زبدةالاشعار

ای کرب و بلانین یری ای کعبه دن اشرف #کربلا_سعدی_زمان

خطاب به زمین کربلا
..
..
مرحوم حسینی سعدی زمان
..
..
ای کرب و بلانین یری ای کعبه دن اشرف
الله معرِّف سنه – سن بیته معرَّف
..
..
توپراقوی هر کیمسه اوپوپ کامه چاتوبدی
شأنونده بو بسدور که حسین سنده یاتوبدی
..
..
بر شاه اوزین یر یوزینون مالکی بُلسه
شاهلار ایاقین اوپماقا توپراقه توکولسه
تاجین او گوزل توپراقووا سورتمسه ئولسه
محشر گونی سرمایه حسرت اولی تاجی
بوینوندا اونون طوق مذلّت اولی تاجی
..
..
بر شاه یاتوب سنده که شاهلار اونا نوکر
درباری فلکدن اوجا دربانی ملک لر
دیوان قضا حاکمی آئینه داور
جاروبی گوزل درگهینون گیسوی حوراء
جاروب ایده نی نوح و خلیل الله و عیسی
..
..
یوخدور سنه واللهی شرافتده چاتان یر
سنسن شرف آلعبا قانه باتان یر
حیّ ابدی مظهر و محبوبی یاتان یر
آرام دل فاطمه نین مدفنی سنسن
حق مظهری نا حق اُله نین مسکنی سنسن
..
..
سنده بویانوب قانه یاتوب بر گل خوشبو
دنیا گوزی گورموب ایله بر نو گل خوش رو
خلقتده آلوب رنگ او گلدن گل مینو
بر گل که اونون گلشنی دور سینه زهرا
بر سینه که ایگلردی اوپردی اونی طه
..
..
قبر نبوی یا اولا کعبه یری حتّی
توپراقینی جایز دگی شرعا یماق امّا
پیغمبر ایدوبدور سنی بو حکمده منها
بو سهلیدی جایزدی یماق خاک شفادی
بر ذرّه بری گر ییه مین درده دوادی
..
..
مِشگی یارادان نافه آهوی ختننده
بیر عطر قویوب ای شرف غالیه سنده
مشگین آزالار قدری اونون عطری گلنده
تا عطرین آلار قبرده زهرا ملر آغلار
دلده بالا وای گوز یاشی گوزدن الر آغلار
..
..
گر عرش دیسم من سنه بالفرض خطادی
توپراقیوه غبطه آپاران عرش خدادی
تعظیم ایلسه فرشیوه گر عرش سزادی
سن دوش نبی زینتین آغوشه آلوبسان
عرشین سبب خلقتین آغوشه آلوبسان
..
..
گر مایل زینت اولا حوریّۀ جنت
توپراقون ایدر سرمه تاپار گوزلری زینت
اولماز نجه حورا گوزینه سرمه او تربت؟
اول تربته خون شه بطحا قاریشوبدی
اشگ تر انسیه حورا قاریشوبدی
..
..
ای وادی ایمن ویروب الله سنه بر جاه
موسای کلیم اولسا دا اولماز اونا آگاه
خاکم بدهن من دیمورم سنده دور الله
بر یر که او یرده اولا الله قانی جاری
ارواح رسل سجده گه ایلر او دیاری
..
..
کافردی بری سنده یاتوب گر- دیه الله
اوز ذاتین ایدوبدور اونا امّا – دیه – الله
دنیانی خراب ایتمدی بلمم نیه الله؟
گوردی که یخوب سوگلوسین توپراقا اشرار
گون ایسّسی دگدوقجا یانار یاره سیزیلدار
..
..
محشرده علاقه دوتار اول گونکه مشیّت
اخیاره برازنده مزیّن اولا جنّت
سنلن ویرولر جنّته آرایش و زینت
نورون اولی تابنده هامی حور و قصوره
مصداقیدی چون سنده یاتان آیه نوره
..
..
ای کرب و بلانین یری سن کوه مناسن؟
یوخ یوخ سبب منزلت بیت خداسن
آغوشه آلوبسان نچه لب تشنه فدا سن
بر خدمت ایدوبلر اولار احکام جلیله
ممکندی او خدمت نه ذبیحه نه خلیله
..
..
قانیله ویروبلر سو اولار گلشن دینه
توحید گلی نشر اولونوب روی زمینه
تفسیر یازوب قانلاری قرآن مبینه
دنیانی بوتون دولدوروب آوازه قرآن
هیهات پوزولسون داخی شیرازه قرآن
..
..
سنده ستم کفریله دین پرچمی یاتدی
صاحب علم الدی علمی توپراقا باتدی
امّا او علم پرچم اسلامی اوجاتدی
یاتماز بو علم دور ایده تا گردش دوران
اولماز داخی جمعیّت اسلام پریشان
..
..
قرآنه تجرّی ایلیوب فرقه بطلان
توپراقلارا صد پاره دوشوب ناطق قرآن
قرآن نجه قرآن که دوتوب سوره لرین قان
کفّار آچوب ظلم الی فرقان خدایه
آت دیرناقی اوراق ایلیوب آیه به آیه
..
..
بر یر سن آدون مجمع آلام و کرب دور
سنده ایله بر ظلم اولونوب ننگ عرب دور
خَسف ایتمدون اول فرقه نی چوخ جای عجب دور
پیغمبر اکرم فلکه شور سالان گون
زهرا قیزینون معجرینی دشمن آلان گون
..
..
ای کرب و بلا سنده کی ششگوشه مزاری
بر نوع سایوب با عظمت حضرت باری
مژگانیله جبریل سیلر اولسا غباری
عمریم او گوزل مدفنه آثاروه قربان
یوخ منده لیاقت سنه – زوّاروه قربان
..
..
ای کاش اجلدن او قدر مهلت اولیدی
لطفیله آقامدان نظر رأفت اولیدی
بر نیمه شعبان منه ده قسمت اولیدی
گوز یاشلی گذر کعبه مقصوده سالیدیم
جان تک او گوزل مرقدی آغوشه آلیدیم
..
..
دلباخته عاشقدی سنه جان «حسینی»
سنسن مرض عشقینه درمان «حسینی»
اسموندی هامی بر سوزه عنوان «حسینی»
سعدی زمان اولسا اگر علتی سنسن
گوندوز گیجه گوز یاشلی سوزی صحبتی سنسن
..
..
#کربلا
#سعدی_زمان #آرزوی_کربلا
#ای_کرب_و_بلانین_یری_ای_کعبه_دن_اشرف
#چهارده_معصوم_حسینی ص 432
#ترکی
#زبدةالاشعار

متن پیشنهادی:  ای قائمۀ دین پیمبر یر اوزونده #عسکریه_مصیبی_تبریزی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی