کوچ از شام
.
✍️ زبدة الاشعار ✍️
.
🆔: @nohe_torki
.
#سبک_ای_باد_صبا …
.
مرحوم هنرور تبریزی
.
ای قارداشیمون نازلی بالاسی گئدوروخ بیز
شام ایچره اولان خوار عزاسی گئدوروخ بیز
.
.
بو فاطمه دور منده بیبون زینب نالان
دور قبریده یاتما باجیوی قویما پریشان
سس ویر اوجالان نالمه عمّه ن سنه قربان
آز قالدی یته عرشه صداسی گئدوروخ بیز
.
.
ای نازلی رقیّه بلورم واردی مرامون
هرکیمسنیه واردی سوزون دلده پیامون
سویله منه منده دیرم عرض سلامون
شامین بولوسن یوخدی وفاسی گئدوروخ بیز
.
.
غم قافله سی لنگه دوشوب دور بالا یاتما
خون دلووی قبریده گوز یاشینه قاتما
ای کان ادب سن منی گوزدن بیله آتما
اتمامه یتوب شام جفاسی گئدوروخ بیز
.
.
نه شمر نه خولی نه سنان وار یانیموزدا
بیر عدّه ولی سینه زنان وار یانیموزدا
باخ گور بو بلا دیده آنان وار یانیموزدا
یوخدور بو یرین ذوق و صفاسی گئدوروخ بیز
.
.
میلون بولورم واردی سنون کرب و بلایه
قبرایچره اماندور بالا چوخ گلمه نوایه
دورسنده گیداخ عرض ایله شاه شهدایه
وارصورتمین سیلی یاراسی گئدوروخ بیز
.
.
آج قالماقوی یاده سالوب ایلرم افغان
ویرانه ده جان ویردون عجب حالی پریشان
آغلار گوزووه خسته بو جانیم اولا قربان
ای گوزلریمین نور و ضیاسی گئدوروخ بیز
.
.
من بیرگولودیم سن اوتوراردون بوداقمدا
اوقات اولاردی که یاتاردون قوجاقمدا
سویلردون ای عمه قاباریم وار ایاقمدا
بو شهریده هئچ یوخدی دواسی گئدوروخ بیز
.
.
دورگوّلرآچوب گلشن شاه شهداده
بلبل لری گوزلور که گَله ناله وداده
سنده بیزیله ایله سفرعزمین اراده
جانانین اگر اولسا رضاسی گئدوروخ بیز
.
.
سن چوخ سُؤوَسَن اکبری ای ماه مدینه
دور ناقیه مین گوزلوری اُول نازلی سکینه
یاندیرما منی رحم ایله بو زار و حزینه
ای قافله مین ماه لقاسی گئدوروخ بیز
.
.
دور سنده گیداخ اصغره لایلای دئنه آغلا
قبر اوسته گوزون یاشینی رخسارووه باغلا
وای قارداشیم ای وای دئنه بو سینه می داغلا
گلمور نیه بس ناله صداسی گئدوروخ بیز
.
.
بو غمده «هنرور» گلوری داد و نوایه
ایسترکه بیر عمرینده گیده کرب و بلایه
تا عرض ایلیه بو سوزینی میر هدایه
مقبوله یته بلکه دعاسی گئدوروخ بیز
.
.
#کوچ_شام #هنرور_تبریزی
#ای_قارداشیمون_نازلی_بالاسی_گئدوروخ_بیز
#ترکی
.
✍️ #زبدةالاشعار ✍️
.
🆔: @nohe_torki
نظر دهید