وضیت حضرت زهرا (س)
..
..
رضوی زنجانی
..
..
باشیم اوسته اگلش سنه ائدیم
بیر نئچه وصیت عم اوغلیجان
چون منی پیمبر حضورینه
حق ائدوبدی دعوت عم اوغلیجان
..
..
محضر شریفون اؤرک سوزون
ایستیرم ائدم بیر به بیر بیان
شرطی وار ولی اشگیوی یوزه
ائتمین بو سوزلرده سن روان
گوزدن اشگیوی جاری ایله سن
فاطمه اولار بسکه قلبی قان
دعوت ایلیور صبره فاطمه
دهریده سنی ای شه جهان
صبر ائله بو درد و مصیبته
منبع شجاعت عم اوغلیجان
..
..
مدتی اولور همسرم سنه
سویله من نئجه همسر اولموشام
یا گوزل اوشاقلاریوا سنون
قیل بیان نئجه مادر اولموشام
دورد اوشاقلاریملا آقا سنه
تک قالان زمان یاور اولموشام
یا سنه نئجه درد و غصه ده
بو جهاندا همسنگر اولموشام
خدمتیمده گر وار عنایتون
ایندی وئر رضایت عم اوغلیجان
..
..
ئوز آتام وئرن ملکیمی منیم
گور نئجه بوگون غصب ائدیبدیلر
کینه دللرینده ولی دوشه
آرم بیعتی نصب ائدیبدیلر
دینیدن چیخوب دین آدیلا چون
پُست و رتبه لر کسب ائدیبدیلر
حقیوی سنون غصب ائدیبدیلر
ظلم پرچمین نصب ائدیبدیلر
غصه می چوخالدوبدی قلبیده
کینه لی جماعت عم اوغلیجان
..
..
دردیمین داخی یوخدی چاره سی
اولموشام پریشان بو شهریده
ایلیوبدی زهرا بو وحی ائوین
ایندی بیت الاحزان بو شهریده
آغلاماق سسیمدن بو قونشولار
اینجییبدی الآن بو شهریده
غاصبان حقیم ائدیبدیلر
داغلی قلبیمی قان بو شهریده
ایستیرم خداوندیدن ئولوم
ای شه ولایت عم اوغلیجان
..
..
..
بعد مصطفا دوندی بعضیلر
اهل بیته بیگانه اولدولار
حمله ائتدیلر بیعت آلماقا
وارد بو کاشانه اولدولار
یاندی درگهیم ئولدی محسنیم
یعنی باعث اول قانه اولدولار
شمع مثلی یاندیم بو مدتی
دورد بالامدا پروانه اولدولار
هم اوشاقلارا هم سن و منه
ائتدیلر اذیت عم اوغلیجان
..
..
آگهم که عمریم یتیب باشا
ایلیوب اجل جانیمی کمین
اوندا که ائوه حمله ائتدیلر
بیعت اوسته ای فخر العالمین
فاطمه او گوندن مریض اولوب
گیزلدوب ولی محنت و غمین
سعى ائدوب ولی بو زمینه ده
اولماسون سنه غصّه لر قرین
مطرح ائتمگه دردیمی سنه
چکمیشم خجالت عم اوغلیجان
..
..
دشمنون الیلن عم اوغلی جان
حبس اولوب منه ایندی بو وطن
سعی ایله بو تشییعیمه منیم
اولماسون او بیگانه دن گلن
بیرده لطف ائله اول زمانیده
غسل ائدوب منه ائتگیلن کفن
بو بدنده کی کوینگیمله سن
غسل وئر منه ای شه زمن
ای وصیّ مرسل بو سوزده وار
چون بیر آیری نیّت عم اوغلیجان
..
..
مطرح ایلورم بیرده بو سوزی
حالیوه سنون ویرمسون تکان
عرض حالیم حالیوی پوزماسون
ای ولی خلّاق لا مکان
واردی خواهشیم یاعلی سنه
جسمیمی مزاره قویان زمان
التفات ایله سن ئوزون او دم
قبریم اوسته بیر مدّتی دایان
قبریم اوسته آیات حقّیدن
ایله سن تلاوت عم اوغلیجان
..
..
گرچه خصم دون ال گوتورمدی
حقّیمیزده چون ظلم و جبریدن
قویما سن دوشه بو ائوه آقا
سایۀ محن غملی ابریدن
الاماندى گئتمه کناره سن
ای عم اوغلی وادیّ صبریدن
بیرده دفن ائدوب تئز قیتمه چون
قورخورام من اول غملی قبریدن
قبریم اوسته اگلش ئوزون بیر آز
ایله سن عنایت عم اوغلیجان
..
..
..
..
..
دوشموشم فشاره زمانده
گیزلدنمورم آه و زاریمی
دشمنون جفاسی آلوب منیم
دلده طاقت و اختیاریمی
گوزلریمده تیره ائدیبدیلر
چون ایشیقلی بیر روزگاریمی
غسل وئر گئجه دفن ائله منی
بیلمسینله جای مزاریمی
اونلارون الیندن رسوله من
تا ائدیم شکایت عم اوغلیجان
..
..
شاهدن که بعد از نبیّ حق
تیر درد و غملر نشانیَم
ئولسه باغبان گل لری صولار
دورت گلون بو گون باغبانیَم
دورد گوزل بالانون جهانیده
یعنی مادر مهربانیَم
دورد بالامدان آگاهیسن که چوخ
زینب و حسین ناگرانیم
اونلارون باشیندا ائشیتمیشم
واردی چوخ مصیبت عم اوغلیجان
..
..
..
فاطمه جهاندان جوان گئدور
وار اؤرکده سوز نهان گئدور
قالمیوب بدنده توان گئدور
قدی غصه لردن کمان گئدور
گل لریم یقیناً صولار منیم
یعنی مهربان باغبان گئدور
کربلا مناسیندن ای آقا
فاطمه ولی ناگران گئدور
اول یرون ائدوب ئوز آتام منه
ظلمینی روایت عم اوغلیجان
..
..
سنده گل حسینیم ئولن زمان
نینواده امداده سیّدی
نیم سوز اولان خیمه گاهیده
زینبی سالاق یاده سیّدی
قورخوشار حسینون بالالاری
انت کمک او صحراده سیّدی
منده منزل خولیه گلم
اولّام اول دم آماده سیّدی
کوللر اوسته چون شاهه یر وئرر
بی وفا رعیّت عم اوغلیجان
..
..
#فاطمیه #رضوی_زنجانی #فاطمیه_شهادت #ترکی #زبدةالاشعار
نظر دهید