حالات حضرت قمرمنیر بنی هاشم(ع)
.
✍️ #زبدةالاشعار ✍️
.
🆔: @nohe_torki
.
جواد آقاخان پور
.
ای اولان اندوه و درده مبتلا
آلماسین آرامیوی درد و بلا
.
کسمه سین أمّیدوی عُسر و حَرَج
هر چتین لیقدان صورا وار بیر فرج
.
نفس الینده سعی ایله اولما اسیر
بیر گنه دور ناامید اولماق کبیر
.
جهدایله دنیادن اوتری آغلاما
غیر معبود اوزگیه بئل باغلاما
.
هر مؤثر ایشده سن اللهی بول
ایستسه الله اولار واللهی بول
.
یتماقا قُربِ حقه آهنگ وور
سعی ایله حبل المتینه چنگ وور
.
بنده سین دردیله مأنوس ایلمز
رحمتیندن بول که مأیوس ایلمز
.
چنگی وور فریاد و داد و آهه گیت
مشگلون گر واردی باب اللهه گیت
.
کیمدی بابُ الله باصوت جلی
عرض ایدوم بول که اودور مولا علی
.
زینت عرش الهی دور آدی
قلبه آرامش ویرر مطلق یادی
.
اول امامین نچّه بافضل اوغلی وار
بیر آلا گوزلی ابوالفضل اوغلی وار
.
حق یانندا وار اونا بیر آبرو
هر شهید ایلور مقامین آرزو
.
وار ارادتمند هر یرده اونا
معتقددور ارمنی لرده اونا
.
حقّی خوش وجهیله اعلان ایلیوب
نقدِ جان قربان جانان ایلیوب
.
هر نه اصرار ایتدی اول کان وفا
ویرمدی رخصت غریب کربلا
.
عرض ایدردی ای گل گلزار عشق
اولمیوب اولماز بیله بازار عشق
.
اذن ویر محنتدن آزاد ایت منی
من غلامم سن آقا شاد ایت منی
.
دوزدی سن شهزاده سن من نوکرم
نا امید ایتمه منى ایله کوم
.
سیّدی گور دلده آهِ سردیمی
آرترور لب تشنه قزلار دردیمی
.
آخر عمرینده شهِ خیبر منی
یوخسا ویرموبدی سنه نوکر منی
.
فرض ایله ای شاه من نالایقم
خاک پایونده ویریم جان شایقم
.
سن امامیم سن رعیّت من سنه
طاعتون واجبدی بی منّت منه
.
من مطیعم اولسا هر فرمانوه
آند اولا قارداش بو یالقوز جانیوه
.
روز عاشورا او پورِ باادب
رخصت جنگ ایلدی شهدن طلب
.
تلخ ایدوب اما بومطلب کامیمی
تشنه قزلار سلب ایدوب آرامیمی
.
تشنه اطفالون منه آغلور باخور
یاندیرور اکبادیمی یکسر یاخور
.
بیر کسون یوخدور من آگاهم اؤزوم
قالمیوبدور منده واللهی دؤزوم
.
تا ایشیتدی بو سوزی شاه آغلادی
داغلانان دلدن چکوب آه آغلادی
.
ایتدی فرمایش بو عشقه مرحبا
حق سنه خیر الجزا ایتسون عطا
.
توکمه رخساره بو قدری اشگوی
چگنوه سال قارداشیم سو مشگوی
.
یانی اطفالیم عزیزیم قیل شتاب
گیت گتور اولسا اگر بیر مشگ آب
.
تا وزیر آلدی بو حکمی شاهدن
اشگینی سیلدی او روی ماهدن
.
شوقدن آز قالدی که پرواز ایده
شاهه عشقین ایستدی ابراز ایده
.
خاص بیر تکریم ایدوب قارداشینه
تا آلوب رخصت دولاندی باشینه
.
عرض ایدوب ای شاه بی یار آغلاما
چوخ غنیمتدور بو دیدار آغلاما
.
حکمون الله امریدور ای بی پناه
ایلرم اجرا خدا اولسون گواه
.
کسب قیلّام خدمتونله آبرو
من گتورّم ئولمَسَم البته سو
.
هر ایکی قارداش گوزونده اشگ تر
ایلیوبلر درد دل تا بیر قَدَر
.
صحبت ایلوب دلده آه آیریلدیلار
بیر بیریندن مهر و ماه آیریلدیلار
.
خیمیه رَجعَت ایدوب شاه شهید
یوز قویوب میدانه سردار رشید
.
گلدی دوردی مرکز میدانیده
دل آچوبدور نطقه بو عنوانیده
.
کوفیان ظلموزده طغیان ایتموسوز
قلبینی پیغمبرون قان ایتموسوز
.
ادّعا ایلورسوز ای قوم کَفَر
امّتِ پغمبروخ دوزدور مگر
.
سیز اگر وارسوز پیمبر امّتی
گورموسوز لب تشنه قالموش عترتی
.
ظلم الیله باغلیوبسوز سو یولون
چوخ بیوک ظلم ائتموسوز آگاه اولون
.
بو جفادن ای دنی لشگر سیزه
خصم اولار محشرده پیغمبر سیزه
.
بو حسینی که اسیروزدور سیزون
ظلم الیله دستگیروزدور سیزون
.
بولموسوز آیا بو حیدر اوغلیدور
سبط طاهادور پیمبر اوغلیدور
.
قان اولوبدی تشنه دللر بولموسوز
یا بونی سبط پیمبر بولموسوز
.
کیم دیوبدور بیر بیله بیرحم اولون
رحم ایدون آخر آچون نهرین یولون
.
تشنه لیقدان قزلاری دلخسته دور
شیرخواره اصغری جان اوسته دور
.
من سیزیله گر چه صحبت ایلورم
واقعاً امّا نصیحت ایلورم
.
اولموشام ظلموزله گرچه سینه تنگ
ویرمیوب شاهیم منه فرمان جنگ
.
سو یولون گر آچماقا ائتسز اِبا
نیلرم بو چولده عالِمدور خدا
.
سیزلری شمشیر اودیله داغلارام
یکسره نهری خیامه باغلارام
.
فکر ایدور گر ابن سعد فتنه گر
نهره مستحفظ قویوب دوت مین نفر
.
مطلقا بولسون که فکر خام ایدور
بی جهت دور که اوزون بدنام ایدور
.
سو آپارماق امر و فرماندور منه
بو فراتی آلماق آساندور منه
.
وار اونون باشیندا گر چوخ پهلوان
سو یرینه آخمامیش بو چولده قان
.
بولسون اما منده حیدر اوغلیام
مرتضانون من دلاور اوغلیام
.
گر چه شاه لافتا دلبندیَم
نوکرم امّا بو شاهه بندیَم
.
گر چه درد و غصّه لر دلگیریَم
شیر حق اوغلی حسینون شیریَم
.
اهل دل آنلار اورکده رنجه می
شیر غرّان قیترنمز پنجه می
.
گوردی اول دل دادۀ عشق اله
ذرّه جه لشگرده یوخدی انتباه
.
بولدیکه هر قلبه یاتماز موعظه
کوفه نون اهلین آیتماز موعظه
.
ال آتوب شمشیرینه حیدر کیمی
ایلیویدور حمله شیر نر کیمی
.
حمله ایتدوقجا أو مرد نامدار
مثل روبه لشگر ایلردی فرار
.
قاچدی لشگر آلدی نهری اول جوان
ویرمدی اشراره بیر لحظه امان
.
وارد اولدی نهره مانند نهنگ
مشکینی دولدوردی اوّل بی درنگ
.
باخ گینه اول نامدارون هوشینه
مشگینی شوقیله سالدى دوشینه
.
دولدوروب اوجون ایده بیر جرعه نوش
تازه بیر اندوه و درده اولدی توش
.
بیر سویا باخماق پوزوبدور حالینی
گوردی گویا قیزلارین تمثالینی
.
تشنه لیقدان جمله اولموش بیقرار
الده سو جامی دوروبلار انتظار
.
چکدی خجلت شرم ایدوب اول ذاتی پاک
غیرتیندن آز قالوب اولسون هلاک
.
یاندى قلبی غصّه دن اولدی کباب
ایلدی اوز نفسینه گویا خطاب
.
نه خیالون وار مگر این نفس شوم
ایلوسَن قربانیِ عشقه هجوم
.
سعی ایله شرط وفادن چیخما سن
کلبۀ عشقین حصارین یخما سن
.
ایچمه میش سو یوخسا فرمانده مگر
بیر نفر سرباز عادی سو ایچر
.
خیمه لرده شاه خوبان تشنه دی
ای رعیّت کامل انسان تشنه دی
.
قزلارون رخساره گوزیاشی آخور
عارایله عباس واردور غیرتون
.
نفسینی تنبیه ایدوب اول شهسوار
کسب أیدوب عشّاق آرا عزّ و وقار
.
.
#عباسیه_جواد_آقاخانپور
#عباسیه_شهادت
#ای_اولان_اندوه_و_درده_مبتلا
#ترکی
.
✍️ #زبدةالاشعار ✍️
.
🆔: @nohe_torki
نظر دهید