کوچ از قتلگاه
زبانحال حضرت زینب (س)
.
✍️ زبدة الاشعار ✍️
?: @nohe_torki
.
مرحوم غلامعلی باقری الهام ( هوشی تبریزی)
.
قان ایچره یاتان یاتما بیله نازیله قارداش
دور سال یولا شاماته گیدور قافله قارداش
.
ای شاه جهان سو تک آخان قانیوه قربان
گل تک داغیلان پیکر خندانیوه قربان
.
ای گل بدنی گون قاباقندا قالان عریان
وی پیکرینون بستر نازی اولان آلقان
بیر قافله شاماته گیدور دیده سی گریان
دور سال یولا بو قافله نی قارداش اماندور
سر قافله بو قافلیه شمر و سناندور
.
سن جانیوی قربان ایلدون راه خداده
ویردون باشا اوز عهدیوی تا رسم وفاده
منده دوزرم سن کیمی هر درد و بلا ده
باشه ویررم عهدیمی تا اولمیا نقصان
تحسین ایده سن عشقیمه ای خسرو خوبان
.
جانلار سنه قربان اولا ای جانیمه جانان
وی نکهت جانبخشی اولان رشگ گلستان
ایتدون بو چولی قانیله سن روضۀ رضوان
قارداش نه گوزل وار بو گلستاندا طراوت
بو قتلگهون ایلوری جنّاته رقابت
.
آچ گوزلرون ای نیّر فلاک امامت
یاتما بو قزل قانیده قارداش بیله راحت
شاماته چکور عترتیوی اهل عداوت
سن اول بیزه یولّاردا کسوک باشیله رهبر
اینجیتمیه اطفالیوی چوخ شمر ستمگر
.
عهد ایلموشم صبر ایدم هر درد و بلا ده
یولّاردا دوزوم سن کیمی هر رنج و عناده
همره منه اول یولدا اؤزون نوک جداده
خوش لحنیله سن قارداش اوخی نیزه ده قرآن
حقّون ندی تا منده ائدوم ناقه ده اعلان
.
سن بو چولی عشقونله حسین مجلس یار ائت
قاندان آچولان گل لریله فصل بهار ائت
شهزاده علی اکبریوی زیب کنار ائت
یاتسون ایاقون آتدا سنون اُول گل زیبا
لیکن منیله شامه پریشان گیده لیلا
.
سن جان کیمی آغوشیوه آل اصغری قارداش
شاماته گیدوم شمریله من دیده ده قان یاش
یولّاردا اولا نازلی رُقیَّه ن منه یولداش
سن سینوین اوستونده دئنه اصغره لایلای
من نازلی رقیّه باشی اوسته دیوم ایوای
.
بو یرده سن انصاریله قور بزم خصوصی
چخسون فلکه زینبوین آه و فسوسی
شامه آپاروم من بو گونی قاره عروسی
سن یات ولی بو دشتیده دامادیله راحت
تا کسب ایده بو یر سنیله عالی شرافت
.
کلثومیله من شام و سحر ای شه عالم
ویرانه ده بر پا ایدرم مجلس ماتم
عباسیله سن اول ولی بو دشتیده همدم
چون شهسن حسینیم سنه لازمدی علمدار
ساخلا اونی یانوندا اوزون ای شه ابرار
.
ای دست ستمله بَدَنی گل کیمی خندان
بیداد خزان اسدی یتوب موسم هجران
هر بلبل اولوب اوز گلی اوستونده نواخوان
چون آیرولوری جبریله گلشنده گولوندن
دوشمز گل آدی حسرتیله لیک دلیندن
.
من چکموشم آغوشه سنی جان کیمی قارداش
گوهر کیمی جاری ایدرم عارضه قانیاش
بو حالیله دشمن منی قارداش قویا ای کاش
تا هر قَدَر عمروم اولا یانوندا قالام من
زلفیمله بو گل پیکریوه سایه سالام من
.
بو دشت بلا قارداش عجب روح فزادور
گلشندی و یا قتلگهِ اهل وفادور
هر سمتده بلبلری مشغول نوادور
جان تک آلوب آغوشه گلون درد دل ایلر
اوز بلبلونه لیک حسین ناز گل ایلر
.
بیر یاندا حسینیم آچولوبدور گل رعنا
باش دامن گلبرگه قویوب بلبل شیدا
گویا دوشنوب نعش علی اکبره لیلا
بلبل کیمی ایستر گُلونون عطرینی آلسون
دلدن غمی بلکه بو وصالیله آزالسون
.
قاندان گل آچوب دشت بلا ای شه مظلوم
قان ایلیوب آخدوقجا وفا لفظینی مرقوم
بیر یاندا گلوب نی کیمی قارداش دیلَه کلثوم
صد چاک تاپوب جسم علمداریوی قارداش
گوزدن توکوری دُرّ کیمی دامنه قانیاش
.
ای عرش امامتده اولان نیّر تابان
بو یر سنه جان مغربی دور ای شه خوبان
بو یرده باتوب قانینه بیر کوکب رخشان
بیر کوکب دیگرده اولوب دور اونا مائل
ایستر ایده اوز دلده اولان دردینی زائل
.
بو رسم جهاندور بلی ای خسرو دوران
واضحدی هامی آختارار اوز مونسین هر آن
پروانه یانان شمعی گلی بلبل خوشخوان
آختاردی رقّیّه اودی تا اصغری تاپدی
گل لر آراسیندان او گل احمری تاپدی
.
گوردی بلشوب قانه قزل گل کیمی اصغر
الوان ائلیوب قرمزی قان جسمینی یکسر
گلمور سسی سیراب ایلیوب تیر سه پیکر
نازیله دوشوب بستر خون ایچره یاتوبدی
اوز قانین ایچوب باشدا کی سو فکرین آتوبدی
.
آغوشه آلا ایستدی اول غنچه دهانی
گوردی کسوب اوخ حلقین آخوب سو کیمی قانی
بو حالیده اوج ایلدی افلاکه فغانی
اوز قلبینه بیر تیر مِحَن ساچدی رقیّه
حسرتله یره بیر قولونی آچدی رقیّه
.
اولموشدی ز بس قلبی علی اصغره بسته
گلدی هَوَسه شوقیله اول حالی شکسته
قویدی بالاجا قولّارینی اوز قولی اوسته
بلبل گولیله اولدی او گلشنده هم آغوش
ایّام فراقی ایلیه بلکه فراموش
.
بیرده علی اصغر قولون اوز بوینونا سالدی
گلدی اله منظوری اورک دردی آزالدی
بلبل کیمی بیر وصلیله گل عطرینی آلدی
جوش ائتدی محبت دل غمدیده سی دولدی
قارداشیله باجی ایکسی قول بویون اولدی
.
بلبل کیمی مسکن ایلدی غنچه بوداقین
بولموشدی اَزلدن ولی ایّام فراقین
قویدی کسیلن حلقینه حسرتله دوداقین
بو وصل غنیمت اولوب اول طاقتی طاقه
توشه ایدوب اول وصلتی ایّام فراقه
.
بیر شخصی حسین نوحه گری ائتدی سفارش
منظوم ایده «هوشی» بیله بیر نوحۀ دلکش
ظاهرده اگر چه یازولان سوزده یوخ ارزش
لیک اوزلری مأجور ایده جاق روز جزاده
سنده اوخی «هوشی» بو سوزی بزم عزاده
.
#سبک_ای_باد_صبا ( 7 سبک)
.
#کوچ_کربلا
#قان_ایچره_یاتان_یاتما_بیله_نازیله_قارداش
#هوشی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید