ای ساربان اماندور ساخلا بو غم قطاری #اربعین_فانی_اهری

اربعین
.
.
.
مرحوم میرزا محمود فانی اهری
.
.
ای ساربان اماندور ساخلا بو غم قطاری
بو چولده دور یقیناً قارداشمین مزاری
.
.
عطر حسیندن اولدی گلزار جان معطّر
شوق لقای جانان الدن آلوب قراری
.
.
چون ساربان بو سوزدن دوشدی بیر اوزگه حاله
گوردی تمام عالم باتمیش غم و ملاله
هم ناقه لر ایدولّر ناقوس کیمی ناله
قالمادی بیر نفرده یول گیتماق اختیاری
.
.
دوشدی کجاوه سیندن زینب بآه و افغان
کلثوم هم سریّه اطفال زار و گریان
زین العباد بیمار با خاطر پریشان
شوقیله آختاروردی قبر حسین زاری
.
.
سجّاد او دم که گوردی ناگه او پاک خاکی
هم دوشدی اضطرابه اول قلب دردناکی
علم امامتیله تاپدی او قبر پاکی
بلدی همان او یردور کرببلا دیاری
.
.
بیر سمته دقّتیله باخدی او شاهزاده
گوردی او یرده واردور بیر مدفن فتاده
قوشلار او پاک یرده ویرموش قناد قناده
گویا بولودلانوبدور چرخ فلک کناری
.
.
زینب نظاره ایتدی اول دمده چون امامه
بیر یرده گوردی اول شه الده دوتوب عمامه
بیر پاک تربت اوسته مشغول اولوب سلامه
گوزدن آخاردی یاشی چون ابر نو بهاری
.
.
«فانی» بو بزم غمده یاندورما دل حزینی
ایله رضا اورکدن بو یرده شاه دینی
قورخما یتر تمامه ایّام اربعینی
هر دو جهاندا اجرون یوخدور یقین شماری
.
.
#اربعین #فانی_اهری
#ای_ساربان_اماندور_ساخلا_بو_غم_قطاری
#ترکی
#زبدةالاشعار