اگر چه اسم حسین زینت منابردور #باقریه_سعدی_زمان

احوالات حضرت امام باقر علیه السلام
#گریز #سجادیه (ع) #خرابه_شام
.
.
.
مرحوم حسینی سعدی زمان
.
اگرچه اسم حسین زینت منابردور
توسّلیمده نظر لیک امام باقردور
.
بویوردی جابره بیر گون رسول عالمیان
سنه چوخ عمر یازوب حیّ قادر سبحان
.
منیم بِشیمجی وصیّیم زمانی سن اولوسان
نه حکم ایلسه مُجرادی، ایت گلن اذعان
.
منیم آدیمدور آدی شهرتی ابی جعفر
علوم شرعی اودور خلقه ایلین اعلان
.
یارا نهنگ کیمی علم دین دریاسین
نهنگ ایدر نجه ذخّار بحریده جولان
.
اودور که باقر علمُ النّبیّ دور لقبی
اونون اَلیله اولور فسخ باطله ادیان
.
همان وصیّیمه مندن سلام قیل ابلاغ
دی جدّیوون سنه واردور سلامی بی پایان
.
خبر ویروبدی پیمبر دولاندی دور دُهور
او آفتاب سپهر وفادن اولدی عیان
.
اوچِ صفرِ سنه ی اَلّی یِتدیِ هجری
قدم بو عالمه قویدی او مظهر یزدان
.
علیحده خبریله اوچِ رجب بو شهین
جمالی گون تک ایدوب چرخِ حُسنیدن لَمَعان
.
آتا آنا طرفیندن یازولّا ذوالحَسَبین
امین وحیدی جدّ کبارینه دربان
.
آناسی فاطمه دور دخت امام حسن
آتاسی سیّد سجّاد شاه کون و مکان
.
بو شوکتیله اوز عصرینده اولدی چوخ مظلوم
آلوبلا حقّین اَلیندن جفائیله دونان
.
بلا چولینده طفولیّتینده اولدی اسیر
دمشقه گیتدی حزین و ملول و ناله کنان
.
بیله روایت ایدر اوغلی حضرت صادق
منیله اولدی آتام بیت کردگاره روان
.
یغوب خلایقی بیت خداده باشیمه من
آتام فضائلین ایلردیم اوردا شرح و بیان
.
واریدی کعبه ده هشّامیده همان گونلر
بُلوب بو مطلبی از بس که سوز تاپوب جَرَیان
.
اولانمادی متعرّض بیزه همان یرده
اورکده ایلدی اوز کینه سین او گون پنهان
.
او گیتدی شامه طرف، بیز مدینیه گَلدوخ
یتیشدی شامه او گیزلین عنادی ایتدی عیان
.
خیال ایدوب بیزی احضار ایلسون شامه
مدینه حاکمینه یازدی بیر سخت فرمان
.
سنه بو نامه یِتن تک محمّدین اوغلین
دمشقه سال یولا تاخیر ایلمه بیر آن
.
منی آتامی دمشقه روان ایدوب والی
دمشقه گیتدوخ، او گیتماقدان آه و داد و امان
.
خبر ویروبدیله هشّامِ شومِ بد سِیره
مدینه دن ایکی مولا گَلوب سنه مهمان
.
بو فکریله که بیزی خوار ایده نظرلرده
اجازه ویرمدی اوچ گون بیزه او بی ایمان
.
بیزی حضورینه دوردومجی گون ایدوب احضار
خراب اولیدی او گون کاش عالم امکان
.
تمام حُزنیله گیتدوخ حضور هشّامه
او بزمیده واریدی هر اَکابر و اعیان
.
نشانه گاهیدی هشّام قصرینون قاباقی
خدنگ آتوردی او آماج گَهده پیر و جوان
.
ولی نشانیه اوخ هیچ بیری وورانموردی
خطا گیدیردی خدنگی واریدی هر اوخ آتان
.
خیال خامیله هشّام امام عصره دیدی
مهارتون وار اگر ویر نشانه گهده نشان
.
بویوردی حضرت باقر قوجالموشام عفو ایت
جواب ویردی که اولماز، گرک خدنگ آتاسان
.
امام تیر و کمان ایستدی اَکابردن
آلوب مهارتیله ایتدی تیری وصل کمان
.
کمانه زور ویروب قوّه ی امامتیله
نشانه نین وسطیندن ووروبدی بیر پیکان
.
آلوب بیر آیری اوخ آتدی، ووروب ازلکه اوخا
تیکوبدی دوقّوز اوخی بیر بیره امام زمان
.
نشانیه دَگَن اوخلار دگوردی هشّامه
اولوردی آتش بغضیله سینه سی سوزان
.
گَلوب تکلّمه عرض ایتدی یا اَبی جعفر
سنون واروندی نشانه وورانلارا رُجحان
.
خدنگ آتانلار ایچینده مهارتون واردور
بو علمی یاد ایلیوبسن بویور گوروم هاردان؟
.
بویوردی حضرت باقر جوانلیقیمدا ازل
نچه گون آتمیشام اوخ ای خلیفه ی دوران
.
او وقتیدن اَله تیر و کمان گوتورمَمیشم
اگرچه قدرت کامل بیزه ویروب یزدان
.
اطاعت ایلدیم امّا بو گون سنون سوزوه
گیچوبدی سینّیم، اوخ آتماق دگول منه شایان
.
تمام علم و شجاعت بیزه لَدُنیِ دور
که حلّ مشکل اولور آل حیدره آسان
.
بُلوندوروبدی منیم جدّیمه خدای احد
تمام علم لری کائِنٌ وَ ما هُوَ کان
.
بویوردی ختم رسل من مدینه ی علمم
علیدی باب علوم عوالم امکان
.
بیز آل حیدره میراثدور علوم نبی
سِچوب بیزی یر اوزینده خدای عالمیان
.
او ظالم ایلدی انکار علی فضیلتینی
امام ردّینه ذکر ایلدی آیه ی قرآن
.
علی وصیّ پیمبردی ایلدی اثبات
ثبوت حقّیده بیر ذرّه قویمادی نقصان
.
باشین سالوب اَشاقا اولدی خشمناک هشّام
دیدی نه ایسته سن ایسته عطا ایدون الآن
.
بویوردی اهل و عیالیم تیکوبله گوز یولوما
عیالیمون گوزینی قویما چوخ قالا نگران
.
چوخ ایستورم که گیدم جدّیمون مدینه سینه
بو گیتماقا ایدورم ایمدی سندن استیذان
.
جواب ویردی که ویردیم اجازه ایمدی گیدون
مرخّص اولدوخ ایکیمیزده خرّم و خندان
.
وداع ایدوب اونی دارُالعِماره دن چخدوخ
عمارتین یاخونیندا واریدی بیر میدان
.
همان محلّیده بیز ازدحام اعظمیدی
او یرده جمعیدی یکسر گروه عیسویان
.
امام حاجب هشّامیدن سوال ایلدی
ندور سبب یغشوب بو محلّه رهبانان
.
جواب ویردی بولارین بیوک بیر عالِمی وار
بو نزد کوهیده مدّتدی ایلیوبدی مکان
.
گَلور او عالِمِ راهب هر ایلده بیر دفعه
بو قومه بوردا ایدور غطای مهین مهان
.
امام باشینه بیر پارچا ایتدی پیچیده
او قوم ایچینده اوزین گیزلدوب او شاه جهان
.
همین که گَلدی او عالِم امامه دوشدی گوزی
دوتوب وجودینی رعشه چو بید لرزان
.
دیدی نشان ویر اوزون، سن بو قومیدن دگوسن
یقیناً امّت مرحومه سن، مسلمانسان
.
اولاردا عالِم مطلق و یا که جاهل سن
تکلّم ایت منیله ویر اوز علمیوه میزان
.
بویوردی امّت مرحومه جاهلی دگولم
سوروش نقدر سوزون وار ای عالِم ذیشَان
.
تعجّبیله او راهب دیدی بو مرده باخون
اوزین منیله دوتور علم و فضلیده یکسان
.
امامیدن نچه مُعضَل مسائل ایتدی سوال
او شه جواب ویروب بیر به بیر دیوب برهان
.
گوروب محیط دور علمی برابرینده بونون
محالیدور اولا بیر طفل ابجدی لقمان
.
امام اَلیله او راهب قبول ایدوب اسلام
بُلوب بو مطلبی هشّام بی سر و سامان
.
دوباره باشلادی بغض و عداوت و کینه
بو فکره دوشدی که ایمان ایوین ایده ویران
.
ایکی امامی عنادیله سالدی زندانه
جفا و جوریده ایتدی او بی حیا طغیان
.
اَیا امام زمان یا بقیّت الاَخیار
دینمورم نجه مجلس نه نوع بیر زندان؟
.
او حبسیده واریدی کافر و یهود و مجوس
نجه امام او توهینه ایتدی تاب و توان؟
.
اگرچه بیر نچه گون ظاهراً اولوب محبوس
ولیک محبسی باطنده قیلدی رشک جنان
.
ایدوب خوارجی اسلام دینینه دعوت
قبول مذهبه آلدی او قومیدن پیمان
.
خلیفه با خبر اولدی چخارتدی محبسدن
بیر آیری ظلم ایدوب ایتدی پیمبری گریان
.
مدینیه یولا سالدی امامی پژمرده
امامیدن قاباق امّا بَرید قیلدی روان
.
یول اوسته هر نه قَدَر شهر وار منازل وار
تمام اهالیه ایتسون بو مطلبی اعلان
.
گَلور ایکی نفر ای قوم! بنی هاشمدن
اولاره یر ویره هر کیمسه ایلیه مهمان
.
هَدَردی قانی، اوزین اهل بیتین اُلدورّم
جلال و شوکت و اموالین ایلرم تالان
.
امام طیّ منازل ایدوب نه عُسرتیله
امیدیله هارا یوز دوندَروب یِتوب حِرمان
.
یتنده هر یره توهین ایدوب منافقلر
ایدوبله حجّت پروردگار باغرینی قان
.
گَلوب او حالیله تا شهر مَدیَنه یِتیشوب
امامی قویمادیلار شهره فرقه ی عدوان
.
دیدیله سیز بیله معلوم دانموسوز دینی
چَکوبله سیزلری اوز دینلرینه ارمنیان
.
امام باقره بی حد موثّر اولدی بو سوز
غضبلَنوب دیدی اشرار مَدیَنه غضبان
.
نه عیسوی نه یهودی نه کافروخ نه مجوس
ندور سبب دیوسوز آل حیدره بهتان؟
.
پیمبر عترتیوق تابع کلامُ الله
گَلوبدی جدّیمیزه کردگاریدن قرآن
.
دوتاق که سیز دِیَن اولدی مسیحیانیله سیز
بیله سلوک ایده سوز ای گروه بد اخشان؟
.
یهود و گَبریله داد و ستاد ایلیورسوز
ولیک شهره بیزی قویموسوز، ندور عنوان؟
.
جواب ویرمدی بیر کس امام غیظه کَلوب
ایدوب او قربیده بیر کوه قلّه سینده مکان
.
اوجا سَسیله چاقوردی اهالی شهری
ایشیتمیَن او سَسی قالمیوبدی بیر انسان
.
باخوردی شهریده بیر پیر امامی گوردی دیدی
اَیا جماعت مَدیَن واریمدی بیله گمان
.
بو شهره ایمدی بلای خدا نزول ایلر
یاغار بلا یاغیشی مثل قطره ی باران
.
بیری بیریندن ایدوب نقل، مُخبرینِ سَلَف
تاپوب زمانِ سَلَف، بوردا بیر قضا جریان
.
او یر که بو دوروب، اوردا شعیب دورموشدی
ایدنده قومینی نفرین واله و حیران
.
اگر بودا ایده نفرین منیم یقینیم دور
دوتار بلا سیزی، بیر ذی حیاته ویرمز امان
.
آیلدی بو سوزیله اهل شهر غفلتدن
اولوبلا بیر بیره قهرِ اِلاهیدن ترسان
.
امامه ایتدیلر اکرام گَتدیلر شهره
آچوبلا محضر باقرده اعتذاره زبان
.
سالور خیالیمه شامی حکایت مَدیَن
قلم! حکایت شامی صریح یازما دایان
.
اولاردا سیّد سجّاده خارجی دیدیلر
گوزینده باخمادیلار سیل اشک ایدر طوفان
.
علیل امام اوزی ناقه اوسته قول باغلی
شکسته محمِل ایچینده مُخَدَّره نسوان
.
باخان گُلردی دیردی بولار دانوب دینی
ایدردی زینب کبری اَنین و داد و فغان
.
گورردی نیزه ده قارداشینون یارالی باشین
دیردی ای سو کنارینده جان ویرن عطشان
.
بس اولمادی سنی اُلدوردولر بو قوم دنی
یارالی پیکریوی یرده قویدولار عریان
.
دیولّه عترتیوه ایمدی خارجیدی بولار
من آغلورام یانورام، سنده باخ بو حالیمه یان
.
کناره چخما #حسینی ازلکه مطلبدن
دگول بیانه گَلَن ماجرای شام،‌ اینان
.
#باقریه_شهادت
#سعدی_زمان
#اگر_چه_اسم_حسین_زینت_منابردور
#بویوردی_جابره_بیر_گون_رسول_عالمیان
#چهارده_معصوم_حسینی ص 231
#ترکی
#زبدةالاشعار