شهادت حضرت زهرا (س)
زبانحال حضرت علی (ع)
.
✍️ #زبدةالاشعار ✍️
.
🆔: @nohe_torki
.
محمد هدایتی تبریزی
.
بار الهی مه تابانیم الیمدن گئتدی
دلبریم یومدو گوزون جانیم الیمدن گئتدی
.
گوزلیم یومدو گوزون ، گوزلریمین اشکی آخئر
دردیم عود ایلدی درمانیم الیمدن گئتدی
.
منه وئرمشدی امانت آتاسی فاطمه نی
ساخلیا بیلمه دیم امکانیم الیمدن گئتدی
.
غبطه ایلردی اونا گویده ملک لر بیلیرم
مغبط حور و ملک ، شانیم الیمدن گئتدی
.
جان قویوب انجیدی ، انجتمه دی امّا منی هئچ
دؤزومی چوخ ، سر و سامانیم الیمدن گئتدی
.
بشرین افسری ، حور و ملکین استادی
مرهم سینه ی سوزانیم الیمدن گئتدی
.
خلقتین اشرفینه سینه گلی فاطمه دی
زینت باغ و گلستانیم الیمدن گئتدی
.
شرف آلدی ائومین هر طرفی فاطمه دن
اوجا شخصیّتی جانانیم الیمدن گئتدی
.
اوزو پیکان بلایه سینه سین قلدی سپر
سینه سی یاره لی قربانیم الیمدن گئتدی
.
اوزو کوثر ، سوزو کوثر ، گوزو کوثر خانمیم
یومدو گوز کوثر قرآنیم الیمدن گئتدی
.
سینه یاره گوزلیم منزلمین آتدی داشین
همدمیم ، عالمه رجحانیم الیمدن گئتدی
.
دم مسیحا ، اوزو عیسایه اولان تاج شرف
مفخر اشرف انسانیم الیمدن گئتدی
.
دئمه میش دردیمی احساس ائلین حوریدی او
واقف محنت پنهانیم الیمدن گئتدی
.
غمی چوخ ، صورتی سولقون ، قولو پهلوسی یارا
توش اولوب صرصره ریحانیم الیمدن گئتدی
.
نه تسلّا وئرنیم وار ، نه اولور رام اورگیم
قرّه ی دیده ی گریانیم الیمدن گئتدی
.
دایاقیم ، ایش بیلنیم ، رمز و اشاره قانانیم
عارف و واقف برهانیم الیمدن گئتدی
.
ایشقین کسدی ، ایویم قاره گئیب سوندو چراغ
آغلارام شمع شبستانیم الیمدن گئتدی
.
حسرت حسرت باخیرام بوش یئرینه اشکیم آخیر
ذکری تسبیح و ثنا خوانیم الیمدن گئتدی
.
بوشدو محرابی ، سزلتی کسلیب ، یوخدو سسی
راکع و ساجد سبحانیم الیمدن گئتدی
.
تخت عزّت گوزلی قبره غریبانه گئدیب
قرلیب رشته ی پیمانیم الیمدن گئتدی
.
یئری بوش فاطمه نین گوز یاشمی یوخدو سیلن
محرم قلب پریشانیم الیمدن گئتدی
.
جان دوشوب تنگه داخی زندگیه یوخ هوسیم
صدف لولو و مرجانیم الیمدن گئتدی
.
شهپریم سندی ، اورک درده گلیب یوخ کمکیم
مفخر بوذر و سلمانیم الیمدن گئتدی
.
اوزو گل ، سایه سی طوبیٰ ، باشی باشلاردان اوجا
هادم سنگر عدوانیم الیمدن گئتدی
.
حرمتی سندی ، منی قویمادی سندرسین عدو
جان قویوب یاور میدانیم الیمدن گئتدی
.
عشقمین سولدو گولو ، صرصر اسیب گلشنمه
عشقدن آلدیقیم عنوانیم الیمدن گئتدی
.
حسنینم سارالیب ، زینبمین رنگی سولوب
باغبانیم ، مه ایوانیم الیمدن گئتدی
.
قولاقیم سسده دی بیر جان دئینیم یوخ ، یانیرام
مونس خنده و افغانیم الیمدن گئتدی
.
لذّتی یوخدو منه فاطمه سیز زندگینین
لذّت هر دم و هر آنیم الیمدن گئتدی
.
آغلا ثبت ایله ( هدایت ) بو سوزی دفتروه
شریانمده گزن قانیم الیمدن گئتدی
.
.
#فاطمیه_هدایت_تبریزی
#فاطمیه_شهادت
#بار_الهی_مه_تابانیم_الیمدن_گئتدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید