شهادت حضرت علی اصغر (ع)
.
.
✍️ #زبدةالاشعار ✍️
.
🆔: @nohe_torki
.
موسی آقایی اردبیلی
.
سو تمنا ائتدی لشکردن سلیمان اصغره
ویردیلار بیر زهریلی پیکانی عطشان اصغره
زهریلی پیکان وئریبدور تازه بیر جان اصغره
انبیا گویلردن اندی اولدی مهمان اصغره
یاره سین کیم گوردی اما آغلادی قان اصغره
.
.
ساکنان عرشی حیران ایلدی معیار عشق
حلقین اوخ بولدی گولوب اول طفل شیرینکارعشق
نیله سین سرمست ائدور عاشقلری رفتار عشق
بند قنداقین کسوبدور واقف اسرار عشق
تا که جان وئرمک او ساعت اولسون آسان اصغره
.
.
جاری اولدی قان بوغازیندن یئره حور آغلادی
گوزلری دولدی حسینون اولدی پرشور آغلادی
نهر علقمده یاتان قولسوز سلحشور آغلادی
تیری حلقیندن چکوبدور سوره نور آغلادی
تیتره دی یئر گوی عزادار اولدی قران اصغره
.
.
حرمله رحم ائتمدی بیر جرعه سو مأیوسینه
تنگ اولوب دنیا قفس مثلی او غم مأنوسینه
ال ایاق چالدی قوشولسون عشقین اقیانوسینه
گوزلری آخدی ملکلر گلدیلر پابوسینه
مژده ی وصلی یئتیرسینلر پریشان اصغره
.
.
حنجرین تا غنچه مثلی اوچ پر اوخ باز ایلدی
اهل افلاکه او حنجر صاحبی ناز ایلدی
شهپر آچدی روحی عرش حقه پرواز ایلدی
کربلانی جلوه گاه عشق و اعجاز ایلدی
رتبه ی باب الحوائج وئردی یزدان اصغره
.
.
یوز دوتوب مولا او نهر اوسته یاتان سردارینه
گل دئدی باخ گلستانین عندلیب زارینه
چیرپینیب قوش تک, یاخیب قان، اللری رخسارینه
آرتیریب زینت آخان قانی ولا گلزارینه
ملک جنتده پری لر اولدی حیران اصغره
.
.
لعنت اولسون گونده بیر رنگه دوشن انسانلارا
لعنت اولسون حیله و نیرنگ بی ایمانلارا
عار اولا ظلم اهلینه یاور اولان نادانلارا
هانسی مذهبده سو وئرمزلر سوسوز جیرانلارا
بیر مسلمان ایلدی ظلم فراوان اصغره
.
.
جمع اولوب یوزمین مقام و منصبه دلبسته لر
مکر ابلیس رجیمه تابع و وابسته لر
یخدیلار دینین بناسین ظاهرأ وارسته لر
آتدیلار روح نمازه اوخ، جبین برجسته لر
وئرمیوبلر جرعه سو قهریله مهمان اصغره
.
.
یاتما نهر اوسته ستملن رام اولان آهویه باخ
آلتی آیلیق غنچه نازیمده عطر و بویه باخ
اللریم اوستونده قانه غرق اولان تیهویه باخ
خیمه لرده باش یولان نسوانه های و هویه باخ
آسمانلاردا ملائک ایلور افغان اصغره
.
.
بی حیالر ائتدیلر طفل لبن خواریله جنگ
عشقیمون آیینه سین اوخ سیندیریبدور مثل سنگ
صورتین ائتمیش حرارت چون گل بی آب و رنگ
بیر حالا سالمیش بوغازین خنجره اوخشار خدنگ
قان اولور قلبیم باخاندا قانه غلطان اصغره
.
.
حلق اصغره حسینون اوخ یازوب غم نامه سین
جان وئریب گتدی ظهوره محشرین هنگامه سین
قیرمزی رنگیله الوان ایلدی آغ جامه سین
شاه مظلومان اله آلدی یاشیل عمامه سین
نوحه آغاز ایلدی میداندا سلطان اصغره
.
.
سسله دی ای اللریم اوسته خزان وئرمیش چیچک
قان بوغازوندن آخور لبریز اولان پیمانه تک
دیلسیز اوغلوم، تشنه جانبازیم، هارا عزم ایلیک
ایندی بو حالیله اخیامه اگر باهم گئدک
سسلنر قیزلار نه گلدی خسته، جیران، اصغره
.
.
یوز قویوب شرمنده حالدا خیمه ی اجلالینه
کافر آغلاردی نظر سالسیدی گر احوالینه
تلیدن اندی ساتاشدی گوزلری اطفالینه
اوچ یاشیندا بیر بلاکش چیخدی استقبالینه
تئز دیدی بابا سو وئردی؟ قوم نادان اصغره
.
.
آلدی قلبیندن او سوز تاب و توانی حضرتین
دوشدی طاقتدن گره لندی بیانی حضرتین
گویلره تأثیر ائدوب سوز نهانی حضرتین
آسمانی یاندیروب سسیز فغانی حضرتین
بئش اولوالعزم اولدی معناده نواخوان اصغره
.
.
اللری اوستن آلوب اول طفلی نالان دختری
یاره سین گوردی هراسان اولدی اسدی دیزلری
تاپمادی چاره توکوب رخسارینه اشک تری
قاچدی اخیامه چاغیردی عترت پیغمبری
ایله سین بلکه حرملر اهلی درمان اصغره
.
.
عترتی یاندیرمادی هئچ غم او بیر نیسگیل کیمی
گوردیلر پیکان بوغازین سیندیریب سونبول کیمی
لبلرین سوز عطش پرپر ائدوبدور گول کیمی
اول گولون اوسته فغانه گلدیلر بولبول کیمی
اولدولار ابر بهاران مثلی گریان اصغره
.
.
تا حسین تاپشیردی گنج پر بهاسین توپراغا
شدت غم قلبین اوخشاتدی اسن بیر یاپراغا
سس گلوب هر سمتیدن مظلوم دورانسان آقا
صف چکوب جن و ملک اول طفله قربان اولماغا
کاش اولا #موسی_ده بیر گون اوردا قربان اصغره
.
.
#اصغریه_موسی_آقایی
#اصغریه_شهادت
#سو_تمنا_ائتدی_لشکردن_سلیمان_اصغره
#ترکی
.
✍️ #زبدةالاشعار ✍️
.
🆔: @nohe_torki
نظر دهید