ای شاهکار خلقت پروردگار اوغول #اکبریه_شاهد_اردبیلی

زبانحال حضرت لیلا (س) در بالین حضرت علی اکبر (ع)
.
.
میر علی عابدیان (شاهد اردبیلی)
تضمین قصیده ی مولانا الحاج سید رضا حسینی (سعدی زمان )تقدیم به روح بلند و ملکوتی حضرتشان
.
.
ای شاهکار خلقت پروردگار، اوغول
حقّون یولوندا ایلموسن جانثار،اوغول
اوخلار ائدیبدی پیکروی استتار اوغول
“توپراقلار اوسته یاتما بئله زخمدار،اوغول
دور گور آنون نه نوعی ائدیر آه و زار،اوغول”
.
.
قان آغلاسام روادی،مَلَک سیرتیم گئدوب
اَلدن پیمبر اوخشاری، مه طلعتیم گئدوب
قلبیم یانوبدی ،دیلده اولان طاقتیم گئدوب
“سنسیز منیم اِئویم یئخلوب،عزتیم گئدوب
دیجور تک اولوب گونوزوم،تیره تار،اوغول”
.
.
یاسلی بیر عدّه همسفرون گور نه آغلاشور!
اولموش غمونده خون جگرون،گور نه آغلاشور
باشلار جداده یوخ خَبَرون،گور نه آغلاشور!
“دور و بَرونده عمّه لرون،گور نه آغلاشور!
آلِ رسوله محشر اولوب آشکار، اوغول”
.
.
نوحه غمونده عترت خیرُ الوَرا ،دیئیر
زهرا عزیزی ،دُختِ شهِ لا فتی، دیئیر
لیلا سنون شجاعتووه،مرحبا، دیئیر
“آغلار باجون سکینه یانار وا اَخا،دیئیر
باخدیقجا قانلی نعشووه،زولفین یولار،اوغول”
.
.
آهیم سمایه اوج ائلیور غملی ناله تک
باشدان آخوبدی توپراقا قانین شلاله تک
جسمون دوشوبدی پاره لنن بیر رساله تک
“قاندان دولوبدی نرگس مستون پیاله تک
گوردوگجه گوزلرون،اولورام اشکبار، اوغول”
.
.
ائتدی بهار عمریمی کیم ظولمیلن خزان
بار مصیبتون ائلیوب قدّیمی کمان
آی تک بؤلوبدی باشووی،شمشیر جان سِتان
“شبرنگ زولفووه دوزولوب،قطره قطره قان
ایلر گوزوم بو زولفووه مرجان،نثار،اوغول”
.
.
بیر عاشقم ،واریمدی علاقم سنه شدید
سن سن منیم حیاتیمه سرمایه ی اُمید
رحم ائتمیوب جاوانلیقووا لشگر پلید
“لب تشنه سو یانیندا،سنی ائتدیلر شهید
اشکیم اودور آخور یوزه بی اختیار،اوغول”
.
.
جلوه وئرر بهاریده،فصل بهاره،گول
خاریله دوشمیوبدی سنون تک حصاره،گول
ای لیلینون امیدی گوز آچ بیر دوباره،گول
“بیرگولسِتاندی نعشون، آچوب قانلی یاره،گول
گلچین ائدیبدی گولشنیمی تار و مار،اوغول”
.
.
گوگلی اولان زمان سنی خلق ایلمیشدی حق
افسوس او مه جمالووه قاندان دوشوب شفق
دردون بو داغداره علی! قویمیوب رَمَق
“گول برگی تک وجودون اولوبدور ورق ورق
هانسی گولی بو حاله سالوب جورِ خار،اوغول”
.
.
میعاد حقده ،جان وئرَه سن ائتمدون درنگ
دردون ائدیبدی لیلیه دنیانی گور نه تنگ
جسمونده قرمزی گول آچوب گرچی زخمِ سنگ
“سونبول کیمی گول اوسته وئریب باش باشا خدنگ
چوخ آغلادور منی چمن گولعِذار،اوغول”
.
.
ای خاکِ اطهرِ قَدَمی سُرمه ی مَلَک
سالدی بلایه باشیمیزی گردش فَلَک
دشمن لرون ویریبدی سنه یاره تک به تک
“جسمون بویاندی لاله کیمین قانه،حشره جک
داغِ فراق قویدی منی داغدار، اوغول”
.
.
تا وار نَفَس بدنده سنی اوخشارام ئوروم
جان یاندیراندی اود کیمی هر اوخشامام،سوزوم
آغلار بولود کیمی غمووه،آغلیان گوزوم
“قربان سنه ئوزوم،نئجه من صبر ائدیب دوزوم
قالموب اورکده طاقت و صبر و قرار،اوغول”
.
.
سیغماز اورکده کی غم و دردیم عبارته
صاف یئر یوخوندی،من باخورام سرو قامته
مرهم قویوم بو جسمیده هانسی جراحته؟
“هانسی شَل اولموش اَل سنی سالمیش بو حالته؟
قویدی منِ فَلَک زده نی دلفکار، اوغول”
.
.
ای نورِ حُسنی روشن ائدن طوری، آچ گوزون
آل محمدون یلِ پُر شوری، آچ گوزون
دیندیرمگه بو غمکشِ رنجوری، آچ گوزون
“نازیله یاتما گوزلریمون نوری، آچ گوزون
لیلانی گور نه حاله قویوب روزگار،اوغول”
.
.
دور یاتما آچ او قولاّروی بوینوما دولا
اولما رضا آنون چکه غم گل تکین سولا
داغلی اورکله مِحنتی چوخ ای مه ولا
“قول باغلی دستگیر گئدور شامه سال یولا
یوخ سندن اوزگه کیمسه منه غمگسار اوغول”
.
.
باشوندا گورسنور یاراسی خنجرون داشون
همراهیدور بویولدا سنه یار و یولداشون
دیلدن آلیبدی طاقتیمی قانلی گوزقاشون
“نوک جداده شامه گئدور نازنین باشون
جسمون قوری یئر اوسته قالوب بی مزار اوغول”
.
.
ای جدینون شبیهی جوانمرد روزگار
شهر مدینه یوسفی گنجینه‌ی وقار
چرخ وجاهتون قمری،سیری حق مدار
“سن تک آنانون ئولسه جوان اوغلی حقی وار
گوزیاشی توکسه عارضه لیل و نهار اوغول”
.
.
تئل تئل باتوبدی قانه او گیسوی تابدار
آی تک جمالی قان بولودی ائتمیش استتار
هرآن باخاندا دیلدن ائدور سلب اختیار
“دیل آچمارام شکایته چون حق رضاسی وار،
بویله سویبدی حضرت پوردگار،اوغول”
.
.
ای بند بند جسمی اولان آشنای حق
گوزدن جهانی آتدون اولوبسان فدای حق
هر بیر عملده خوشدوکی اولسون رضای حق
“سن حق فداسی سان بو بیابان منای حق
حمد ایلرم بو باره ده من بی شمار اوغول”
.
.
ای بیر عبایه جمع اولونان جسمی ریز ریز
ذکر ایلیوب مصیبتون ای سرور حجیز!
داغلار غمونده سینه سینی(شاهد)اشکریز
“آغلار سنه(حسینی)ائدر ماتمون عزیز
دنیا و آخرتده اونی قویما خوار اوغول”
.
.
#اکبریه_شهادت #اکبریه #شاهد_اردبیلی
#کوچ_کربلا
#سعدی_زمان
#ای_شاهکار_خلقت_پروردگار_اوغول
#توپراقلار_اوسته_یاتما_بیله_زخمدار_اوغول
#لمعات_حسینی ص 137
#ترکی
#زبدةالاشعار