زبانحال حضرت رباب علیها سلام در فراق فرزند
..
..
مرحوم انور اردبیلی
..
..
سرگرمم على بزم عزاده گیجه گوندوز
گوز یاشیم آخور صحن صراده گیجه گوندوز
..
..
هر بیر گوزوم اولموش منه بیر چشمۀ گریان
گوز یاشی قوتارسا مژه لردن اَلرَم قان
آدون دیلیمون ازبری دور آدوه قربان
عشقونله انیسم بو بناده گیجه گوندوز
..
..
آغوشه آلوب درد اودی بو سینه نی اوغلوم
شعله نجه آغوشه آلار خرمنی اوغلوم
سن گرچه یادوندان چخادوبسان منی اوغلوم
اما سالورام من سنی یاده گیجه گوندوز
..
..
غم سهمی منه خوان مصیبتده چوخ اولدی
سرمایم علی بیر گونون عرضینده یوخ اولدی
بال و پریمی سندیران اوچ شعبه اوخ اولدی
قالدیم بیله طوفان بلاده گیجه گوندوز
..
..
شِکوه م بو فلکدن دی بیله قورقونی قوردی
هرکیمسه قولی گوجلیدی قول باغلنی وردی
صیادّون او گونکه سنیله یوز یوزه دوردی
هر لحظه غمیم اولدی زیاده گیجه گوندوز
..
..
عمّون منی چوخ دعوت ائدور کولگه مکانه
چولدن بویورور آغلاماقا یاخشیدی خانه
آخر نه روا جوجه سی یوخ بیر قوشا لانه
بی لانه قوشام آه و نواده گیجه گوندوز
..
..
عرض ایلیورم اولما خانم حالمه حسّاس
دعوت منی ایتمه ایوه سن بُل آقام عبّاس
سن سایه لی منزلده علی اصغره دوت یاس
منده ملیوم صحن سراده گیجه گوندوز
..
..
آخر گیجه سی عمریوون اولدی سنه دشوار
اولمادی دوشومده صودوم ای طفل لبن خوار
قالدون أو حرارتلی چادردا گیجه بیدار
حقّیمدی گلم ناله و داده گیجه گوندوز
..
..
باخدوقجا سولان صورتیوه فکری پریشان
خجلت تری اوغلوم بُورودی آلنیمی هر آن
بلمم قوریوب نهر فراتون سوئی الآن
یا موج ورور کرب و بلاده گیجه گوندوز
..
..
دیلسیز بالا قلبیمده منیم سوز نهان وار
بو علّته منده بیله سوزشلی بیان وار
قبره نقدر گتمه میشم جسمده جان وار
نفرین ایدرم اهل عناده گیجه گوندوز
..
..
قبروندن اوزاق دوشدی رباب ایتمه گلایه
حسرت چکورم اوز قویام أول خاک شفایه
اذن اولسا بی بوندن گلرم کرب و بلایه
یول باشلیارام پای پیاده گیجه گوندوز
..
..
#اصغریه #نور_اردبیلی #حضرت_رباب_انور_اردبیلی #حضرت_رباب #ترکی #زبدةالاشعار
نظر دهید