ورود ماه محرم
.
.
علی مظفری
.
.
ای شیعه قاره باغلا ایله نوا حسینه
هر ایل محرّم آیین ساخلا عزا حسینه
.
.
چونکه بو آیدا یاسه باتدی امام اوّل
جنّتده اولدی محزون بو آیدا ختم مرسل
تاپدی دوباره دن جان بو آی کتاب مُنزل
مسکن اولوب بو آیدا کرب و بلا حسینه
.
.
بو آی بیر آیدی عالم یاسه باتار سراسر
بو آی بیر آیدی گوگده ناله ائدر ملکلر
بو آی بیر آیدی زهرا غمدن اولار مکدر
ساخلار عزا بو آیدا اهل سما حسینه
.
.
بو آیدا کوفه اهلی ئولدوردیلر حسینی
غرق نوا ائدوبلر شاهنشه حُنینی
زینب دییر بو آیدا وای نور هر دو عینی
بزم عزا قورالّار جنت آرا حسینه
.
.
ذبح ائتدیلر بو آیدا یتمیش ایکی فدانی
عریان قویوبلار اوچ گون شاهنشه هدانی
غم گردی تار ائدوبدور صحرای کربلانی
رحم ائتمدی ندن بس شمر دغا حسینه
.
.
بو آیدا یرلر آغلار بو آیدا گوگلر آغلار
زهرا دییر حسین وای ختم پیمبر آغلار
عمّامه سی الینده ساقی کوثر آغلار
کلثوم و زینب آغلار هم مجتبی حسینه
.
.
بو آی بیر آیدی الده قانه بویاندی اکبر
اوخلاندی ظلم الیله بو آیدا دیلسیز اصغر
بو آی بیر آیدی نهر علقمده اولدی محشر
بو آی بیر آیدی آغلار صاحب لوا حسینه
.
.
بو آیدا باغ عشقه باد ستم اسیلدی
عباس باوفانین بیر جوت قولی کسیلدی
آتلار ایاقی آلتدا چوخ نعشیلر ازیلدی
بو آیدا دگدی دورت مین تیر جفا حسینه
.
.
بو آی بیر آیدی زینب اولدی غمه گرفتار
اود ووردیلار خیامه بو آیدا قوم اشرار
شعله گوگه اوجالدی گردابه دوشدی قیزلار
منبر اولوب بو آیدا نوک جدا حسینه
.
.
بو آیدا غرق ماتم اولدی بلالی زینب
بش قاره سالدی باشه غملی عزالی زینب
اولدی اسیر اعدا قلبی یارالی زینب
یانمیش چادردا قوردی بزم عزا حسینه
.
.
یولّاندی آل طاها بو آیدا شهر شامه
ظاهرده قوم اعدا یتدی او گون مرامه
چوب جفا وریلدی رأس شه انامه
گویا ائدوردی ناله طشت طلا حسینه
.
.
آغلا «مظفر» آغلا مظلوم کربلایه
ساخلا عزا همیشه دلبند مصطفایه
هر دردون اولسا سویله سلطان نینوایه
ایله عبادتیله دینون ادا حسینه
.
.
.
#ورود_محرم #علی_مظفری #ترکی #زبدةالاشعار
نظر دهید