باد ظلمیله سولوبدور چمنون آی قارداش #حسینیه_دلپاک

زبانحال حضرت زینب (س) در قتلگاه
..
..
رضا غلامپور (دلپاک)
..
..
باد ظلمیله سولوبدور چمنون آی قارداش
گور نجه یاسه باتیب یاسمنون آی قارداش
..
..
اثر خار جفایه نجه گلشنده دوؤزوم
آغلادور گور نجه هر بلبل نالانی سوزوم
تا بو گلزار محبّتده سنه دوشدی گوزوم
یئرده گوردوم داغیلیب گل بدنون آی قارداش
..
..
سنه بیر انجمن غم قوروب اهل حرمون
متصل انجمنین ایچره یانیر شمع غمون
تا اسیر یانمیش اورکلر کیمی محنت علمون
آیری بیر عالم اولور انجمنون آی قارداش
..
..
گورجاقین حالیوی قلبیمدن اولوب سلب توان
خاصه بیر حالون ائدیب باغریمی باغرین کیمی قان
باجیوام وئر سسیمه سس منه گل ائیله بیان
هانی بس مندن آلان پیرهنون آی قارداش
..
..
عندلیبون کی دلی انس تاپیر ناله ایله
ایسلانیر نسترنون سولموش اوزو ژاله ایله
وَه بئله عطر بئله نکهت کی لاله ایله
گور دولوبدور نجه دشت و دمنون آی قارداش
..
..
تا گوزوم حسرتیله دوشدی بو عریان بدنه
مطرح اولدی نچه سوز سینه ده پیوسته منه
مین ملالیله بیرین عرض ائدورم ایمدی سنه
گورن آیا اولاجاقدور کفنون آی قارداش
..
..
ائیلدون سعی که پاینده اولا دین رسول
وَه بو تصمیم کی بونداندی تجلّی اصول
یازدی منظورینی قانیله یئره اولدی قبول
امتحان وقتی دل ممتحنون آی قارداش
..
..
عزّتیله منی گتدون بو بلا دشتینه سن
گئدورم من ولی اولدی سنه بو ئولکه وطن
بیر الیمدن بو گلیر عرض ائدم ایمدی سنه من
چوخ مبارکدی سنون بو وطنون آی قارداش
..
..
دل آلیشدوقجا گلور مقصد بو دشمن اله
گوز گورن دم سنی بیر سونمین اود دوشدی دله
اهل ذلّت بو وجوده نه ائدیبدور کی بئله
قاریشیب تُپراقا صد پاره تنون آی قارداش
..
..
محرم پردهٔ اسراریدی عالمده گوزون
وقف قیلدون بو سببدن بئله اهدافه اوزون
بس کی مأنوسیدی قلبینده کی قانیله سوزون
نقش اولوب قانیله یئرده سخنون آی قارداش
..
..
محنتینده نجه همدم غمه دنیا اولماز
اثر غم نجه دنیاده هویدا اولماز
یوخ سوزوم محنت اولار بیر بئله اما اولماز
باجون ئولسون کی چوخ اولدی محنون آی قارداش
..
..
سائل درگهوین حاجتینی ائیله روا
درد «دلپاکه» اوزون ائیله طبیبانه دوا
یئتر اوز إیستَیینه آند اولا اللهه، گدا
اولسا هر یئرده عنایت کی سنون آی قارداش
..
..
#حسینیه #دلپاک #حسینیه_شهادت #قتلگاه #ترکی #زبدةالاشعار