باجون قمدا وئرور جان ایا شاه خراسان #حضرت_معصومه_غمگین

زبانحال حضرت معصومه سلام الله علیها
.
.
#سبک_علی_جان_بالا_لبیک
.
.
محمدباقر محمدزاده قومیان (غمگین)
.
باجون قُمدا وئرور جان
ایا شاه خراسان
منی درک ائله قارداش
گلن یوللارا قربان
.
.
دیردیم یترم من
بو دنیاده وصاله
بولوردوم قالار حسرت
بو بیکس او جماله
منی سالدی فلک چون
داخی بحر ملاله
سنوب کشتیِ صبریم
غمیم ایلدی طوفان
.
.
بو واضحدی که هر کیم
غریب ئولسه جهاندا
گلنده ملک الموت
اونون جانین آلاندا
پوزار حالین اونوندا
گوزی اشکه دولاندا
یقین شخص غریبین
آلار جانینی آسان
.
.
بولورسن نه زماندور
چکور بو باجون حسرت
چتین بیرده وصالون
برادر اولا قسمت
که معصومه وئرور جان
شها قوی منه منّت
باشیمی دیزون اوسته
گل آل ای شه خوبان
.
.
غریب جان وئره هر کیم
تیکوب گوز یولا آغلار
ئولن وقتیده خواهر
گوزون قارداشی باغلار
اگر گورمسم ئولسم
بو غم قلبیمی داغلار
اؤزون لطف ائله بیرده
گل ای غصّه لی سلطان
.
.
گلوب قاصد او گون که
گتوردی منه نامه
یتر من دئدیم اوندا
بو معصومه مرامه
هزار حیف اولا امّا
باجون یتمدی کامه
قالوب حسرتی دلده
اولوبدور جگریم قان
.
.
سنون عشقویله من
بو صحرالره دوشدوم
اجل درک ائدوب آخر
ئولوم شربتین ایچدیم
تمام عزّت و جاه و
جلالیله دئمیشدیم
سنی درک ائدرم من
چاغردون منی مهمان
.
.
جهان کاش اولیدی
بو قلبیم کیمی ویران
باجون اولدی غمونده
ائله زار و پریشان
چخاتماز سنی یاددان
اولا حشر نمایان
نولور گل باشیم اوسته
اوخی آیۀ قرآن
.
.
یری واردی بو سوزده
اولا شرح بو مطلب
نه چکدی بس الهی
حسین باجیسی زینب
اودا گوزلدی قارداش
یولون شامده یا رب
نجه اولمادی ممکن
گلیدی شه عطشان
.
.
بو معصومه وئروب جان
یتوب صبری تمامه
سویوندوردی وئره غسل
او دم دخت امامه
وئروب غسلینی غسّال
گوروب سینه ده نامه
همان نامه دی یازدی
اونا شاه خراسان
.
.
#حضرت_معصومه_شهادت
#باجون_قمدا_وئرور_جان
#غمگین
#ترکی
#زبدةالاشعار