شهادت حضرت امام حسن مجتبی (ع)
.
✍️ #زبدةالاشعار ✍️
.
🆔: @nohe_torki
.
مرحوم تائب تبریزی
.
.
ایچدیردیله گل زهر عداوت منه قارداش
جان اوسته سن آغلا منه ؛ منده سنه قارداش
.
.
سن سویله که مسموم جفا وای حسن ای وای
منده دیوم ایوای سوسوز جان ویرن ای وای
.
.
گل باشیمی آل بیرجه دیزون اوسته وفالی
حالیمدن ایدوم تا سنی بو حالده حالی
گور وار نه بلاسی باشیمین باشی بلالی
فورا سچه سن دردیمی ؛ احوالیمه باخسان
حالون پوزولار گر پوزولان حالیمه باخسان
.
.
زهر آتشینه گر چه ایچوب بو سوئی یاندیم
اود دوشدی یانان قلبیمه یاندیم یارالاندیم
یاندیم یارالاندیم داخی من جانه دایاندیم
قسمتدی منه زهر ایچوب جانه دایانماق
اما سنه نهر اوسته سوسوز قانه بویانماق
.
.
گل لبلریمه بیرجه یانا یانه نظر سال
مجروح دوداقدا دوزولن قانه نظر سال
لعل لب آرا گوه غلطانه نظر سال
ظاهرده یانان لبلریمه قاندی دوزولموش
معناده منیم مرگیمه عنواندی دوزولموش
.
.
مشکل دونه حسرت گیجه میز گوندوزه قارداش
آز قالدی اجل رشته عمری اوزه قارداش
گل بیرده بو صون دمده قویاق یوز یوزه قارداش
اول دم فرقتده گوزل عطرون آلوم من
قول بوینوما سال بوینوا قول بیرده سالوم من
.
.
من بیر گلیدیم گتدی بهاریم چمنیمده
گورسندی مین آثار خزان پیرهنیمده
بیر عمر غریب وطن اولدوم وطنیمده
ظاهرده منه ملک مدینه وطن اولدی
باطنده وطن اولمادی بیت الحزن اولدی
.
.
دوز گلمدی گردونه گردون حسنیله
من دردیله اولدوم ؛ هامی درد اولدی منیله
اوز عمریمی ویردیم باشا مینلر محنیله
قورتولدوم اوزوم گتماقیمین وقتی آزالدی
نه درد و بلا واردی حسین تک سنه قالدی
.
.
دشمن سنه ده من کیمی ظلم علن ایلر
آغلار گوزیوه عالمی بیت الحزن ایلر
قویماز سنی شهرونده جلای وطن ایلر
لابد دوشه سن ئلدن اوزاق داغ داشا قارداش
چوللرده ویررسن گونون عمرون باشا قارداش
.
.
غم یولداشیسان حالیم اولوبدور سنه معلوم
من گتملیئم دل یارالی غصه لی مغموم
ای حقی گئدن الدن اولان من کیمی مظلوم
هر حالده قارداش حسنی سچمه اوزوندن
اطفالیمه ایله آتالیق سالما گوزوندن
.
.
من دویمادیم آفاقده گل یوزلی لریمدن
ایمدی دوشورم آیری شیرین سوزلی لریمدن
اما نگرانم بو دولی گوزلی لریمدن
مندن صورا قویما دولا چوخ گوزلری قارداش
رافتله یتیش گر اولا هر سوزلری قارداش
.
.
اطفال منه گور نه یانا یانه باخوللار
حسرتله سالوب اود بو دل و جانه باخوللار
چگنینده بویونلاری یتیمانه باخوللار
باخدوقجا گوزی یاشلی یتیمانه حسینیم
باغریم دونوری حسرتیله قانه حسینیم
.
.
تک تک اولارین قیدینه سن قال آتام اوغلی
مرهم یارالی دللرینه سال آتام اوغلی
بو قاسمی دیندیر اورگین آل آتام اوغلی
باغیمده گل نازدی قویما سولا قاسم
غمگین اولارام قبریده غمگین اولا قاسم
.
.
باخمازلا که اطفال یتیمیم قالار آغلار
بی شرم عدو بیرده یانان قلبیمی داغلار
نعشیم یوزینه روضه پیغمبری باغلار
قویمازلا گیده روضه پیغمبره نعشیم
تابوت ده یتمیش اوخ آلار پیکره نعشیم
.
.
صبر ایله حسین اولما ایله وقتیده دلگیر
راضی دگلم جنگ اولا ای صاحب تدبیر
قویما چکه عباس او هنگامه ده شمشیر
گر چکسه قلج غزوه خونین اولی قارداش
اوندا حرم جدیمه توهین اولی قارداش
.
.
خورشیدین الی مهر درخشانین الینده
دست حسنی هیکل احسانین الینده
سلطان بلا سرور عطشانین الینده
زینبده باخوردی که حسن گوزلری آخدی
حسرتله آخان گوزلری اطفالینه باخدی
.
.
یعنی یتیشوب دعوت جانان گیدورم من
دین اوستع ایدوب جانیمی قربان گئدورم من
خلوتگه جانانیمه مهمان گئدورم من
گلدی آرامیزدا بو اجل تفرقه سالدی
بیرده منی گورماق بالالار محشره قالدی
.
.
بو حالده بی طاقت اولوب داشدی اوشاقلار
یکباره ویروب سس سسه آغلاشدی اوشاقلار
گوز یاشلی او ساعتده قوجاقلاشدی اوشاقلار
اشگین بالالار خون دله قاتدی او یرده
قاسم هامونی آغلادی آغلاتدی او یرده
.
.
یوز دوتدی بنی هاشم او دم شاه حجازه
حمل اولسون حسن نعشی آلوب اوندان اجازه
سوی حرم جدینه حمل اولدی جنازه
یثربده صدا دوشدی حسن ایلدی رحلت
تشییعینه شهر اهلی گلوب ایتدیله شرکت
.
.
بیر یاندا حسین قلبینی غم تیری دلردی
بیر سمتیده عباس یوزه اشگین الردی
بیر یاندا یتیمان حسن داده گلردی
مملویدی فریاد و نوائیله مدینه
دولموشدی بوتون وا حسنائیله مدینه
.
.
مروان گتوروب ظاهره بیر کینه تازه
یول باغلادی نعش شرف ملک حجازه
گتسون حرم جدینه قویموبلا جنازه
بو وضعی گوروب بیر بیرنه دگدی جماعت
یثربده قیام ایلدی اوضاع قیامت
.
.
بو منظره چوخ ایتدی بنی هاشمی دلگیر
گوزلر قیزاروب غیظه گلوب جمله سی چون شیر
عباس علی آلدی اله قبضه شمشیر
غباسی گوروب جوشه گلوب فوج جوانلار
اما نه جوانلار هاموسی جوهر جانلار
.
.
بیر یاندا آلوب تیغ اله دیندار جوانلار
بیر سمتیده آماده اولوب دینی دانانلار
ال اوسته او ساعت آلینوب تیر و کمانلار
بیردن قویولوب سخت کمان اوستونه اوخلار
یاغدی او گوزل جان جهان اوستونه اوخلار
.
.
پر آچدی هوا اوسته نچه ناوک پرّان
بالنده لنوب تک تکی سسلردیله قان قان
.
.
تابوتیده اوخلار گلوب اوخ اوسته ساچیلدی
گل تک بدن وجه حسن گوز گوز آچیلدی
.
.
.
گوردی که حسین شرم یوخ اتباع جفاده
قانلار توکولر گر ایلسه جنگه اراده
اوز قارداشینین سالدی وصایاسینی یاده
ایتدی او وصایایه عمل سرور شیعه
امر ایلدی حمل اولدی حسن نعشی بقیعه
.
.
قویدوردی یره نعشی نوا عرشه اوجالدی
حسرتله گوزون اشگیله دولدوردی بوشاتدی
سانسیز اوخی قارداش بدنیندن چکوب آتدی
آتدیقجا دئدی اوخلی یارالی بدن ای وای
مظلوم ئولن باشی بلالی حسن ای وای
.
.
بو حال منیم چوخ غمیمی چوخلادی قارداش
دشمن بیزی بو گونده عجب یوخلادی قارداش
من باخدیم اولار پیکریوی اوخلادی قارداش
دوزدوم دیدیقون تک یوزه گوز یاشیمی دوزدوم
الله ئوزی عالمدی که دوزدوم نجه دوزدوم
.
.
بیر قبر حسین قازدیروب اول معدن صبره
دولدوردی گوزون ایتدی مثل بیر دولی قبره
قارداشی قویوب قارداش الیله ئوزی قبره
وجه الحسنی آجدی قرا توپراقا قویدی
حسرتله حسن وای دئدی چوخ آغلادی دویدی
.
.
سویلردی اولان ظلمیله مسموم ئولن ای وای
حقیندن اولان دهرده محروم ئولن ای وای
حقی گئدن ئوزی مظلوم ئولن ای وای
قویدی اوز اوزه توپراق او وجه حسنیله
منده قوتارام عمری گرک وا حسنیله
.
.
عالم یری وار اودلانا گر بیر بو سوزوندن
سندنصورا دوشمز نجه دنیا بو گوزومدن
دنیانی سویم بیرده گلر یوخسا یوزومدن
بیر یوز که ایدوب ناز او گل یاپراقا قارداش
قویدوم اوز الیمله او یوزی توپراقا قارداش
.
.
هجرانوه قارداش دیمه سینمده دوزوم وار
سینمدن آلان اولسا اگر چوخلی سوزوم وار
سندن بولوسن دویمادی دل سنده گوزوم وار
الدن سنی گلدی بو اجل آلدی حسن جان
گتدون سنون آردونجا گوزوم قالدی حسن جان
.
.
انسیتیمیز مجلسی دوشمز اله قارداش
سن تک کیم اولار درد حسینی بوله قارداش
هیهات حسین شاد اولا سنسیز گوله قارداش
مین لرله بهار اولسا دوتولموش دل آچیلماز
سولدی حسنی گل بو حسینی گل آچیلماز
.
.
چخماز بو یادیمدان که عدو حقیوی آلدی
اودلی اورگون نسگلس اودلار دله سالدی
دردون دیمدون درد دلون سینه ده قالدی
باخدون منی یاندیردون او دولموش گوزویله
درد دلیوی قبره آپاردون اوزویله
.
.
ویردی یارالار قلبیوه بیر عده منافق
ظاهرده سنه باطنا اشراره موافق
طغیان ایلیوب اولدیلا سابق لره لاحق
قلبون آجی سوزلرله غمین ایتدیله قارداش
آخرده سنی خانه نشین ایتدیله قارداش
.
.
سن روحیمیدون تار دلیم مهریوه بسته
اوز روحیمی دفن ایلدیم ای قلبی شکسته
دوزمز ئورگیم چوخ گلرم قبریوین اوسته
آتمام سنی تا جسمده جانیم اولا قارداش
بو شرطیله دشمندن امانیم اولا قارداش
.
.
قارداش او قدر واردی علاقه سنه منده
تیز تیز گلرم قبریوه بو بیت حزنده
دشمن منی قویمازقالام افسوس وطنده
حسرتله سالار ئلدن اوزاق داغ داشا سنسیز
باشه ویررم عمریمی غربتده وطن سیز
.
.
یات خاک بقیع آتدا سن ای سینه یارالی
اما بو حسینون دوشه جاق سندن آرالی
بطحالیدی آخر اولاجاق کرب و بلالی
گورماقلیقیمن گر باشوا دوشسه هواسی
گل کرب و بلایه وار عجب ذوق و صفاسی
.
.
گل کرب و بلا باغ و گلستانینه سیر ائت
گل صاحبینین سو تک آخان قانینه سیر ائت
دین اوسته او یتمیش ایکی قربانینه سیر ائت
باخ گور نقدر قوچ قوزی قربانی یخوبلار
سو اوسته نچه سرو خرامانی یخوبلار
.
.
#تائب بو قدر ویرمگلن طول کلامه
ال ساخلا یتور سوزلریوی بوردا تمامه
همت ایله گیت مدفن سلطان انامه
بیر سال اوزیوی قتلگه کرب و بلایه
اول نوحه سرا اوردا شه کرب و بلایه
.
.
#حسنیه_شهادت
#ایچدیردیله_گل_زهر_عداوت_منه_قارداش
#حسنیه_تائب_تبریزی
#ترکی
.
✍️ #زبدةالاشعار ✍️
.
🆔: @nohe_torki
نظر دهید