خرابه شام
.
✍️ #زبدةالاشعار ✍️
🆔: @nohe_torki
.
#سبک_ای_اد_صبا_کرببلایه_گذر_ایله … 7 سبک
.
مرحوم تائب تبریزی (1)
.
((ای عمه منیم حالیمه ویرانه لر آغلار
خاموش اولونان شمعیمه پروانه لر آغلار))
.
.
بیر بلبل شیدا که اونون لانه سی یوخدور
گلزاری گئدوب غارته کاشانه سی یوخدور
جبراً وطنیندن قوؤولوب خانه سی یوخدور
غربتده اونا دردیله همخانه لر آغلار
.
.
بیر غمزده که غملری همخانه سی اولسون
بیر دلشده که قان دل ویرانه سی اولسون
بیر شمع که بیر سلسله پروانه سی اولسون
آغلار اونا پرسوخته پروانه لر آغلار
.
.
بیر قیز که قویوب یوز هامی غملر اونا ساری
بیر قیز که جانیندان دویوروب رنج و فشاری
ایلر ئولوموندن اؤتوری روز شماری
آغلار اونیله یار اولی بیگانه لر آغلار
.
.
هر آغلیانون آشناسی هم یادی واردی
زهرا قیزیام منده اوتانجاق آدی واردی
گیزلینجه حزین آغلارام آیری دادی واردی
دیوانه اولار حالیمه فرزانه لر آغلار
.
.
توخدار شرفه یر اوتوران لار شرفیندن
گنجم دل ویراندا حسینون طرفیندن
گوهر دوزَرَم عارضیمه گوز صدفیندن
باخدیقجا منه شوریله دردانه لر آغلار
.
.
من باغ وفانین گل ریحانیم عمّه
من صدق و صفا شمعینه پروانیم عمّه
مردانه حسینون قیزی مردانیم عمّه
دنیا بویی دائم منه مردانه لر آغلار
.
.
خمخانۀ توحیدی گورَن باده پرستم
انگیزه لی مخمورۀ صهبای الستم
پیمانه بو دولموش ایکی گوز دور ائله مستم
دولدوقجا بوشالدیقجا او پیمانه لر آغلار
.
.
من هم نفسم غصّه لی دردانه لریله
بو باغلی قالان ائولری، بی خانه لریله
رنگی سارالان گل کیمی ریحانه لریله
من نالیه گلدوقجا بو ریحانه لر آغلار
.
.
هر چند برابردی دقیقم بیر ایلیله
راحتدی منه چون که وارام اهل دلیله
آخر یخارام کاخ یزیدی بو ائلیله
فرزانه اولار شاد، اونا دیوانه لر آغلار
.
.
چون جان حسینه منی جانانه یازاللار
اشراری یخان ساکن ویرانه یازاللار
دنیا بویوجا آدیما افسانه یازاللار
افسانه یازانلار یازار، افسانه لر آغلار
.
.
ابر آغلار اگر دیدۂ گریانی می گورسه
داغلار اریَر بو اریَن جانیمی گورسه
شانه دولانوب زلف پریشانی می گورسه
تل تل دایانار شانه ده دندانه لر آغلار
.
.
الفت ایلیوب منله دؤزوم من دؤزومیله
دردیم منه مشغولدی من ئوز ئوزومیله
دائم بابامی گوزلَرَم آغلار گوزومیله
یوللاردا قالان نرگس مستانه لر آغلار
.
.
رؤیاده بویوردی بابام اول خسرو عالم
کیم نازیوی من سیز چکر ای غملره همدم
عرض ائتدیم اونا نازیمی دائم چکر عمم
رأفت الى دائم باشیمی شانه لر آغلار
.
.
«اقبال» اوخودی مطلع «عطّاری» پوزولدی (2)
«تائب» ائشیدوب آغلادی افکاری پوزولدی
تعقیب ائلدى مطلع اشعاری پوزولدی
گور دفتر غمده ائدر انشا نلر آغلار
.
.
بو «تائبین» الله جریان وار قلمینده
«اقبالیله» آغلاللا بو شهزاده غمینده
قسمت ایله تکرار ایلیاق ئوز حرمینده
ای عمه منیم حالیمه ویرانه لر آغلار
.
(1) و (2) : بنا به گفته اقبال اردبیلی مطلع شعر از مرحوم عطار اردبیلی است. با پیشنهاد ایشان مابقی سروده شده است
.
#حضرت_رقیه_شهادت #تائب_تبریزی
#ای_عمه_منیم_حالیمه_ویرانه_لر_آغلار
#ترکی
.
✍️ #زبدةالاشعار ✍️
🆔: @nohe_torki
نظر دهید