ای زهرۀ زهرا شرف عالم خلقت #فاطمیه_فخر_تبریزی

مدح و شهادت حضرت فاطمه الزهرا سلام الله علیها
.
زبدة الاشعار
.
: @nohe_torki
.
محمود #فخر_تبریزی (نالان)
.
ای زهرۀ زهرا شرف عالم خلقت
وی همسر و هم سر علی شاه ولایت
.
ای دخت نبی لفظ فداهایه مخاطب
وی کاسه صبری غم و دردیله لبالب
ای حجب و حیا مظهری صدیقه ملقب
بیر کیمسه ده یوخدی بیله شان و بو جلالت
.
اوخشاتسام اگر صورتیوی مهره خطادور
مین لرجه مه و مهر بو درگاه گدادور
قرآندا سنی وصف ایلین ذات خدادور
ذاتوندی ویرن جوهره عزته عزت
.
ای هیکلی باشدان ایاقا عصمت و تقوا
مثلون نه گوروبدور نه گورر گنبد مینا
شانونده بو بسدور بیوروب خالق یکتا
زهرادی اولان علت پیدایش خلقت
.
نوروندان آلوب جلوه هامی عالم امکان
وار هانسی یارانمیشدا بیله عزت شایان
هانسی آتا سویلوب قیزینا من سنه قربان
تنها سنه مختص دی بیر بیله فضیلت
.
ریحانه طاها و گل باغ وفاسن
تندیس وقار و شرف و صدق و صفاسن
باشدان ایاقا مظهر توحید حیاسن
زیبنده دی الحق سنه بو عزت و شوکت
.
قرآندی حجاب اهلنون عالمده کتابی
نسوان گرگ سندن آلا درس حجابی
ای عصمتی حیرتده قویان شیخیله شابی
عورتلره زینت یارادار عصمت و عفت
.
مافوق تصوردی مقامات و جلالون
حوریلری حیرتده قویار حسن جمالون
نه یاپه دور پایه اوصاف کمالون
بولمز بیری مقدارینی الا ید قدرت
.
بولمم نه دیوم دشمن ایدن جور و جفادن
گچدوقجا گونون رنگ رخون دوشدی صفادن
ایتدون طلب اوز مرگوی درگاه خدادن
گوردون زبس اشراریدن آزار و اذیت
.
نه پایه دور دلده اولان سوزیله سازون
واضح اولی تفسیر اولا گر راز و نیازون
کوتاه ایلدی کثرت غم عمر درازون
چکدی لب مرگه سنی اندوه و مصیبت
.
بیر لحظه غم و غصه کنار اولمادی سندن
تهلیله گیدوب سلب قوا اولدی بدندن
آخر نجه آیریلدون حسینیله حسندن
بیلدون بیر اوزون بیرده اونی خالق رحمت
.
بیر عده اوگون جمع اولوب ایتدیله شورا
ظاهرده مسلمان ولی وابسته دنیا
تصویب ایدوبله که یانا درگه زهرا
هر چند اولا درگه توحید و نبوت
.
ثانی اوزمان حکم الهیه نی داندی
نه ذات خدادن نه پیمبردن اوتاندی
ظاهرده اگر چه ستمیله قاپی یاندی
باطنده یانوب قلب جهان بشریت
.
یاندی قاپی یاندوردی او اود کل جهانی
سلب ایلدی زهراده اولان تاب و توانی
امداده چاغوردی اوزمان شاه ولانی
سرعتله چخوب شیر خدا صحنه او ساعت
.
گوردی یخلوب یار و هواداری علی نون
سسلندی دور ای غم گونی غمخواری علی نون
سنسیز پوزولار رونق پرکاری علی نون
سنسیز کیم علیدن ایدر عالمده حمایت
.
ای ماملکون مایه امید و رجاسی
وی فیض ویرن مهر و مهه ضوء و ضیاسی
بیر جه باخیشوندان اولی مین درد دواسی
ای نفسی اولان مظهر احسان و عطوفت
.
ای عالمی حیرتده قویان جاه و جلالون
نه علته گل تک سارالوب رنگ جمالون
بو قلب علیدن چیخا مشکلدی ملالون
تا حشر منی یاندیراجاق دلده بو حسرت
.
ای لعل لبی فیض ویرن آب حیاته
سندن صورا وابسته لیقیم یوخدی حیاته
وار چوخلی علاقه ولی گوگلومده مماته
ایکاش گله پیک اجل ایلیه راحت
.
نه ظلم اولونوبدور دوتولوب عارض ماهون
ساطع دی گویه دلده اولان شعله آهون
ویرمز ایکی دنیایه علی نیمه نگاهون
آچ گوزلروی باشیمه سال ظل عنایت
.
ای نفسی مثل آیه مشکاتیله نوره
موسانی چکن نورون اولوب وادی طوره
مشکلدی بو غم دهرده هر مرد غیوره
گورسه حرمین نقش زمین قولدا علامت
.
ای غملر الندن آغاران زلف سیاهی
وی درد دلی تیره ایدن انجم و ماهی
بر پا اولا گر محکمه عدل اللهی
نه سوزلری وار ایتسن اگر اوندا شکایت
.
هانسی الی شل یخدی یره قد رساوی
اولدی گونوزون لیله دیجوره مساوی
جان گوشی آلان وقته حزین طرز صداوی
سلب اولدی توان گتدی اورکدن داخی طاقت
.
اغیار گلوب دایره عشقی دولانماز
بیر نکته مبهمدی بو هر کیمسه قانانماز
زهرانی سون دل شرر دوزخه یانماز
مختصیدی زهرایه فقط حکم شفاعت
.
عاجزدی بیان خامه ده یوخ طاقت و یارا
لال اول دیمه نه علته ضعف ایلدی زهرا
آغلار گوزیله صدقیله عرض ایله خدایا
بیر وقفه بو ” نالانی ” بقیعه ایله دعوت
.
#فاطمیه_شهادت
#ای_زهره_زهرا_شرف_عالم_خلقت
#ترکی
.
#زبدةالاشعار
.
: @nohe_torki