شهادت حضرت امام حسن مجتبی (ع)
..
..
مرحوم اعظمی تبریزی
..
..
ای اولان زهر جفادن
باغری قان مظلوم حسن و ای
زایری پوزقون مزاری
آغلادان مظلوم حسین وای
..
..
ایله پوزقوندی مزاری
وار بیر عمری آہ و زاری
چوخ پوزار زوّارین حالین
قبرینه دوشسه گذاری
گون قباقینده قالوبدور
غصّه لی پوزقون مزاری
سس گلر خاک بقیعدن
هر زمان مظلوم حسن وای
..
..
قبرینه هر کیمسه باخسا
ایله بیر پوزقون چمندی
بیر بیره زوّاری سویلر
بو همان مظلوم حسندی
جور و ظلم اشقیادن
خاطری درده گلندی
ای ویرن غم مکتبینده
امتحان مظلوم حسن وای
..
..
زایری گیزلینجه اوردا
مجلس ماتم قورالّار
حسرتیله تا اوزاقدا
بوینی چگننده دورالّار
هر زمان توزلی مزارین
اؤپسه زوّاری ورالّار
سسلر اوردا یانه یانه
شیعیان مظلوم حسن وای
..
..
قلب دنیایه ملالی
حسرتیله اود وروبدور
هانسی مولا جان ویرنده
لبلرینده قان دوروبدور
ایمدی جنّت ایچره زهرا
مجلس ماتم قوروبدور
دمبدم گوز یاشلی سسلر
باغری قان مظلوم حسن وای
..
..
هر کیمه یوز ویرسه محنت
سینه ده ساخلار ملالی
تا گلوب ایوده عیالین
اوز غمیندن ایلر حالی
کیم گوروب مرد غیوره
زهر ویرسین اؤز عیالی
ای دوزن هر بیر جفایه
مهربان مظلوم حسن وای
..
..
بو ملالون عالم ایچره
زینبه چوخ نسگل اولدی
ایستدی بیر طشت اوندان
غصّه دن رخساری سولدی
طشتی آلدون لخته لخته
قان گلوبدور طشت دولدی
آغلادی یر گوی دولوبدی
آسمان مظلوم حسین وای
..
..
آز دگولدی غصّه دردی
دلده دردین چوخلیوبلار
گور نجه حامی دینی
حرمتیله یوخلیوبلار
ظلمیله تابوت ایچینده
گل وجودین اوخلیوبلار
ایمدیده سسلله گویده
قدسیان مظلوم حسن وای
..
..
غملی حالون جان ویرنده
عالمی ناره یاخوردی
اود دوتوب قلبون یانیردی
گوزلرون حسرت باخیردی
اللرون قلبونده اما
لبلروندن قان آخوردی
ای اولان درد و محندن
ناتوان مظلوم حسن وای
..
..
جسمدن رخت کدورت
قوم کینه سویمیوبلر
هر قدر ظلم ایلیوبلر
هیچ جفادن دویمیوبلر
قبر پیغمبر یانیندا
دفن ایدنده قویمیوبلر
ای ملالی شیعیانی
آغلادان مظلوم حسن وای
..
..
اعظمی دئ وای حسن وای
گلستاندا گل سولاندا
قبرینی ایسته خدادن
ابر نیسان تک دولاندا
بو سوزی ورد زبان ایت
قبرینه زوّار اولاندا
ای اولان زهر جفادن
باغری قان مظلوم حسن وای
..
..
#حسنیه #اعظمی_تبریزی #حسنیه_شهادت #ترکی #زبدةالاشعار
نظر دهید