باخمادی چشمۀ چشمیم دولی بیر یمدی باجی #اصغریه_سعدی_زمان

زبانحال امام (ع) بخواهرش در موقع آوردن قنداقۀ فرزندش بر خیام
.
.
مرحوم سعدی زمان
.
.
باخمادی چشمۀ چشمیم دولی بیر یمدی باجی
اوخی پستان یرینه تشنه بالام امدی باجی
گور بو نه عالمدی باجی
.
.
ایله سولموشدی سارالموشدی خزان یپراقی تک
مرغ بسمل کیمی تیترردی بو بی آب سمک
نه تک آغلوردی بونا قیرخا یاخون قاره لچک
آغلادان ارض و سما اهلینی بو غمدی باجی
.
.
سو امیدیله آپاردیم بالامی رزمگهه
اولمادی حالی مؤثر سپه رو سیهه
قیتروب تشنه گتوردوم گینه بو خیمه گهه
بو گیدیش بو گلیشین فرقی مسلّمدی باجی
.
.
الیم اوستونده سها اولدوزی تک باتدی بالام
گوزلری آخدی هامی دشمنی آغلاتدی بالام
چوخ یورولموشدی یوموب گوزلرینی یاتدی بالام
گورمین حالینی بُلمز بو نه عالمدی باجی
.
.
قالمیوبدور داخی قلبیمده منیم طاقت و تاب
قانلی قنداقین آلان یوخ جگریم اولدی کباب
یوز گوزی قانه بلشمیش گوره مشگلدی رباب
بالاسین گورسه هلاک ایتسه اؤزون کمدی باجی
.
.
ظلم الیله نجه یاندی اورگیم بُلدی بالام
اوخ دگنده اودی باخدی یوزیمه گُلدی بالام
رنگی قیرمزدی ولی بیر سارالان گولدی بالام
بو گله قرمزی قان قطره سی شبنمدی باجی
.
.
یوخلامیشدی یوخودان دیسگنوب آچدی گوزینی
گورمییَم زخمینی دوندردی یوزیمدن یوزینی
آناسی فاطمه آغوشینه آتدی اوزینی
یارالی طفله آتادان آنا اَقدَمدی باجی
.
.
بالامین واریدی اگنینده باجی سبز قبا (1)
اوزگه بیر زینته محتاجیدی بو ماه لقا
سبز رنگی بویادی قرمزی پیکان جفا
قانی آق صورته پیرایۀ مُعظمدی باجی
.
.
ایلدیم دینیمه قربان بو لب عطشانی سوسوز
سو کیمی آخدی الیم اوسته یره قانی سوسوز
باخما ذبح ایلدیلر بو قوزی قربانی سوسوز
گلشن دینه ویرن سو بو آخان دمدی باجی
.
.
ایله هنگامه بو چولده باجی بر پا ایلدیم
آل سفیانی تواریخده رسوا ایلدیم
جدّیمون دینینی بو امریله احیا ایلدیم
سبب عزّت دین ماه محرّمدی باجی
.
.
بالام اوخلاندی یقین اولدی مرامه چاتارام
باش ویروب عالم امکانی گوزیمدن آتارام
قبریده اصغریمی سینمه آلّام یاتارام
تا جهان وار گوره نه مایۀ ماتمدی باجی
.
.
بالامی حرمله بیر نحویله قانه بویادی
آشنا گورمدی بو مسئله آغلاتدی یادی
یوخلادوب بیر گون اولار قائم مولود اویادی
او گونون منتظری عالم و آدمدی باجی
.
.
ای «حسینی» بو غمه آغلاسا هر شیعه گوزی
یتوشر دادینه محشرده بو شهزاده اوزی
یازدیروبدور سنه بیر «شیعۀ خلص» بو سوزی (2)
باخمادی چشمۀ چشمیم دولی بیر یمدی باجی
.
.
(1) نوشتۀ جرجی زیدان
(2) مرحوم حاج غلامرضا نوحه خوان چوستدوزان
.
.
#اصغریه #سعدی_زمان #اصغریه_شهادت #ترکی #زبدةالاشعار #چهارده_معصوم_حسینی ص 422