چشم گریان
ای منیم دار و نداریم صبر ایله میدانه گیتمه
.
.
#اکبریه #احمدی_جوان #ترکی #زبدةالاشعار #اکبریه_شهادت
نظر دهید