شجاعت و شهادت حضرت ابوالفضل ( ع )
..
..
غفاری زنجانی
..
..
دوشوب سس اشقیا ایچره گلور صاحب لوا عبّاس
او لشگر جاننه وحشت سالوبدور بر ملا عبّاس
..
..
گیدور صولتله میدانه آتاسی شیر داور تک
عتاب اوسته گلوب ایستر گیده صفینه حیدر تک
ایدر میدانی نورانی جمالی ماه انور تک
الینده پرچم نصر من الله واردی جعفر تک
سوسوزلار دلده ازبر دور ایدر دلدن بُکا عبّاس
..
..
مسلّح دور گیدور جنگه آچوبدور بیر علم باشدا
واریدی کوفه و شام اهلنه نقش عدم باشدا
ایدر عطشانلارون فکرین هزاران درد و غم باشدا
سو جامی اللرونده ساخلیوب اهل حرم باشدا
دعا ایلردیلر گلسون دوباره مه لقا عبّاس
..
..
یتیشدى لشکر کفره علینون مه جمال اوغلی
یوزون دوندردی اول قومه ولىّ ذوالجلال اوغلی
آچوب نطق گهربارین اونون شیرین مقال اوغلی
وجاهتده شجاعتده جهاندا بی مثال اوغلی
ایدوب درگاه سبحانه ازل حمد و ثنا عبّاس
..
..
بجادی ایتسه فرمایش اورکدہ چوخ ملالیم وار
سوسوزلار حالینه جاری گوزومده اشک آلیم وار
یانان سوز عطشدن خیملرده چوخ غزالیم وار
قولاق ویرسوز ازل سیزدن نچه کلمه سئوالیم وار
بو غوغادن ندور فکروز گرک آگاه اولا عبّاس
..
..
حسین قارداشیمی نه علّته چولدن چوله سالدوز
بو چولده کشتی آل عبانی سیز گله سالدوز
بنات حضرت پیغمبری چوخ مشکله سالدوز
سوسوزلوق آتشین ای بیحیالر هر دله سالدوز
سوسوزلار دردینه چاره تاپانمور مبتلا عبّاس
..
..
جماعت دست ظلموز غم اوخون داغلی دله چالدی
گلنده خیمدن قیزلار منیم آراممی آلدی
قوری مشگی سکینم ئوز الیله چگنمه سالدی
خدا بلدی خجالتدن ابوالفضل ئولسون آز قالدی
سو قولی ویردی عطشان لبلره بو باوفا عبّاس
..
..
سو جامی الده سرگردان که آل بو تراب آغلار
سوسوزلوقدان سولوب اصغر باخار نالان رباب آغلار
نظاره ایلیر گوگدن بو حاله آفتاب آغلار
اولوب سقاده شرمنده توکر هی اشکناب آغلار
تاپانمور چاره سیز درده دوا مشکل گشا عبّاس
..
..
دوباره ایتدی فرمایش او قومه حضرت عبّاس
دوتوبدور قلبوزی بغض على من ایلورم احساس
امامه باغلادوز سو یولارون ای لشکر خنّاس
جوان ماه روسین دوغرادوز لیلا دوتوبدور یاس
علی اکبر فراقینده ایدر دلدن نوا عبّاس
..
..
غرض بو نوعیله عبّاس او قومه شرح حال ایتدی
نصیحت آلمادی گویا او لشگر قیل قال ایتدی
بو اوضاع مرتضی اوغلون چوخ آشفته خیال ایتدی
فرومایه جماعتدن او دم سلب مجال ایتدی
ایدوبدی لشکره حمله او پور مرتضی عبّاس
..
..
دییر آگاه اولون لشکر منم عبّاس نام آور
علینون نامدار اوغلی حسینه با وفا نوکر
منه پستان همّتدن ویروب سود شیر دل مادر
یوخومدی واهمه ذرّه که یوز بیله اولار لشکر
منم سقّای مظلومان امیر کربلا عبّاس
..
..
چالندی طبل جنگیلر اویاندان لشگر آتلاندی
ایدوبدی خیبره حمله بویاندان حیدر آتلاندی
هزاران حیف یوخدور بیر یانوندا یاور آتلاندی
ئوزى یالقوز سوسوزلوقدان یانوردی لبلر آتلاندی
ایدوبدور کوفه و شام اهلینه محشر بپا عبّاس
..
..
صفوف لشکر کفری داغیتدی تار مار ایتدی
ئولن ئولدی قالان قالدی قاچوب بعضی فرار ایتدی
آچوب سیمرغ تک شهپر سو دریاسین شکار ایتدی
سووندان ایچمدی امّا فراتی شرمسار ایتدی
بو ایثاره بو رفتاره هزاران مرحبا عبّاس
..
..
او قدری گیچمدی اما عوض بو نقش جنگ اولدی
قاچانلار جمع اولوب کامل دوباره تیپ و هنگ اولدی
یاغان اعضایه دوت یاندان سنان اولدی خدنگ اولدی
نه یوز ویردی او سرداره دوباره عرصه تنگ اولدی
سالوب لنگر تراب اوسته قتیل اشقیا عبّاس
..
..
یوزون اخیامه دوندردی دیدی قارداش حسین جان گل
آنام زهرا گلوب آغلار توکر گوزیاش حسینجان گل
منی بو حالدا گورمیدی آنام ای کاش حسینجان گل
دوشوبدی قولاریم تندن سنوبدور باش حسینجان گل
ئوزون عفو ایت سنه زحمت ویرور درد آشنا عبّاس
..
..
..
#عباسیه #غفاری_زنجانی #عباسیه_شجاعت #عباسیه_شهادت #ترکی #زبدةالاشعار
نظر دهید