زبانحال امام حسین (ع) در بالین قمر بنی هاشم (ع)
..
..
مرحوم حاج حیدر خسروشاهی (حزین)
..
..
ای سرسپاه لشگر دین مبین قارداش اویان
دین مبین سلطانینه حصن حصین قارداش اویان
..
..
عالمدی گرچه حق اوزی حقدن اوتوردی نهضتیم
آللاهدان اؤزگه بیر کسه یوخ اتّکال قدرتیم
سنله ولی بو عرصه ده تأمینیدی امنیتیم
ای آل طاهایه بوگون حبل المتین قارداش اویان
..
..
بو عرصه ده سن بیر الهی لشگره سردارسن
دین مبین غمخوارینه بیر مهربان غمخوارسن
من جدّیمه بنزر بوگون سن حیدر کرارسن
ای شیر داور مظهری ای بیقرین قارداش اویان
..
..
ای اعتباریم عزّتیم غم یولداشیم آرخام ائلیم
وای قارداشیم وای سسلیوم اولمور رضا غملی دلیم
دور دوت الیمدن یالقیزام قارداشسیزام گلمور بئلیم
ای هر چتینلیقدا منه یار و معین قارداش اویان
..
..
سن چرخ آل هاشمه قارداش فروزان ماهدون
اهل حرم احوالینه هر حالده آگاهدون
بو امن سیز اطفالیمه بیر محکم ایمنگاهدون
اطفالیمون سنسیز ایشی اولدی چتین قارداش اویان
..
..
بو آدلاری اسلامیان دینون ستونین یخدیلار
الله اکبر سسلیوب آللاه سوزوندن چیخدیلار
اهل ولانین حشره تک قلبین بو غمده سیخدیلار
کُفّار الینده ای اولان قربان دین قارداش اویان
..
..
سن نه گوزل درک ایلدون قارداش أخوّت عالمین
گزدون بو چولده سر بسر مهر و محبّت عالمین
ایستکلی قارداش قارداشین درک ائتسه فرقت عالمین
دلدن دوشر بئلدن سینار ایله یقین قارداش اویان
..
..
تک نه منم دلدن یانان بیله اسفلی حالوه
هر اهل دل باخسا یانار بو غم اثر احوالوه
ای شاهباز اوج حق نه گلدی پرّ و بالوه
کرکس صفتلر ائتدیلر بیله کمین قارداش اویان
..
..
قارداش بیر احواله سالوب بو لشگر اعدا سنی
سالسا ایاقدان واریری بو محنت عُظما منی
آیدیندی نیلر قهرله ال تاپسا اعلایه دنی
یانسا ئولونجه حقّی وار امّ البنین قارداش اویان
..
..
سنده مجاهد کلمه سی بیر معتبر معنا تاپوب
لفظ أخوّت موبمو تفسیر اولوب منشأ تاپوب
مهر و وفا شرحین یازان بیر مدرک زیبا تاپوب
بو مدرکه ثبت ائتماقا فضل نوین قارداش اویان
..
..
ای حق مرام اوسته گیچن شوقیله باش و جاندن
اوز وارلیقیندان ال چکوب ال چکمین ایماندن
پیمانۀ جسمون سینوب سن دونمدون پیماندن
ای طینت پاکی وفائیله عجین قارداش اویان
..
..
سن چوخ بلا گوردون ولی رسم وفادن گیچمدون
آلدون سوئی اما سودان چیخدون سوسوز سو ایچمدون
معناده نفس پاکوی مندن برادر سئچمدون
بو عشقه بو ایثاره احسن آفرین قارداش اویان
..
..
ای آستان اقدسی ارباب حاجاته رجا
باب الحوائج سن کرامت چرخنه بدر دجا
وار حاجتی سویلر «حزین» سلطان دینون قؤلوجا
ای سرسپاه لشگر دین مبین قارداش اویان
..
..
#عباسیه #حزین_خسروشاهی #عباسیه_شهادت #ترکی #زبدةالاشعار
نظر دهید