رجز حضرت ابوالفضل العباس علیه السلام با لشگر کفار در افتادن دست راست
.
✍️ زبدة الاشعار ✍️
.
🆔: @nohe_torki
.
مرحوم ذهنی زاده
.
ای جماعت تا وارام اسلامه نُصرت ایلرم
صاق اَلیم گیتدی صول اَللی دینه خدمت ایلرم
.
.
تا منی گهواریه سالدی آنام اُمّ البنین
ویردی بیر سوت سینه دن هر قطره سی آئین دین
بسلدی دینه منی حامی امیرالمؤمنین
جوهر ذاتیمدی دینیمدن حمایت ایلرم
.
.
بو حمایت نه فقط قید حیاته بسته دور
نه بو عرصه گاهیده سعی و ثباته بسته دور
بلکه تأثیرات اصلیسی مماته بسته دور
جان ویرم بو یولدا تحصیل نتیجت ایلرم
.
.
گرچه من شهزاده فرزند رشید حیدرم
لیک بو یالقوز اوغولسوز شهریاره چاکرم
دینیم امر ایلور بو شاهون نُصرتینده جان ویرم
جان و دلدن دینیمون امرین اطاعت ایلرم
.
.
صادر ایتسِیدی منه سلطانیم امرِ کارزار
ضرب تیغیله آلاردیم روزگاروزدن دمار
نیلیوم مأمور ایدوب تحصیل آبه شهریار
شاهیمون اجرای فرمانینده دقّت ایلرم
.
.
قالمیوب باشدا هوای مِیمنه یا مِیسره
بو امیده سو ویرم تشنه بنات حیدره
لامحاله بیر ایچیمده شیرخواره اصغره
من اولام سقّا او قالسون تشنه حسرت ایلرم
.
.
هانسی مذهبده روادور ای گروه کین شعار
اوچ گیجه گوندوز نه سوت نه سو تاپا بیر شیرخوار
تشنه لیقدان درک ایده شش ماهه طفلی احتضار
من او وضعِ حالِ رقّت باره رقّت ایلرم
.
.
تشنه لر امری اولوب منجر عطشدن بیر یره
آز قالور خیردا اوشاقلار تشنه لیقدان جان ویره
ناروادور نامسلمانلار بو ظلموز کافره
منتقم قهّاره ظلموزدن شکایت ایلرم
.
.
سیزده وار بیر خواب غفلت کی اویانماز یاتموسوز
جِبت و طاغوتی دوتوب حبل المتینی آتموسوز
تولانوب آز جیفۀ دنیایه دینی ساتموسوز
انتباهوزده اُلومدن استعانت ایلرم
.
.
اَل کی مندن ای گروه پَست فطرت سالموسوز
بولموسوز هانسی اَلی سیز بی مرّوت سالموسوز
پیکر اسلامیدن بیر دست قدرت سالموسوز
حقّیدن اسلامه استدعای قدرت ایلرم
.
.
شاهبازِ شاهیدن مکریله سالدوز شاهپر
اوستومه دورت بیر طرفدن پَر آچوب تیر سه پَر
بسکی اوخ وردوز وجودیم اوخدان آچدی بال و پَر
بو وجودی شاهیمه شاهینِ دولت ایلرم
.
.
اوستومه هر قدر یاغدورساز خدنگ اوسته خدنگ
حیدر کرّار اوغلی حمله دن ایتمز درنگ
شعله لندیرسوز نقدری آتشِ سوزانِ جنگ
یانماقا مثل سمندر منده سبقت ایلرم
.
.
بیر سو مشگی اوسته یوزمین اوخ کماندان رَد ایدون
اوخ اَلیندن مشگی حفظ ایتماق طریقین سَدّ ایدون
سیز کمانِ ظلمی پی در پی خمیده قد ایدون
عاقبت منده حسینی قوس قامت ایلرم
.
.
سیز بوگون بیله بولورسوز ای گروه کینه جو
بو کشاکشده کلید فتحدور بیر مشگ سو
مشگی اوز قانیمله دولدورام سودا نه آبرو
قان قِبالینده سوئی بی قدر و قیمت ایلرم
.
.
ثابتم عَهدِ اَلستیمده بلا پیمانینه
تابعم صدقیله دلدن کربلا سلطانینه
قان گوارادور سودان لب تشنه شَه قربانینه
جان سوسوز ویرَّم بو یولدا جانه منّت ایلرم
.
.
من فدای کوی حقّم حق طریقین گیچمرم
نَفسیمی نَفسِ حسین بن علیدن سیچمرم
نیلورم سو سلسبیل و کوثر اولسا ایچمرم
تا حسینیم ایچمیوب سو تابعیت ایلرم
.
.
گورمدوز آلدیم فراتی ضرب تیغ تیزیله
توسَنی وردوم سویا مهمیزِ خارانگیزیله
ایچمدیم سو بو دل عطشان آتش بیزیله
ایمدیده سو ایستسه نفسیم ملامت ایلرم
.
.
ظاهراً غملی گوگُل سو مشگینه مشعوفدور
همّتیم سعییم تلاشیم حفظینه مصروفدور
باطناً مشگیم سولی پیکانیله مألوفدور
ایمدیدن بو محنتیله طرح اُلفت ایلرم
.
.
اَل تاپار بولَّم بو یولدا فرقۀ گُمرَه منه
آرزو طوماریمی ظلموز ایدر کوتَه منه
پرچمین امّا امانت تاپشوروب چون شه منه
هر خیانتدن مَصون حفظِ امانت ایلرم
.
.
سعی ایدورسوز پرچمیم یاتسون بوگون جنگاهیده
تا قویا شورِ قیامت بارگاهِ شاهیده
قویمارام قویسامدا حکماً باش و جان بو راهیده
التزامین قامتِ شورِ قیامت ایلرم
.
.
گر یره گوگلر توکولسه عالم اولسا تار و مار
حاش للّه پرچم اسلام اولسون خاکسار
بیر قیامت شوری قامت اوسته قیلّام استوار
حشر اولونجا اهتزازین من ضمانت ایلرم
.
.
تا اَلیمده قبضۀ شمشیر خون آشامدور
شاهد فتح و ظَفَردن اهل کین ناکامدور
قویمارام یاتسون بو بیرق بیرق اسلامدور
خاکسار اولسامدا نصبِ اوجِ رفعت ایلرم
.
.
بسکی اولدوز غفلتیله جمله سرگرمِ قِتال
بولمدوز هر توکدوقوز قان اوز قانوزدور لامحال
ایتدی قصد قربتوز اسلام دینین پایمال
من بو باطل قصد قربتدن برائت ایلرم
.
.
سیز هر اندازه اوزاقسوز عترت یاسینیدن
بیر اوقدری فاصله وار دیندن آئینیدن
مکّه ده معلوم اولوندی بی خبر سوز دینیدن
مایل اولساز من سیزی دینه هدایت ایلرم
.
.
امن ایوین ناامن قیلدوز بیتین اوز اصحابینه
عرصه نی تنگ ایلدوز حلّ و حَرَم احبابینه
بیزده گلدوخ بو چوله اتمام حَج آدابینه
حجّیمون تکمیل نقصانیده همّت ایلرم
.
.
باغلیاندان کعبه دن بو وادیه احرام غم
وردیمیز لبّیکیدی یولّاردا صبح و شام غم
عاقبت بو سرزمین ایتدی بیزه اتمام غم
انتهای غمده شُکر بی نهایت ایلرم
.
.
هر طوافیم قورتاروب دورِ سرای حقّیده
آز قالوب سعییم باشا یتسون صفای حقّیده
قوچ کیمی قربان کَسیلّم بو مِنای حقّیده
کربلانی کعبۀ اهل حقیقت ایلرم
.
.
قیلماقا ختم طوافه حکم حجّیله نماز
باشلادیم عالی تیمُّم ممکن اولماز دستماز
بو تیمُّمدور منِ ممتازه مخصوص امتیاز
توپراقا ورّام اَلی بیر بیر کفایت ایلرم
.
.
صاق اَلیم توپراقدادور ای فرقۀ بیدادگر
ختمیدور امر تیمُّم صول اَلیمده دوشسه گر
اوندا دوشسم سجده حالینده نماز اولماز مگر
نیلیوم بیر سجدیه لابُد قناعت ایلرم
.
.
منّت اللّهه همان سجدَم نه عادی سجده دور
مثلی اولماز بیر تذلّل آستانِ مجده دور
کربلانون مایۀ فخری حجاز و نجده دور
حاش للّه بو مباهاته منیت ایلرم
.
.
بیر جماعتدن اولار کی قانه غلطان ایلدوز
آق محاسینلر کی آلقانیله اَلوان ایلدوز
سَرو قامتلر کی توپراقیله یکسان ایلدوز
فرد فردین مصرعین سجدَمده تربت ایلرم
.
.
باصفا سعی خیام اوسته نه جای هلهله
ایلرم بین فرات و خیمه گهده هَروله
ایتمیون تحلیقیمه تعجیل صبر ایلون هَله
من اوزوم باشیم آچوق قالجاق اشارت ایلرم
.
.
من گَرک آئینِ حَجّیله ایدم رَمی جَمَر
سیز منه رَمی ایلوسوز ای قوم کین تیر سه پَر
مُحرِمه دینوزده حُرمت تیرباراندور مگر
من کی هر اوخ گَلسه سینم اوسته حرمت ایلرم
.
.
ناوک دلدوزه کیمسه مایل اولماز من کیمی
خوشدلم اوخلار دوزولسون سینمه مخزن کیمی
نوک پیکان چولقاسا بو قامتی جوشن کیمی
جوشنه مردانه بو قامتله زینت ایلرم
.
.
«ذهنیِ سائل» کی خادمدور بیزه ایستر صله
ایستوری زنگ غم دارینی قلبیندن سیله
نخل امّیدین ایکی دنیا یتورَّم حاصله
مشگله هر لحظه دوشسه حَل او ساعت ایلرم
.
.
#عباسیه_شهادت
#ای_جماعت_تا_وارام_اسلامه_نصرت_ایلرم
#ترکی
✍️ #زبدةالاشعار ✍️
.
🆔: @nohe_torki
نظر دهید