شام غریبان حضرت زهرا (س)
..
..
مرحوم حاج حیدر خسروشاهی
..
..
گیجه نون عالمی ماتم گتورور
هر دمی غصه دمادم گتورور
هر آییق قلبه دولی غم گتورور
فکره بیر نکتۀ مبهم گتورور
ائله بیر نکتۀ مبهم که هنوز
اولمیوب فاش او سرّ مرموز
..
..
شهرین اهلین ائله دوتموش غفلت
یوخدى بیر کیمسه ده روح حرکت
ائله آرامشه نفرین – لعنت
یارادور شهر سکوتی وحشت
شهرین اهلی ائله آسوده یاتوب
سینه ده سانکی نفسلرده باتوب
..
..
ائله وحشتلی سکوت ایچره نهان
واردی بیر محفل افسرده دلان
اوردا بیر جمع پریشان پنهان
ائدوری گوز یاشی رخساره روان
گورمسون بزم لرین تا دشمن
آه شمعین ائلیوبلر روشن
..
..
ائله بحرانه دوشوب شهر و دیار
او که هر مشکلی چوخ ساده آچار
ایستمور فاش اولا گیزلین اسرار
گیجه – گیزلین اوز ائوینده ناچار
ایستور اوز همسرینه غسل ویره
جریاناتی اوزون آل نظر
..
..
یارالی غصّه اریتمیش پیکر
امر مولائیله اسما سو توکر
غسل ویردوقجا ولیّ داور
اوزه گیزلینجه توکر اشگ بصر
او گیجه قالدی نه احواله او شاه
بیر اوزی بولدی فقط بیر الله
..
..
غسلدان فارغ اولوب ائتدى کفن
گور نه اندازه ده دی درد و محن
مطلبه اولمیا حالی دشمن
ائده بولمورله اوشاقلار شیون
گوتورولدی او مطهّر پیکر
دئمه پیکر که سینان بیر گل تر
..
..
خلق اولاندان بو عوالم بو جهان
ائله تشییعی ویرن یوخدی نشان
بیر نچه محرم اسرار انسان
جمله مقهور فشار و خفقان
شمعده یاندیرا بولمور ناچار
که مبادا بوله اغیار نه وار
..
..
ائله حاکمدی او آز جمعه فشار
هیچ بیری دردین ائدنمور اظهار
روح آزرده پریشان افکار
آیدا سالدوقجا ایشیق حالی پوزار
نخله لر چاره ائده بو درده
پرتو ماهه چکورلر پرده
..
..
غرق دریای تحیّر جبروت
بزم غم مجلس ماتم ملکوت
اوزی تشییع ائلینلر مبهوت
بو نه عالمدی نه وحشت نه سکوت
وارنه علت او دُر کنز حیا
گیجه گیزلینجه گرک دفن اولونا
..
..
بیر خانم که شرف خلقت اولا
آتاسی خلقت اوچون علت اولا
مظهر عفّت اولا عصمت اولا
بغض و حُبّى اود اولا جنّت اولا
حقّی نه علّته غصب اولدى عیان
دفنی گیزلینجه اولور قبری نهان
..
..
بیر خانم که دیه وحیاً طاها
اوز آتاسی اولا زهرایه فدا
شأن و عزّتده اولا بی همتا
مفخر عترت پیغمبر اولا
حقّین امّت نه دلیله داندی
درگهی آتش ظلمه یاندی
..
..
بیر خانم که اولا حوریه سیاق
اولا دیدارینه جنّت مشتاق
ائده توصیف مقامین خلّاق
سوره کوثره اولسون مصداق
قدری نه علّته اولدى مجهول
حُرمتین ساخلامادی قوم جهول
..
..
بیر خانم که اولا خیر نسوان
آتاسی ائتماقا شأنین اعلان
ائلیه «امّ ابیها» عنوان
دیه وار فاطمه ده عطر جنان
نه دلیله ائله مظلوم اولدی
عمرونون گلشنی جبراً سولدی
..
..
بیر خانم که اولا ماهیّتی نور
بلکه انوار جلی ده مستور
عارضیندن ائده گون شرم حضور
تانینا شافعۀ یوم نشور
اهل ناره نیه مقهور اولسون
قانیله قلب شریفی دولسون
..
..
بیر خانم که ساییلا کفو علی
اولا محبوبۀ حىّ ازلی
اولمیا شرم و حیاده مثلی
وحی منزلده حق لم یزلی
ایلیه شأنینه نازل آیات
نیه ئولدوردی اونی قوم طُغات
..
..
بستر اولدی خانیما تیره تراب
داغلیوب گیتدیله پوزقون احباب
قالدی تک دادرس یوم حساب
گور بو محنت ائلمز قلبى کباب
مرتضی روحونی قویدی قبره
روح مجروحونی قویدی قبره
..
..
سِیر قیل بیر خفقان و جبره
مرتضی ده نظر ایله صبره
باخدی حسرتله او پوزقون قبره
اوخشادی چشم پرآبی ابره
بارش اشگی یری ایسلاتدی
ماه امّیدى علینون باتدى
..
..
بو اسفبار و غم افزا جریان
ائتدى ظالملری رسوای جهان
نه جنایتلر اولوب نه خفقان
اولی بو مسئله دن فاش و عیان
بیرجه قیز قالدی نشان طاهادن
اودا مظلومه گیدوب دنیادن
..
..
نیه ایتگیندی مزار زهرا
هله حیرتده دی اهل دنیا
منتظردی اوزوده خیر نسا
گوزلوری منتظر اوغلی گله تا
فاش ائده عالمه بو مسئله نی
ائلیه خصم جفاسین علنی
..
..
آه ای دادرس مظلومان
الامان خصم ستمگردن امان
ائلیوب شیعه لرین باغرینی قان
عدل اوزیله گل اؤزون قور دیوان
تا ستمدیده لره داد اولسون
بو تمناده «حزین » شاد اولسون
..
..
#فاطمیه #حزین_خسروشاهی #فاطمیه_شهادت #ترکی #زبدةالاشعار
نظر دهید