ای شیعه هانسی یرده ایشون دوشسه مشکله #حسینیه_واقف_سرابی

اتمام حجت و شهادت امام حسین (ع)
.
.
مرحوم واقف سرابی
.
.
ای شیعه هانسی یرده ایشون دوشسه مشکله
آغلا حسینه حل اولی مشکل سرشگیله
.
هر کیم حسینه آغلیا محشرده آغلاماز
قالماز جهاندا منّت نامرده آغلاماز
.
.
دوشدی خیالیمه گینه سلطان کربلا
گلدی مُجَسَّم اولماقا میدان کربلا
.
یالقیز قالوب گیدوبدی هامی یار و یاوری
تکیه ایدوب جداسینه قوینوندا اللری
.
کثرتدن ال چکوبدی قالوبدی وحید و فرد
قید عیالی یاد قیلوب چکدی آه سرد
.
گوردی دوشوب یر اوسته هامی آل هاشمی
پیکر یارالی قانه باتوب خال هاشمی
.
یوز دوتدی اشقیایه طرف حجت خدا
ایلوب او فرقه نی اوجا آوازیله ندا
.
ای قوم توکمیون یوزومه اشگ آلیمی
قورخوتمیون بو السیز ایاقسیز عیالیمی
.
جدّیم رضاسینه من مظلومه یول وئرون
عزم ایلیوب فرنگه گیدوم رومه یول وئرون
.
ائتدیم حرام من سیزون هانسی حلالوزی
وئردیم نه وقت غارته مال و مَنالوزی
.
روز جزاده اکبریمون قانین آلمارام
رومه گیدوب داخی بو ولایتده قالمارام
.
.
نه شهر مسلمه من روم و دیلَمَه گیدَرم
سیزه ئولنلریمون قانینی حلال ایدرم
.
مدینه نی سیزه وئردیم گیدون عمارت ایدون
گجه گونوز بابامون قبرینی زیارت ایدون
.
.
.
ائتدی تمام حجتی ، الله حجتی
گوردی دایاندی کوفه و شامین جماعتی
.
تبلیغ حُجتینده ویروبلر جواب سخت
گوردی اولوبدی وقت شهادت یتیشدی وقت
.
اول دمده ذوالفقاره ئوزون ائتدی واسطه
چکدی شرار یتدی یدالله باسطه
.
غیظه گلوب ولی خداوند ذوالجلال
آز قالدی سَلب اولا ملک الموتدن مجال
.
هرچند اوخ یاغاردی هوادن تگرگ تک
خصمی توکردی یر یوزونه بید برگ تک
.
فریاد و گیر ، دار هیاهوی زخمدار
روز قیامت اولدی او صحراده آشکار
.
کثرت اولوبدی صورت وحدتدن آشکار
دولموشدی کربلایه حسین الده ذوالفقار
.
یوز مین سواره هر طرفه ایلیوب نگاه
ائتمزدی جلوه غیر حسین یا که ذوالجناح
.
آز قالدى روح قطع ایده اجسامدن قبول
فی الفور عهدنامۀ ذر ایلیوب نزول
.
سالدى خیاله دورۀ عنقای قافدن
قویدی غلافه تیغی چکوب ال مصافدن
.
.
باخوب صاق وصولا بیر چکدی آه پُر حسرت
خیال ائتدی اولا بیر دقیقه ای راحت
.
بیر داش اؤرکلو بیر داش آتوبدور سِپَنگیله
سیندیردی شیشۀ دل زهرانی سنگیله
.
داش دگدی چون جبین مبین امامته
قانی قاریشدی گوز یاشینا آخدی صورته
.
داش دگجاقین جبین مبینی اولوبدی چاک
قانی ایدردی دامن پیراهنیله پاک
.
قلبی او قلب عالمین اولدوقجا آشکار
باش چلّۀ کمانه قویوب تیر زهردار
.
چون گوردی قلبینی ایلیوب دور شکسته سنگ
یوز قویدی گویلون آلماقا أوچ شعبه لی خدنگ
.
یانسون دیلیم او اوخ دل زهرانی یاندیروب
قطب مدار عالمی ایشدن دایاندیروب
.
بالیده لندی اوخ پر آچوبدور پر اوستونه
دگدی محل داغ على اکبر اوستونه
.
قان گیتدی اوخلانان اورگیندن چکوبدی آه
عرض ایلدی بو قومه خدایا سن اول گواه
.
ردّ ائتدی پشت سردن اوخی شاه کربلا
بو زخمیله دالونجا دیدی گلَّم ای بالا
.
آت أوسته ضعف ایلدی کثرت جراحتدن
یوز اوسته گلدی یره مرکب جلالتدن
.
حکم ائتدی ابن سعد ستمگر سپاهینه
حائل اولون حسینیله ئوز خیمه گاهینه
.
لشکر قاریشدی بیر بیرینه برهم اولدی صف
بعضی دُنوبدی غارت ایچون خیمیه طرف
.
اهل حرم نه گوردی گلور های هو سسی
خردا اوشاقلارین اوجالوب عرشه ناله سی
.
زینب ألى باشندا چخوب دیشره خیمه دن
عرض ائتدی یا اخا کُمَگَه گلموسن نَدَن
.
آلدى صدای زینبی فرزند مصطفا
ائتدی ندا او فُرقه نی مظلوم کربلا
.
.
.
ای قوم خیمه لر یولونی دوتمیون بو گون
من ئولمه میش عیالیمی قورخوتمیون بو گون
.
میعاده یوخدی باوروز ای قوم بی ادب
منده تبارده عَرَبم سیزده بیر عرب
.
غیظیله شمر سسلدى ای فرقۀ جهول
کفّ کریمدور سوزونی ایلیون قبول
.
اوّل گُلون بو تشنه لبی راحت ایلیون
باشین وورون جِدایه صورا غارت ایلیون
.
اُول بی حیا کناره گلوبدور سپاهدن
امر ایلدى قوشون قیدوب خیمه گاهدن
.
حمله ایدوب او قوم حسین اوسته فوج فوج
فریاد گیر و دار ایلیوب عرشه اوج اوج
.
بیر دسته دوردی نیزه و شمشیریله ووران
بیر دسته سنگیلن بیریسی تیریله ووران
.
از بس ووروبلا نیزه و شمشیر و زخم تیر
سان سیز یارا اُو سینه ده اولموشدی جایگیر
.
راوی دیر باخوردوم او مظلوم تشنه لب
گوردوم تکلّم ایلوری آهسته زیر لب
.
ظنّ ایلدیم بو فرقهنی نفرین ایدر بوگون
بولدوم تمام اولور که جهاندان گیدر بو گون
.
بی حال اولان زماندا او مظلوم ایدردی غش
حاله گلر دیر که ایا قوم العطش
.
دلدن دوشوب گلوب دیله سویلردی دشمنه
الله رضاسینه بیر ایچیم سو وئرون منه
.
بو غملو ماجرانی روایت ایدر هلال
بیر شربه سو گتورماخ اونا ایلدیم خیال
.
گلدیم بیانه چکدیم عمر سعده ماجرا
بولدوم سکوت ائتماقینی باعث رضا
.
دُوندوم فرات سمتینه گیتدیم او حالیله
جامی لبالب ایلدیم آب ذلالیله
.
شاید او آبیله ئوزومه آبرو وئرم
جان وئرمه میش حسین اونا بیر شربه سو وئرم
.
اثنای راهده دوشوب آفاقه انقلاب
گون تیره لندی گویده منادی ایدوب خطاب
.
بو قوم شوم حقی فراموش ایدوبدیلر
پیغمبرین چراغینی خاموش ایدوبدیلر
.
گوردوم او دمده شمر گلور ألده خنجری
معلوم اولان قویوبدی اوغولسوز پیمبری
.
گورجاق هلالی شمر خطاب ائتدی یا هلال
سن بو سویی هارا آپارورسان نَدور خیال
.
سسلندیم ایستورم آپارام سو حسینه من
جان تاپشوراندا خدمت ایدم بو حسینه من
.
دامانین آچدی وئردی حسین باشینی نشان
گوردوم او قانلو باشدان آخار قطره قطره قان
.
دوندی دیدی سو وئردیم اونا خنجریله من
زحمت چکوب او تشنه لبه سو آپارما سن
.
«واقف» بو غملو واقعه نی ائت گلن تمام
دفتر آلیشدی ایله گلن مختصر کلام
.
#حسینیه_شهادت #حسینیه
#ای_شیعه_هانسی_یرده_ایشون_دوشسه_مشکله
#ترکی #واقف_سرابی
#زبدةالاشعار