شب عاشورا
..
..
فکری اردبیلی
..
..
خیمه لرده قورولوب محشر کبری بو گیجه
الی قوینوندا گزور حضرت زهرا بو گیجه
..
..
یار و انصار حسین راز و نیاز اوستدیلر
بو گیجه مهلت آخردی نماز اوستدیلر
وصل وقتی یتشوب سوز و گداز اوستدیلر
بزم یاره هامسی اولدی مهیا بو گیجه
..
..
اوجالوب نه فلکه نالۀ طفلان حسین
زینبی ایتدی غمین صحبت هجران حسین
طاقت جان آپارور نغمۀ قرآن حسین
عجبا اولمادی ویران هامی دنیا بو گیجه
..
..
اکبرین درد و غمی لیلینی ایلیوب نگران
باخدوقیجا او گوزل قامتینه سسلدی جان
گوز یاشی سیل کیمین صورتینه اولدی روان
یری وار دور ئوزین ئولدورسده لیلا بو گیجه
..
..
من دیدیم عمریمی سایونده اوغول دالدالانیم
دیمدیم آیری دوشک آتش هجرونده یانیم
صبحه جک باشوه پروانه کیمین قوی دولانیم
قوی ایدیم گوز گوزه یا اینکه تماشا بو گیجه
..
..
قاسمون فکری بودور مقصد و منظوره چاتا
طوی خیالین بورا خوب حقه گوره باشدان آنا
حجله گاهیلن قورا میداندا قزل قاندا یاتا
درس عشق ئورکده هر عاشقه گویا بو گیجه
..
..
اولوب آماده سریّه دوشه بیداد الینه
اوغلونون کاکلینی ویرمگه جلاد الینه
حیف عروسون الینی ویرمدی داماد الینه
قلبینی قان ایلیوب محنت فردا بو گیجه
..
..
نو عروسون بو گیجه اولما حنا یاخدسدی
یا گلین تحفۀ ارزنده سینه باخدسدی
گوش پر محنته گوشوارۀ غم تاخدسدی
اولاجاق قانیله یا زلفی محنا بو گیجه
..
..
اللری اوسته آلوب اصغری بیچاره رباب
یاندیران سوزلریلن عالمی ایلردی کباب
خانۀ صبریمی آهوئلن دیدی ایتمه خراب
نه صودیم وار نه سویوم نیلیوم آیا بو گیجه
..
..
نهضتین لازمی اولمش باتاسان قانه گرک
گیده سن حضرت زهرا یاننا قانلی بلک
باغ جنتده گوزتلر یولوی حور و ملک
سنه خاطر بزنوب شاخۀ طوبا بو گیجه
..
..
عشق جامیندن اوغول سهم بلامی ایچرم
بو کیچیک قامتیوه خلعت زیبا بیچرم
امتحان صحنه سیدور منده اوغولدان گچرم
گوره لر عشقیله ایتدیم نجه سودا بو گیجه
..
..
باده نوشان الستون اورگی وصله اسور
درک ایده محضر جانانی اورگلر تلسور
زینبون چاره سین الدن سحرون فکری کسور
یانار اودلار دوشوب زینب کبری بو گیجه
..
..
کیم سحر پیکر عریانه عزا ساخلیاجاق
کیم او عریان بدنی گورجک اورگ داغلیاجاق
قویون آسوده یاتا زینب اونا آغلیاجاق
یتجک باشه اونون عزّتی گویا بو گیجه
..
..
کیم سحر بیر بلوک اطفاله پرستار اولاجاق
کیم حسین قیزلارینا یار و نگهدار اولاجاق
یانار اودلار دوشوب زینب علمدار اولاجاق
دینمیون سیز بیلون الله اونا حاشا بو گیجه
..
..
پوزدولار ظلم و جفادن گل و گلزاری اونون
یاناجاق آتش بیدادیده بیماری اونون
دوشجک چوللره اوچ یاشداکی غمخواری اونون
گر چه یانینده گزور بلبل شیدا بو گیجه
..
..
ماه رخشان بنی هاشم او سردار دلیر
پاسدار حرم خیمیۀ سلطان کبیر
دایانمور غضبیدن گیجه نون وقتی او شیر
دولانور خیمه لرون باشینه سقا بو گیجه
..
..
الده دوتموش علمین ماتیدی شمرون سوزینه
گه گیدور گه دایانور سویلوری هی ئوز ئوزینه
نیجه آیا باخارام بیرده حسینون یوزینه
ایتدی ظالم منی شرمندۀ مولا بو گیجه
..
..
صحنۀ جنگیده یر گوی دولسی لشگر اولا
شرقیله غرب آرا اللرده اگر خنجر اولا
اوخ آتانلارون اوخی گر هاموسی اوچ پر اولا
قویمارام سرور و سالاریمی تنها بو گیجه
..
..
رزمه آماده اگر بو سپه کافر اولا
درس جنگی بولارون تک تکی کرار پر اولا
قباقمدا دایانمز بو اوزون اللر اولا
قانلاریلان ایدرم بو چولی دریا بو گیجه
..
..
گوندروب اکبرین سرور آزاده مرام
ایسته دی قارداشینی محضرینه یالقوز امام
دیدی گوندرمیش امان نامه سنه قوم ظلام
فکر قیل نیّتیوی ایله سن اجرا بو گیجه
..
..
انتخاب ایله مخیر سن اوزون ئوز یولووی
ناگران اولما کسوبلر بالالار ساق صولووی
ترک قیلسون بیزی دشمن قلم ایتمز قولووی
اول مصمم اوزون ایت حّل معما بو گیجه
..
..
گتسون هر شهره قوناق گلسه بو خیل اسرا
خاطرونده حق خاطر بو سوزی ساخلا اخا
شمری قویما بالاجا قیزلاریما قمچی ویرا
سنه من تاپشورورام قیزلاری یکجا بو گیجه
..
..
سوزی قورتارجاق حسینون گلوب عباسی دله
دولدوروب گوزلرینی ایتدی بو نوعیله گله
دیدی گل قویما قاپوندا منی سن سالما چوله
قالماقیم گر چه سیزه اولسادا ایذا بو گیجه
..
..
نار غمدن اورگیم لحظه به لحظه آلشار
اذن ویر نوکریوه باشه یتر بو شب تار
ویردیگی قولینون اوستونده نجه گور دایانار
قوی آچلسون سحر ای سرور والا بو گیجه
..
..
سنسیز عالم منی چون غصه لی زندانی اخا
روح سن سن بدنیم قالب بیجاندی اخا
گر قبول ایتسون ابوالفضل سنه قرباندی اخا
سینمی تنگه سالوب محنت عظما بو گیجه
..
..
اورگدوب صود ویرنیم نهضته خاطر بو سیاق
ننگیدور دهریده عباسه حسین سیز یاشاماق
غیرتیمدن یانورام قورخوشوری عورت اوشاق
گچ امان نامه سوزوندن سنی زهرا بو گیجه
..
..
قویما زینب الی قوینوندا دل افکار او تو را
من هله ئولممیشم قیزلارون افسرده اولا
کیمده جرأت وار حسین قیزلاروا قمچی ویرا
ایتمسون واهمه قیزلار دئنن اصلا بو گیجه
..
..
قول بویون اولدی ایکی قارداش هامی آغلادیلار
گه سویندی بالالار گاهی اورک داغلادیلار
یادلاریندا بو گوزل منظرنی ساخلادیلار
نسگل اولدی باجسی زینبه اما بو گیجه
..
..
آخ او ساعتدن حسین ناله و افغانه گلوب
ئولوب عباسی اونون قلبی دونوب قانه گلوب
قول بویون اولماقا قارداشیله میدانه گلوب
دیدی وای زینبه سنسیز نئدر آیا بو گیجه
..
..
آتش ظلم و جفادن باجیمون قلبی یانار
خیمه لر غارت اولار چوللره قیزلار داغیلار
کمگی اولماز اونون غصه و غمدن داریخار
او یانان خیمه نی ایتسون نجه بر پا بو گیجه
..
..
یاحسین چوخدی بو «فرهادون» اورکده کدری
کسمه باشیندن آقا سایۀ مهر و نظری
یتور اوز نیت پاکینه او شوریده سری
قبریوی بیرده اوپه عالم رویا بو گیجه
..
..
#شب_عاشورا #فکری_اردبیلی #ترکی #زبدةالاشعار
نظر دهید