زبانحال حضرت زینب (س) در کوفه
.
✍️ #زبدةالاشعار ✍️
.
🆔: @nohe_torki
.
حاج حسن رسالور
.
ای اولان حق اوسته دینه تشنه لب قربان حسین
حقی آندور نیزده قارداش اوخی قران حسین
.
.
کربلاده اگنووہ گیدین شهادت جامه سی
جسم پاکون اولدی نامه نوک نیزه خامه سی
دین اسلامون یازلدی قانیله برنامه سی
اولدی مستحکم یخلماز پایۀ ایمان حسین
.
.
آل سفیان ایستدی دینین پوزا احکامنی
سن قیام ایتدون حسین ایچدون شهادت جامنی
قانه باتدون یاسه دوندردون یزیدین کامنی
کاخ ظلمی ایلدون، قانیله سن ویران حسین
.
.
قویمادون دنیاده خار اولسون حسین قرآنوی
دین اسلامه فدا ایتدون لب عطشان جانوی
گلشن اسلامه ویردون سو یرینه قانوی
تازه گل آچسون همیشه هر زمان هر آن حسین
.
.
زینبی قارداش حسین اوچ گوندی گوزدن آتموسان
قانیوی تپراقلارا کرببلاده قاتموسان
عالمین کول باشینه قارداش کول اوسته یاتموسان
کیم آپاردی ایتدی مندن باشوی پنهان حسین
.
.
زینبین قلبینده وار قارداش حسین غم یاره سی
چاره ایله دردیمه ای چاره سیزلر چاره سی
دردیمون درمانی قرآندور اوخی کهف آیه سی
ساکت اولسون چالماسون کف فرقۀ عدوان حسین
.
.
نیزه دن قارداش حسین باخ قان اولان گوز یاشیمه
اهل کوفه خارجی آد قویدی آل هاشمه
بام لردن داش آتولّار کول توکولر باشیمه
ظلمده طغیان ایدوب بو فرقۀ عدوان، حسین
.
.
کسدیلر دین اوسته باشون حضرت یحیی کیمین
قانه دوندی قلب زینب، قانلی بیر صحرا کیمین
من ولی صبر ایلرم قارداش آنام زهرا کیمین
باشه یتسین امتحانیم قالماسین نقصان حسین
.
.
ای «رسالور» قلم محنت قطارین باغلادی
زینبون قلبین دوباره اهلی کوفه داغلادی
ایله ظلم اولدی جداده قانلی باشلار آغلادی
نیزده اولدی باجی احوالینه، گریان حسین
.
.
.
#کوفه_حسن_رسالور
#ای_اولان_حق_اوسته_دینه_تشنه_لب_قربان_حسین
#ترکی
.
✍️ #زبدةالاشعار ✍️
.
🆔: @nohe_torki
نظر دهید