کوفه
.
✍️ #زبدةالاشعار ✍️
.
🆔: @nohe_torki
.
مرحوم اعظمی تبریزی
.
ای اهل کوفه بیزه ظلم بیشمار ایلدوز
بو جور ظلمیله دنیانی داغدار ایلدوز
.
دیار کرب و بلاده او قدر قان توکدوز
تمام ظلموزی دنیایه آشکار ایلدوز
.
همان او کوفه لی سیز قان توکن آدوز قالدی
ئوزوزی حشره کیمی خوار روزگار ایلدوز
.
آدوز گلنده سیزون خلق نفرت ایلیه جاق
جهاندا دامنوزی گور نه لکه دار ایلدوز
.
ریاستوزدن اوتور داندوز حکم قرآنی
بنای دینی یخوب ایله تار مار ایلدوز
.
نه سوز دیوم سیزه ایتمز اثر او کسلرسوز
پیمبر اوغلونی ئولدوردوز افتخار ایلدوز
.
نشان ویروم ئوزیمی سیزلره بولون کی کیمم
حقارتیله اگر داخل دیار ایلدوز
.
منم علی قیزی زینب حسن حسین باجیسی
ندندی خوار گوزیله منه نظار ایلدوز
.
بو شهر کوفه ده بش ایل آتام خلافت ایدوب
اولاندا مشگلوز اول شاهه واگذار ایلدوز
.
مگر دگلسوز او کسلر بو شهر کوفیه من
گلنده باشیمه عزّتله گل نثار ایلدوز
.
منه بو شهرده بیحد حرمتوز اولدی
ملول اولاندا گلوب داده آه و زار ایلدوز
.
یوخ ایندی الده جلالیم سویولموشام بیلدوز
ئوزوزی مندن اودور بله کنار ایلدوز
.
جهان خراب اولا بیلدوز ئولوبدی قارداشیم
یوزوزه پرده بی قیدی استتار ایلدوز
.
عروس باشینه گل سپمدوز سوزوم یوخدی
منی عروسدن هر چند شرمسار ایلدوز
.
حسینمون باشی بیر گون سیزه قوناخ گلدی
او باشی نوک جدا اوسته سنگسار ایلدوز
.
گوروبدی کیم یارالی باشی سنگسار ایده لر
بو ظلمیله دل زهرانی داغدار ایلدوز
.
عجب قوناق یولا سالدوز بو گون ایویز آباد
ایشیق گونی گوزیمه ایله لیل تار ایلدوز
.
رقیمون یولی بیر دفعه شهروزه دوشدی
بو نازنین بالانی محنته دچار ایلدوز
.
پیمبرین نوه سی آغلیاندا کف چالدوز
نه شرم ایدوب نه رسول خدادن عار ایلدوز
.
بوله بوله کی ربابون ئولوبدی سود امری
بو زار و بی کسی محنتله اشکبار ایلدوز
.
قوجاقلاروزدا اوشاق پیشوازه چخدوز سیز
ئوزوزی سیر تماشاده بی وقار ایلدوز
.
کتابه معتقد اولساز بیزوق کتاب اهلی
ندن عقیدوزی عالمده انکسار ایلدوز
.
بنات فاطمه نی ئوز ایویزده آغلاتدوز
رسول اکرمی جنّتده بی قرار ایلدوز
.
ملال«اعظمیدی» بیزلره باخوب گلدوز
ئوزوزی جرگۀ اسلامیدن کنار ایلدوز
.
#کوفه_اعظمی_تبریزی
#ای_اهل_کوفه_بیزه_ظلم_بیشمار_ایلدوز
#ترکی
.
✍️ #زبدةالاشعار ✍️
.
🆔: @nohe_torki
نظر دهید