زبان حال امام مظلوم (ع) با خواهر، هنگام شهادت
..
..
مرحوم سید احمد یاسر نجفی ( ثریا تبریزی )
..
..
ظهر اولدی یتوب وقت شهادت باجی زینب
گیت خیمیه گور وار نه قیامت باجی زینب
..
..
از بسکه بوگون گرمدی بازار محبّت
یکسر بویانوب قانیله تجّار محبّت
جان نقدی متاعیدی بها بار محبّت
دلداره واریمدور بو ارادت باجی زینب
..
..
حق مشتریدور یتمیش ایکی جانه بویرده
هر عیب متاعیمده گر اولسا چکه پرده
کشف ایلمه سه باجی گتورنمز منی درده
بو باره ده هرگونه خسارت باجی زینب
..
..
سودا دوتا بوللم من علاوه بو فروشه
بو اوخلی بدن بیرده کسیک باشیمی توشه
بو حالیمی گورسه گلی فریاد و خروشه
آماده اولان بزم ضیافت باجی زینب
..
..
باجی باشیم اوستونده بیله آغلاما یانما
هر نوع مصیبت گله شکر ایله اوسانما
گون ایسی دی گیت خیمیه چوخ دورما دایانما
دشمنلریم ایللًّه شماتت باجی زینب
..
..
گیت خیمه لره قویما ایده ناله سکینه
آندورما منیم حالیمی اول زار و حزینه
یغ باشوه اطفالیمی چوخ گلمه انینه
اولماز سنه بیر لحظه فراغت باجی زینب
..
..
گیت خیمیه اسباب غمون ایله مهیا
اگلشمه یره منتظر اول گون دوتولاندا
تلّ اوستونه باخسان گوره سن لشکر اعدا
ایلر منه اظهار عداوت باجی زینب
..
..
گورسن باجی غم ظلمتی گر چوکدی هوایه
گل ناله و فریاده اول آماده بلایه
اوندان صورا فرمان ویریلر اهل جفایه
هر دم چالینار طبل بشارت باجی زینب
..
..
دشمنلره برنامۀ قتلیم اولی صادر
خولی گلر ئولدورماقا اما دگو قادر
بو سینۀ مجروحه چخار شمر اولی ظاهر
بو عرصه ده بیر اوزگه علامت باجی زینب
..
..
گلمه بو قدر نالیه چکمه بو قدر آه
اود ووردی یانان قلبیمه بو نالۀ جانکاه
حالون پوزوب آغلاتما منی، فرقۀ گمراه
قتلیمده آچار دست جسارت باجی زینب
..
..
آغلا او زماندا که ایده للر منی مقتول
باشسیز قویار اطفالیمی بو لشکر مجهول
باشیم اولی کهف آیه سینه نیزه ده مشغول
ترسانی ایدر حقّه دلالت باجی زینب
..
..
یغمایه گیدر چون داغیلار جاه و جلالیم
آخرده وورار خیمیه اود لشگر ظالم
ظلمیله یانار اوددا قالار اهل و عیالیم
فریاده گلور آل طهارت باجی زینب
..
..
..
#حسینیه #ثریا_تبریزی #ترکی #حسینیه_شهادت #ترکی #زبدةالاشعار
نظر دهید