پندیات در باب توسل بر حضرت اباعبدالله الحسین (ع)
.
.
مرحوم دلریش
.
.
ایسته سن آسوده لوخ ای جان من عقباده سن
دوت حسینین دامنین آغلا اونا دنیاده سن
.
.
عمر نوح و گنج قارون، ملک اسکندر اگر
اولسا یوخدور آخری پامال اولور بو سیم و زر
جز کفن قبره آپارموب مال دنیا بیر نفر
خواب غفلتدن اویان فکر ائت دم معناده سن
.
.
گون کیمی عالمده واضحدی صراط المستقیم
بیزلری یولدان چیخار دوب ایندی شیطان رجیم
اولماسا شامل اگر لطف خداوند کریم
یانماقا نار سقرده اولگیلن آماده سن
.
.
مین گوگول قان ایلیوب بیر خاطرون شاد ایلمه
عالمی برباد ائدوب بیر ملکی آباد ایلمه
قوی بنای آخرت طغیان چو شداد ایلمه
گور ندن اوتری گلوبسن بو خراب آباده سن
.
.
بیله قویموش قاعده خلّاق حیّ لم یزل
جملۀ جنبنده نوش ائتسون گرک جام اجل
وار نقدری فرصت الده ایله ایمدی خیر عمل
گیر و دار محشری سال ای عزیزیم یاده سن
.
.
چنگ وور اخلاصیله تشنه حسین دامانینه
آغلا قان أُول سرورین ناحق توکولموش قانینه
بیله اکسیر اولماز آند اولسون حسنین جانینه
ایسته وار هر مطلبون بو درگه والاده سن
.
.
هئچ کیم عالمده حسین تک زار و مغموم اولمادی
سو کنارینده وئروب جان تشنه محروم اولمادی
چوخلارون کسدیله باشین بیله مظلوم اولمادی
قاتل و مقتوله باخ سیر ائت او بدبنیاده سن
.
.
شمر شرم ائتموب آنان خیرالنسادن یاحسین
کربلاده دویمادی جور و جفادن یاحسین
کسدی باشون تشنه لب آخر قفادن یاحسین
ائتدی هر نوعی ستم عجز ائتمدون جلاده سن
.
.
هر رموز عشقیدن کیم سن کیمی آگاه اولوب
عشق راهینده بو نوعیله فنا فی الله اولوب
یا کیمین قانی شها معناده ثارالله اولوب
فردسن قرب خدانی فرد بی همتاده سن
.
.
ترک جان ایلوب ایکی دنیاده اولدون سربلند
نیزیه گئچدی باشون دوغراندی جسمون بند بند
پیکر صدچاکون اوسته گزدیروب اعدا سمند
دؤزدون ای شاه جهان بو محنت عظماده سن
.
.
بیله محو ائتدی سنی شوق لقای ذوالجلال
ائتمدون هرگز خیال مال و فرزند و عیال
تاپدون ای شاه امامت ظهر وقتینده زوال
ناگهان ائتدون تجلا نیزۀ اعداده سن
.
.
فکر دنیا ایلمز البته اهل معرفت
بوردا بیر نوعی گئچین ایله خیال آخرت
یاحسین حضاریلن «دلریشه» ایله مرحمت
باخ گیلن بیر گوشه چشمیله یت امداده سن
.
.
#پندیات #حسینیه_شهادت
#ایسته_سن_آسوده_لوخ_ای_جان_من_عقباده_سن
#ترکی #حسینیه
#زبدةالاشعار
نظر دهید