حالات حضرت مسلم ابن عقیل (ع)
.
✍️ زبدة الاشعار ✍️
?: @nohe_torki
.
نوید آسال اردبیلی
.
مسلمی مامور ایدوبدور سرور دوران حسین
تا اولا اول سفیر لشکر سلطان حسین
.
امر ایدوبدور مسلمه اول سرور عالی جناب
کوفیه عزم ایتمگه ایله عم اوغلی سن شتاب
چشم بازیلن سنی ایتدیم بو امره انتخاب
ذره یوخدور اعتمادیم اون ایکی مین خامیه
کوفیه تک گلمگیم وابسته دور بیر نامیه
.
بو عنایت مسلمی غرق مسرت ایلدی
امر مولادن او وارسته اطاعت ایلدی
بی بهانه کوفیه ساری عزیمت ایلدی
خنجری بلده باشیندا هاشمی عمامه سی
چسب اولوبدور قلبی اوسته شاه عالم نامه سی
.
طی ایدوب منزل لری صحرالری صبح و مسا
بی تامل یول گیدور مرکب بلینده باد سا
حاجتی یوخدور نه آبه نه طعامه مطلقا
ایستیور کاخ وفانی عشقیلن آباد ایده
اول حقی سورا حیدر اوغلونی دلشاد ایده
.
تا یتیشدی کوفیه بو قاصد عالی مرام
پیشوازینه گلوب شهر اهلی یکسر خاص و عام
سسلنور اهلا و سهلا مسلما مردم تمام
بو عنایت مسلمی مسرور ایدوب بی انتها
سسلدی سیزده اولان عشق و وفایه مرحبا
.
بیر نفر سسلندی مسلم ای سفیر شاه دین
ابن طاهانون یولون گوزلور بو شهر اهلی یقین
هامینون وار میلی اوپسون خاک پاک مقدمین
کوفیه گلسه حسین جانلاری قربان ایلروک
مقدم شاهه گوره شهری چراغان ایلروک
.
ایلروک مولایه خاطر بی بهانه بیز قیام
ایستیوک تا اگلشه صدر حکومتده امام
جنگه خاطر ایلیوبدور تیغ لر ترک نیام
شاهه خاطر حاضروک صبح و مسا پیکار ایدک
تا حسینی کل اعرابه سپهسالار ایدک
.
چوخلاری بو سوزلری تکرار ایدوبدور بر ملا
ناگهان اللر هواده اهل کوفه یکصدا
سسلنوبلر یکسره لبیک یا بن مرتضا
الغرض تکریم اولوبدور مسلم پاکیزه خو
منزل مختاری مسکن ایلدی اول ماه رو
.
دائما صبح و مسا دیدارینه ملت گلور
ایستیور کیم ایلسون سلطانیلن بیعت گلور
بعضی لر دوتموش الینده پربها خلعت گلور
هر گلن شخصه دیور مسلم حسین برنامه سین
هر گورن قویدی گوز اوسته شاه عالم نامه سین
.
اللی مین شخصه یوخون گلدی اونون دیدارینه
ویردیلر بیعت الین مولا حسینون یارینه
شادلیقیننان چوخلاری گوزیاش الور رخسارینه
سسلنوللر بیز بو یولدان آیری سمته گیتمروک
بیز حسیندن سورا هیچ سلطانه تعظیم ایتمروک
.
شمر ملعون و نچه جانی هراس ایتدی عیان
یازدیلار نامه یزیده کی امیر پر توان
یوخدی نعماندا لیاقت والی اولسون بی گمان
کوفه ده مسلم ایدوبدور اخذ بیعت بالتمام
ایندی مسلم دور امیر کوفه ای والامقام
.
تا چاتوب شاماته نامه اول امیر می گسار
زادۀ مرجانیه بیر نامه یازدی بی قرار
بصره نی ترک ایله فورا کوفیه اول رهسپار
کوفه نون اوضاعی سنلن بی گمان آرام اولار
سن قدم قویسون اورا آل علی ناکام اولار
.
کوفیه گلدی غرض ابن زیاد بی حیا
تا اشیتدی بو پیامی کوفیان بی وفا
گردن ایمانه سالدی کوفی لر بند جفا
آتش جهل و جفاده بی حیالر یاندیلار
ایتدیگی بیعت لری بیر گون ایچینده داندیلار
.
عزم مسجد ایلدی مسلم او مرد پاکباز
تا جماعتلن ایده مسجدده احیای نماز
اقتدا ایتدی اونا اهل شقاوت دلده راز
باشه چاتدی تا نماز راه خطادن گیتدیلر
مسلم بی خانمانی بیر به بیر ترک ایتدیلر
.
کوفه شهرینده اولوب یار ولایت دلغمین
یوخ سفیر عترت پیغمبره بیر کس معین
بیلمیور گیتسون هارا سردار شاه مه جبین
اول قدر آواره گزدی کوچه کوچه کوفه نی
مسلمه دست قضا گوستردی بیت طوعه نی
.
آچدی باب بیتی ناگه طوعۀ عالی شجر
گوردی بیر شخص غریبی صورتی همچون قمر
آدینی ایل و تبارین آلدی مسلمدن خبر
سویلدی مسلم کی اهل یثربم هاشم نسب
بو دیاره گلمیشم امر امیریمدور سبب
.
من حسینه قاصدم تا خلقیدن بیعت آلام
من او شخصم کی گلوب پیشوازیمه ملت تمام
ایندی یوخ بیعت ایدندن بیر نفر اهل مرام
جانیمه بو شهریده غربت شرارین آلمیشام
بیر یریم یوخدور گیدم بی یار و یاور قالمیشام
.
تا اشیتدی بو سوزی طوعه اولوبدی ناگران
فکر ایدوبدور کی چاتوب اول لحظه وقت امتحان
عاشقانه مسلمه أوز بیتینی ویردی مکان
عرض ایدوب من شیعۀ مولای قنبر حیدرم
من اوشاقلیقدان کنیز عترت پیغمبرم
.
بو پذیرایی ولی چوخ تاپمادی حال دوام
طوعه نون بیر اوغلی واردی عبد شیطان بد مرام
تا بیلوب کی میهماندور اول ایوه یار امام
قاچدی سرعتلن او جانی کاخ میر کافره
مسلمی ساتدی خدایا تکجه بیر کیسه زره
.
امر ایدوبدور ابن مرجانه او بد ذات و زبون
طوعه نون سالدی حصاره منزلین بی حد قشون
مستقر اولدی مقرینده غرض اشرار دون
تا بیلوب اوضاعی مسلم سرعتیلن بی درنگ
جامۀ رزمی گییندی چون چاتوبدور وقت جنگ
.
طوعه گوردی عازم پیکار اولور پیک وفا
مقدمینه دوشدی گوزده اشک تر دلده نوا
عرض ایدوب عفو ایت منی شرمندیم سندن آقا
سویلدی مسلم کی ایتدون دینووی یاخجی ادا
حق سنه ویرسون جزای خیر ای کان حیا
.
گوزلیور مسلم یولون خنجرلر الده قوم کین
کوچه ده قورموش اونا اشرار بد فطرت کمین
پشت در آماده دور مسلمده پیکاره یقین
ساق الینده ساخلیوبدور تیغ تیز جانستان
ایستیور ایتسون علینون قدرتین بیرده عیان
.
طوعه آچدی قاپلاری گوزدن ولی اشکی روان
خنجر الده مسلم ایودن خارج اولدی ناگهان
سپدیلر گویا عذار خصمه رنگ زعفران
هیبتیندن سالدی مسلم قلب اعدایه شرر
جنگجولر اللرینده تیتریوردی تیغی لر
.
خامه ایستور بو نبردین نقش ایده تصویرینی
درک ایدوب یکسر ملائک عرشیده تکبیرینی
قالخیزوب هر اندیرنده تیغۀ شمشیرینی
قدرتین اثبات ایدوبدور سیف هاشم آفاقا
هر کیمه بیر ضربه ویردی دوشدی جان سیز تپراقا
.
کیم گلور پیکارینه بی شک عدم زهرین ایچور
هر مقابل ده اولان فکر حیاتیندن کیچور
داس تک باشلاری خنجر هرز علف مثلی بیچور
خدمتیندن کسمیور تا قالمیا بوینوندا دین
ورد و ذکری حین بحراندا اولوب لبیک حسین
.
بیر نفر درباره قاچدی ویردی سرعتله خبر
لشکری مسلم ایدوبدور تک باشا زیر و زبر
گوردوگوم صحنه سالوب اندامیمه یکسر شرر
اول سببدندور بو نوعی لرزیه پیکر گلوب
کوفیه گویا دوباره فاتح خیبر گلوب
.
گوندروب نیرو دوباره میر کوفه بی قرار
ایلسونلر شیر بی پروای اسلامی شکار
هر طرفدن مسلمه لشکر گتیردی تا فشار
ناگهان بکر بن حمران ایلدی ظلمون عیان
ویردی بیر یاره ستملن لبلریندن سوزدی قان
.
ایتمدی بو وضعیلن مسلم گینه ظلمی قبول
غالب اولماق مسلمه گوردی قشون ممکن دگول
بامیلردن باشینه ویردیلا داش سپدیله کول
ابن اشعث مکریلن ویردی امان ، شیر ژیان
چاره سیزلیقدن قبول ایتدی یوخیدی چون توان
.
گتدیلر قصر عبیدالله پست و انتره
ویرمدی مسلم سلام سرکردۀ خیره سره
بو عمل گلدی گران ابن زیاد کافره
سسلدی حرمت ندن ایتمورسن ای مسلم منه
ایستسم گر ایندی ویررم حکم آزادی سنه
.
یوخ ولی بوندان بیله یوخدور سنه ذره مجال
گرسنی ئولدورسم اولّام آری آسوده خیال
سن کیمین آل رسولون ایلرم قانین حلال
دوندرم قانه گرک ختم نبی گوز یاشینی
ئولمرم گورسم جدا اوسته حسینون باشینی
.
سسلدی مسلم کی لال اول ای امیر بد سیر
هاتف غیبی منه ویردی بو جریانی خبر
بیرگونی بو قصر شومه عم قیزیم زینب گلر
خطبه سیلن دوندرر بیر لحظه ده اقبالووی
قاره بیر معجرله نابود ایلیر اجلالووی
.
اولدی بو سوزدن جری ابن زیاد بی حیا
امر ایدوبدور ایلیون مسلم باشین تندن جدا
بامیدن سورا آتون باشسیز وجودین تپراقا
قوی بیله عالم بودور اهل قیامون آخری
ضد دولت اولسا کیم حلقینده گورسون خنجری
.
امر والی دن اطاعت ایلدی اهل درک
کسدی آزاده سفیرون باشینی بیر داش اورک
ویردی مسلم صورت زیباسینه قاندان بزک
اولمادی بیر کس معین مولا حسین سربازینه
یعنی عاشورانون اول گون گیتدیلر پیشوازینه
.
جان ویرنده آرزو ایلر یقین هر اهل دین
باشی اوسته کربلا سلطانینی درک ایلسین
بیلمورم من نیلمیشدی مسلمه اعدای کین
جان ویرن لحظه گوزونده اشگ ترقلبینده شین
نچّه دفعه سسلدی گلمه حسین گلمه حسین
.
ویر قولاق ای شیعه سن بو درد و غم فرجامینه
شیر هاشم دوشدی چون روبه صفت لر دامینه
پیکر بی رأسینی دارالاماره بامینه
گتدیلر تا کوفی لر گورسون بلانون شدتین
آتدیلار تپراقه اوردان قانه باتمیش قامتین
.
او همان کس لر کی نامه گوندرردی دم به دم
کوفیه تئز گل آقا قوی گوزلریم اوسته قدم
ایلدی نامه یازانلار مسلمه عمده ستم
شاهی دعوت ایلیینلر هتک حرمت ایتدیلر
مسلمون نعشین قویوب قوملارین اوسته گیتدیلر
.
گلدی امّا فاطمه تا باش چکه أوز یارینه
باخدی یار اهلبیتون پیکر خونبارینه
اوندا تک بیر سوز دیدی منده دییم انصارینه
باخدی زهرا غرق ماتم مسلمون احوالینه
آغلادی بیردن دیدی وای زینبون اقبالینه
.
ای (نوید) گلدی گینه عاشقلره ماه عزا
ایله بو امره عمل باشه سورا باغلا قرا
بی ریا اول بی ریا اول بی ریا اول بی ریا
صادق اول زهرادن آل دنیاده زیبنده مقام
سعی ایله کسب ایله بو درگهده عالی احترام
.
#مسلمیه
#مسلمی_مامور_ایدوبدور_سرور_دوران_حسین
#آسال_اردبیلی
#ترکی
.
✍️ #زبدةالاشعار ✍️
?: @nohe_torki
نظر دهید