شهادت حضرت امام حسن (ع)
.
✍️ #زبدةالاشعار ✍️
.
🆔: @nohe_torki
.
#سبک_ساخلا_ناقه_می_کاروانیدن ( 8 سبک برای سینه زنی و زنجیر)
.
مرحوم قدرت اله نادری میانجی
.
یاندوم ای باجی سم زهردن
قاره بخت اولان زینبیم اویان
جاون وئرور گوز آچ قارداشون حسن
اودلارا یانان زینبیم اویان
.
.
.
دورگلان نه غفلتده یاتموسان
یخدیلار باجی خانمانوی
تازه دن گنه یاسه باتموسان
باغلی قویدولار دودمانوی
دوغرانوب جگر داده چاتموسان
ائتدیلر خزان گلستانوی
زهر ائدوب منیم گور نجه باجی
قدّیمی کمان زینبیم اویان
.
.
.
آچماسون گوزون خواب نازیدن
درد و غم سنه بر ملا دگول
ای بلا چکن راه حقّده
بو بلا هله صون بلا دگول
یِر مدینه دور جان وئرن حسن
قورخما ای باجی کربلا دگول
یوخدی قدرتیم سسلیوم سنی
باغریم اولدی قان زینبیم اویان
.
.
.
یوخدی طاقتیم نازیوی چکم
یاتما بیر بله ای اسیر شام
یاندی دیل دوداق دوغرانوب جگر
سنده منله یان قویما تک یانام
دور حسینوی ایله باخبر
هارداسان حسین جان وئرور امام
ای جوانلاری االده دوغرانان
خیمه سی یانان زینبیم اویان
.
.
.
سو گتور باجی ایله شستشو
زهر کین دگوب گور لباسیمه
دور تدارکون گور انام باجی
قونشولار گلر یندی یاسیمه
آل هاشمی گئت اویاتگلان
وئر خبر باجی نازلو قاسمه
دئ آتان ئولور هارداسان بالا
قان حنا یاخان زینبیم اویان
.
.
.
آز قالوب گجه صبح آچیلسا گر
پخش اولار باجی عالمه خبر
عون جعفری اکبری اویات
کوفه نائبی مسلمه خبر
کربلا علمدارینی چاقور
وئر منیم اباالفضلیمه خبر
قوم و خویشیمی ایله باخبر
گوللری سولان زینبیم اویان
.
.
.
وقتیم آز قالوب ای آنام باجی
منله بیر زمان ایله گفتگو
دور چاقور گوروم اهل عیالیمی
ناتوان ائدوب چون منی عدو
دوغرانوب جگر ئولدورر منی
کوزه دن باجی ایچدیگیم بو سو
قارداشون گئدور دور وداع قیل
بی خبر یاتان زینبیم اویان
.
.
.
گوردی زینبی چون اویانمادی
ناامید اولوب شاه ممتحن
بیر به بیر یاتانلاری سسلیوب
اولمادی اونا کیمسه سس وئرن
نوعله سوروندی گلوب گئنه
زینبون باشی اوستونه حسن
یوز یوزه قویوب سسلدی امام
یاندیم الامان زینبیم اویان
.
.
.
«نادری» بو غم دفترین قوتار
آز قالوب قلم دفتر آغلاسون
زهر کینلن جان وئرور حسن
وقت اولوبدی پیغمبر آغلاسون
فاطمه اوغول وای دیوب گله
باشنه وورب حیدر آغلاسون
کربلا غریبی حسینیمه
سینه داغلیان زینبیم اویان
.
.
.
.
.
#حسنیه_شهادت
#یاندوم_ای_باجی_سم_زهردن_قاره_بخت_اولان_زینبیم_اویان
#حسنیه_نادری
#ترکی
.
✍️ #زبدةالاشعار ✍️
.
🆔: @nohe_torki
نظر دهید