ای شهریار ملک ولایتده یا علی #حیدریه_ذاکر_اردبیلی

حالات حضرت امیرالمؤمنین علی (ع) و التفات به شهادت حضرت سیدالشهداء(ع)
.
#زبدةالاشعار
.
: @nohe_torki
.
مرحوم ذاکر اردبیلی
.
ای شهریار ملک ولایتده یا علی
وی تاجدار تخت امامتده یا علی
.
غیر از رسول عالمیان خواجه ی جهان
یوخدور نظیرون عالم خلقتده یا علی
.
قرآن جلال و شانووه محکم دلیل دور
بیر کیمسه یوخ بو شأن و جلالتده یا علی
.
انگشترووی سائله وئردون رکوعده
کیمدور اولان بو جود و سخاوتده یا علی
.
اوغلون حسینده سن کیمی انگشترین وئروب
اما کی چوخدی فرق بو بایتده یا علی
.
ئوز امتینه گر چی سنی ختم الأنبیا
تاپشیردی گئتدى موقع رحلتده یا علی
.
اولدون وصیّ برحق عم اوغلون پیمبره
اینجیتدیلر سنی بو وصایتده یا علی
.
پیغمبرین وصیتینی فوری داندیلار
بعد وفات ختم رسالتده یا علی
.
بوندان علاوه ائتدیله چوخ ظلملر سنه
اهل سقیفه غصب خلافتله یا علی
.
رد ائتدیلر اگر چی سنون حقّووی ولی
دوردون مقام صبر و رضایتده یا علی
.
اود ووردیلار جفائیله یاندیردیلار قاپون
دشمن دایاندى باب امامتده یا علی
.
قول باغلى مسجده آپاریبدور عدو سنی
اولموب حیا و شرم او امّتده یا علی
.
بی شرم ثانی بیعتی تکلیف ائدوب سنه
آغلاتدی عالمی بو جسارتده یا علی
.
ایرمی بش ایلده خانه نشین ائتدیلر سنی
قالدون غریب خانه ی خلوتده یا علی
.
ای کاش اولیدی اللرى شل ابن ملجمین
گلموبدی بیر شقی بو شقاوتده یا علی
.
گلدون او دم کی صبح نمازینه مسجده
فرصت تاپوب زمان عبادتله یا علی
.
شرم ائتمیوب او حالیده باشون قلجلادی
قانون توکولدى مرکز طاعتده یا علی
.
بیر ضربتیله سالدى سنی اختیاریدن
از بس واریدی قوت او ضربتده یا علی
.
محراب طاعت ایچره یخلدون ،دورانمادون
قالدون بیر آیری حاله او ساعتده یا علی
.
سالدی او حالون اوغلون حسینی خیالیمه
قان آغلیاق گرک بو مصیبنده یا علی
.
سو وئرمیوبدیله اونا بیر جرعه کوفیان
جان وئردی تشنه لبله حرارتده یا علی
.
هیچ کیمسیه حسین کیمی ظلم اولمیوب یقین
هیچ کیمسه ئولمیوب او جراحتده یا علی
.
سن جان وئرن زمانیده آغلاردی عترتون
دور و برونده پردۀ عصمتده یا علی
.
صحرای کربلاده حسینون وئرنده جان
قلب سپاه اهل عداوتده یا علی
.
قوموبدولار عیالی گلوب گورسون آغلاسون
أصلاً یوخیدی رحم او جماعتده یا علی
.
شمر ایلیین جفالره آگاهسن توزون
یاندیردی ظلمی قلبووی جنّتده یا علی
.
باشین کسنده دالدان حسینون او نابکار
گلدی جناب زینب او حالتده یا علی
.
سسلردی قوی کناره چکوم باغلیوم گوزون
قلبی یاناردی آتش محنتده یا علی
.
شمرون او ناله لر اثر ائتموبدی قلبینه
تعجیل ائدوردی قتل او حضرتده یا علی
.
کسدی باجی باخا باخا قارداشینون باشین
حیراندی عقل بیله قساوتده یا علی
.
فریاد وا حسینیله دولدوردی عالمی
قالموب توان او بانوی عصمتده یا علی
.
چوخدور حسین مصیبتی «ذاکر» دینمیور
تفصیلی وار کتبده روایتده یا علی
.
.
#حیدریه_ذاکر_اردبیلی
#حیدریه_شهادت
#ای_شهریار_ملک_ولایتده_یا_علی
#ترکی
.
#زبدةالاشعار
.
: @nohe_torki